৩. পঞ্হপুচ্ছকৱণ্ণনা

৬৪০. তীসূতি পঠমাদীসু তীসু. চতুক্কনযেন হি তং ৱুত্তং. এৱংকোট্ঠাসিকাতি অপ্পমাণাতি ৱুত্তা. তেনাহ ‘‘লোকুত্তৰভূতা এৱাতি অধিপ্পাযো’’তি. পৰিচ্ছিন্নাকাস…পে… চতুত্থানং ৱট্টৱিপস্সনাপাদকত্তা ‘‘সব্বত্থপাদকচতুত্থে সঙ্গহিতানী’’তি ৱুত্তং.

অযং কথাতি পৰিত্তাৰম্মণাদিকথা. হেট্ঠিমো অৰিযো উপৰিমস্স অৰিযস্স লোকুত্তৰচিত্তানি পটিৱিজ্ঝিতুং ন সক্কোতীতি ৱুত্তং ‘‘ন চ…পে… সক্কোতী’’তি.

‘‘কিৰিযতো দ্ৱাদসন্ন’’ন্তি চ পাঠো অত্থি. সহ ৱদতি লোকুত্তৰফলচতুত্থতাসামঞ্ঞেনাতি অধিপ্পাযো. ইধ সব্বসদ্দস্স পদেসসব্বৱাচিভাৱতো একদেসস্স অসম্ভৱেপি সব্বত্থপাদকতা এৱ ৱেদিতব্বাতি দস্সেতুং ‘‘সব্বত্থ…পে… দট্ঠব্ব’’ন্তি আহ. পৰিচ্ছিন্নাকাসকসিণচতুত্থাদীনীতি আদি-সদ্দেন আনাপানচতুত্থাদযো সঙ্গহিতা. নৱত্তব্বতাযাতি নৱত্তব্বাৰম্মণতায.

নিব্বানঞ্চাতি ৱত্তব্বং তদাৰম্মণস্সাপি বহিদ্ধাৰম্মণভাৱতো.

‘‘সসন্তানগতম্পী’’তি ইদং ৰূপ-সদ্দেন, কম্ম-সদ্দেন চ সম্বন্ধিতব্বং ‘‘সসন্তানগতম্পি অপাকটং ৰূপং দিব্বচক্খু ৱিয সসন্তানগতম্পি অপাকটং কম্মং ৱিভাৱেতী’’তি. পাকটে পন সসন্তানগতে ৰূপে, কম্মে চ অভিঞ্ঞাঞাণেন পযোজনং নত্থীতি ‘‘অপাকট’’ন্তি ৱিসেসেত্ৱা ৱুত্তং.

পঞ্হপুচ্ছকৱণ্ণনা নিট্ঠিতা.

ঝানৱিভঙ্গৱণ্ণনা নিট্ঠিতা.