৫. পৰিভোগমযপুঞ্ঞকথাৱণ্ণনা

৪৮৩. পৰিভোগমযং নাম চিত্তৱিপ্পযুত্তং পুঞ্ঞং অত্থীতি লদ্ধি. তঞ্হি তে সন্ধায পৰিভোগমযং পুঞ্ঞং পৱড্ঢতীতি ৱদন্তীতি অধিপ্পাযো.

৪৮৫. তস্সাপি ৱসেনাতি তস্সাপি লদ্ধিযা ৱসেন. পঞ্চৱিঞ্ঞাণানং ৱিয এতেসম্পি সমোধানং সিযাতি পটিজানাতীতি ৱদন্তি. পঞ্চৱিঞ্ঞাণফস্সাদীনমেৱ পন সমোধানং সন্ধায পটিজানাতীতি অধিপ্পাযো.

৪৮৬. অপৰিভুত্তেপীতি ইমিনা ‘‘পটিগ্গাহকো পটিগ্গহেত্ৱা ন পৰিভুঞ্জতি ছড্ডেতী’’তিআদিকং দস্সেতি. অপৰিভুত্তে দেয্যধম্মে পুঞ্ঞভাৱতো পৰিভোগমযং পুঞ্ঞং পৱড্ঢতীতি অযং ৱাদো হীযতি. তস্মিঞ্চ হীনে সকৱাদীৱাদো বলৱা. চাগচেতনায এৱ হি পুঞ্ঞভাৱো এৱং সিদ্ধো হোতীতি অধিপ্পাযো. অপৰিভুত্তেপি দেয্যধম্মে পুঞ্ঞভাৱে চাগচেতনায এৱ পুঞ্ঞভাৱোতি আহ ‘‘সকৱাদীৱাদোৱ বলৱা’’তি.

পৰিভোগমযপুঞ্ঞকথাৱণ্ণনা নিট্ঠিতা.