২-৩. আৰভতিসুত্তাদিৱণ্ণনা

১৪২-৩. দুতিযে আৰভতীতি এত্থ আৰম্ভ-সদ্দো কম্মকিৰিযহিংসনৱীৰিযকোপনাপত্তিৱীতিক্কমেসু ৱত্ততি. তথা হেস ‘‘যং কিঞ্চি দুক্খং সম্ভোতি, সব্বং আৰম্ভপচ্চযা’’তি (সু. নি. ৭৪৯) কম্মে আগতো. ‘‘মহাৰম্ভা মহাযঞ্ঞা, ন তে হোন্তি মহপ্ফলা’’তি (সং. নি. ১.১২০; অ. নি. ৪.৩৯) কিৰিযায. ‘‘সমণং গোতমং উদ্দিস্স পাণং আৰভন্তী’’তি (ম. নি. ২.৫১) হিংসনে. ‘‘আৰম্ভথ নিক্খমথ, যুঞ্জথ বুদ্ধসাসনে’’তি (সং. নি. ১.১৮৫; নেত্তি. ২৯; পেটকো. ৩৮; মি. প. ৫.১.৪) ৱীৰিযে. ‘‘বীজগামভূতগামসমাৰম্ভা পটিৱিৰতো হোতী’’তি (দী. নি. ১.১০, ১৯৫; ম. নি. ১.২৯৩) কোপনে. ‘‘আৰভতি চ ৱিপ্পটিসাৰী চ হোতী’’তি (অ. নি. ৫.১৪২; পু. প. ১৯১) অযং পন আপত্তিৱীতিক্কমে আগতো, তস্মা আপত্তিৱীতিক্কমৱসেন আৰভতি চেৱ, তপ্পচ্চযা চ ৱিপ্পটিসাৰী হোতীতি অযমেত্থ অত্থো. যথাভূতং নপ্পজানাতীতি অনধিগতত্তা যথাসভাৱতো ন জানাতি. যত্থস্সাতি যস্মিং অস্স, যং ঠানং পত্ৱা এতস্স পুগ্গলস্স উপ্পন্না পাপকা অকুসলা ধম্মা অপৰিসেসা নিৰুজ্ঝন্তীতি অত্থো. কিং পন পত্ৱা তে নিৰুজ্ঝন্তীতি? অৰহত্তমগ্গং, ফলপ্পত্তস্স পন নিৰুদ্ধা নাম হোন্তি. এৱং সন্তেপি ইধ মগ্গকিচ্চৱসেন পন ফলমেৱ ৱুত্তন্তি ৱেদিতব্বং.

আৰভতী ন ৱিপ্পটিসাৰী হোতীতি আপত্তিং আপজ্জতি, তং পনেস দেসেতুং সভাগপুগ্গলং পৰিযেসতি, তস্মা ন ৱিপ্পটিসাৰী হোতি. ন আৰভতি ৱিপ্পটিসাৰী হোতীতি আপত্তিং ন আপজ্জতি, ৱিনযপঞ্ঞত্তিযং পন অকোৱিদত্তা অনাপত্তিযা আপত্তিসঞ্ঞী হুত্ৱা ৱিপ্পটিসাৰী হোতীতি এৱমেত্থ অত্থো দট্ঠব্বো. ‘‘ন আৰভতি ন ৱিপ্পটিসাৰী হোতী’’তি যো ৱুত্তো, কতৰো সো পুগ্গলো? ওস্সট্ঠৱীৰিযপুগ্গলো. সো হি ‘‘কিং মে ইমস্মিং কালে পৰিনিব্বানেন, অনাগতে মেত্তেয্যসম্মাসম্বুদ্ধকালে পৰিনিব্বাযিস্সামী’’তি ৱিসুদ্ধসীলোপি পটিপত্তিং ন পূৰেতি. সো হি ‘‘কিমত্থং আযস্মা পমত্তো ৱিহৰতি, পুথুজ্জনস্স নাম গতি অনিবদ্ধা, তস্মা হি মেত্তেয্যসম্মাসম্বুদ্ধস্স সম্মুখীভাৱং লভেয্যাসি, অৰহত্তত্থায ৱিপস্সনং ভাৱেহী’’তি ওৱদিতব্বোৱ.

সাধূতি আযাচনত্থে নিপাতো. ইদং ৱুত্তং হোতি – যাৱ অপৰদ্ধং ৱত আযস্মতা, এৱং সন্তেপি মযং আযস্মন্তং যাচাম, দেসেতব্বযুত্তকস্স দেসনায, ৱুট্ঠাতব্বযুত্তকস্স ৱুট্ঠানেন, আৱিকাতব্বযুত্তকস্স আৱিকিৰিযায আৰম্ভজে আসৱে পহায সুদ্ধন্তে ঠিতভাৱপচ্চৱেক্খণেন ৱিপ্পটিসাৰজে আসৱে পটিৱিনোদেত্ৱা নীহৰিত্ৱা ৱিপস্সনাচিত্তঞ্চেৱ ৱিপস্সনাপঞ্ঞঞ্চ ৱড্ঢেতূতি. অমুনা পঞ্চমেন পুগ্গলেনাতি এতেন পঞ্চমেন খীণাসৱপুগ্গলেন. সমসমো ভৱিস্সতীতি লোকুত্তৰগুণেহি সমভাৱেনেৱ সমো ভৱিস্সতীতি এৱং খীণাসৱেন ওৱদিতব্বোতি অত্থো. ততিযং উত্তানমেৱ.

আৰভতিসুত্তাদিৱণ্ণনা নিট্ঠিতা.