৪. দানকথাৱণ্ণনা

৪৭৮. দেয্যধম্মৱসেন চোদেতুন্তি যদি চেতসিকোৱ ধম্মো দানং, ‘‘দিয্যতীতি দান’’ন্তি ইমিনাপি অত্থেন চেতসিকস্সেৱ দানভাৱো আপজ্জতীতি চোদেতুন্তি অত্থো.

৪৭৯. অনিট্ঠফলন্তিআদি অচেতসিকস্স ধম্মস্স দানভাৱদীপনত্থং ৱুত্তন্তি ফলদানভাৱদীপনত্থং ন ৱুত্তন্তি অত্থো দট্ঠব্বো. অনিট্ঠফলন্তিআদিনা অচেতসিকস্স ধম্মস্স ফলদানং ৱুত্তং ৱিয হোতি, ন দানভাৱো, তন্নিৱাৰণত্থঞ্চেতমাহাতি. এৱঞ্চ কত্ৱা অনন্তৰমেৱাহ ‘‘ন হি অচেতসিকো অন্নাদিধম্মো আযতিং ৱিপাকং দেতী’’তি. ইট্ঠফলভাৱনিযমনত্থন্তি দেয্যধম্মো ৱিয কেনচি পৰিযাযেন অনিট্ঠফলতা দানস্স নত্থি, একন্তং পন ইট্ঠফলমেৱাতি নিযমনত্থন্তি অত্থো.

ইতৰেনাতি ‘‘দিয্যতীতি দান’’ন্তি ইমিনা পৰিযাযেন. ন পন একেনত্থেনাতি ‘‘দেয্যধম্মোৱ দান’’ন্তি ইমং সকৱাদীৱাদং নিৱত্তেতুং ‘‘সদ্ধা হিৰিয’’ন্তিআদিকং সুত্তসাধনং পৰৱাদীৱাদে যুজ্জতি, ‘‘ইধেকচ্চো অন্নং দেতী’’তিআদিকঞ্চ, ‘‘চেতসিকোৱ ধম্মো দান’’ন্তি ইমং নিৱত্তেতুং ‘‘চেতসিকো ধম্মো দান’’ন্তি ইমং পন সাধেতুং ‘‘সদ্ধা হিৰিয’’ন্তিআদিকং সকৱাদীৱাদে যুজ্জতি, ‘‘ইধেকচ্চো অন্নং দেতী’’তিআদিকং ৱা ‘‘দেয্যধম্মো দান’’ন্তি সাধেতুন্তি এৱং নিৱত্তনসাধনত্থনানত্তং সন্ধায ‘‘ন পন একেনত্থেনা’’তি ৱুত্তন্তি দট্ঠব্বং. তত্থ যথা পৰৱাদীৱাদে চ সুত্তসাধনত্থং ‘‘ন ৱত্তব্বং চেতসিকো ধম্মো দান’’ন্তি পুচ্ছাযং চেতসিকোৱাতি অত্থো দট্ঠব্বো, তথা ‘‘ন ৱত্তব্বং দেয্যধম্মো দান’’ন্তি পুচ্ছায চ দেয্যধম্মোৱাতি. দেয্যধম্মো ইট্ঠফলোতি ইট্ঠফলাভাৱমত্তমেৱ পটিক্খিত্তন্তি এত্থ ‘‘ইট্ঠফলভাৱমত্তমেৱ পটিক্খিত্ত’’ন্তি পাঠেন ভৱিতব্বন্তি. ‘‘ইট্ঠফলাভাৱমত্তমেৱ দিস্ৱা পটিক্খিত্ত’’ন্তি ৱা ৱত্তব্বং. সঙ্কৰভাৱমোচনত্থন্তি চেতসিকস্স দাতব্বট্ঠেন দেয্যধম্মস্স চ ইট্ঠফলট্ঠেন দানভাৱমোচনত্থন্তি ৱুত্তং হোতি.

দানকথাৱণ্ণনা নিট্ঠিতা.