৫. ৱিজ্জাভাগিযসুত্তৱণ্ণনা

৩৫. পঞ্চমে সম্পযোগৱসেন ৱিজ্জং ভজন্তি, সহজাতঅঞ্ঞমঞ্ঞনিস্সযসম্পযুত্তঅত্থিঅৱিগতাদিপচ্চযৱসেন তায সহ একীভাৱং গচ্ছন্তীতি ৱিজ্জাভাগিযা. অথ ৱা ৱিজ্জাভাগে ৱিজ্জাকোট্ঠাসে ৱত্তন্তি ৱিজ্জাসভাগতায তদেকদেসে ৱিজ্জাকোট্ঠাসে পৱত্তন্তীতি ৱিজ্জাভাগিযা. তত্থ ৱিপস্সনাঞাণং, মনোমযিদ্ধি, ছ অভিঞ্ঞাতি অট্ঠ ৱিজ্জা. পুৰিমেন অত্থেন তাহি সম্পযুত্তধম্মা ৱিজ্জাভাগিযা. পচ্ছিমেন অত্থেন তাসু যা কাচি একাৱ ৱিজ্জা ৱিজ্জা, সেসা ৱিজ্জাভাগিযা. এৱং ৱিজ্জাপি ৱিজ্জায সম্পযুত্তধম্মাপি ‘‘ৱিজ্জাভাগিযা’’ত্ৱেৱ ৱেদিতব্বা. ইধ পন ৱিপস্সনাঞাণসম্পযুত্তা সঞ্ঞাৱ ৱিজ্জাভাগিযাতি আগতা, সঞ্ঞাসীসেন সেসসম্পযুত্তধম্মাপি ৱুত্তা এৱাতি দট্ঠব্বং. অনিচ্চানুপস্সনাঞাণেতি অনিচ্চানুপস্সনাঞাণে নিস্সযপচ্চযভূতে উপ্পন্নসঞ্ঞা, তেন সহগতাতি অত্থো. সেসেসুপি এসেৱ নযো.

ৱিজ্জাভাগিযসুত্তৱণ্ণনা নিট্ঠিতা.