১. অৱজানাতিসুত্তৱণ্ণনা

১৪১. পঞ্চমস্স পঠমে দত্ৱা অৱজানাতীতি এত্থ একো ভিক্খু মহাপুঞ্ঞো চতুপচ্চযলাভী হোতি, সো চীৱৰাদীনি লভিত্ৱা অঞ্ঞং অপ্পপুঞ্ঞং আপুচ্ছতি. সোপি তস্মিং পুনপ্পুনং আপুচ্ছন্তেপি গণ্হাতিযেৱ. অথস্স ইতৰো থোকং কুপিতো হুত্ৱা মঙ্কুভাৱং উপ্পাদেতুকামো ৱদতি ‘‘অযং অত্তনো ধম্মতায চীৱৰাদীনি ন লভতি, অম্হে নিস্সায লভতী’’তি. এৱম্পি দত্ৱা অৱজানাতি নাম. একো পন একেন সদ্ধিং দ্ৱে তীণি ৱস্সানি ৱসন্তো পুব্বে তং পুগ্গলং গৰুং কত্ৱা গচ্ছন্তে গচ্ছন্তে কালে চিত্তীকাৰং ন কৰোতি, আসননিসিন্নট্ঠানম্পি ন গচ্ছতি. অযম্পি পুগ্গলো সংৱাসেন অৱজানাতি নাম. আধেয্যমুখোতি আদিতো ধেয্যমুখো, পঠমৱচনস্মিংযেৱ ঠপিতমুখোতি অত্থো. তত্থাযং নযো – একো পুগ্গলো সাৰুপ্পংযেৱ ভিক্খুং ‘‘অসাৰুপ্পো এসো’’তি কথেতি. তং সুত্ৱা এস নিট্ঠং গচ্ছতি, পুন অঞ্ঞেন সভাগেন ভিক্খুনা ‘‘সাৰুপ্পো অয’’ন্তি ৱুত্তেপি তস্স ৱচনং ন গণ্হাতি. অসুকেন নাম ‘‘অসাৰুপ্পো অয’’ন্তি অম্হাকং কথিতন্তি পুৰিমভিক্খুনোৱ কথং গণ্হাতি. অপৰোপিস্স দুস্সীলং ‘‘সীলৱা’’তি কথেতি. তস্স ৱচনং সদ্দহিত্ৱা পুন অঞ্ঞেন ‘‘অসাৰুপ্পো এসো ভিক্খু, নাযং তুম্হাকং সন্তিকং উপসঙ্কমিতুং যুত্তো’’তি ৱুত্তেপি তস্স ৱচনং অগ্গহেত্ৱা পুৰিমংযেৱ কথং গণ্হাতি. অপৰো ৱণ্ণম্পি কথিতং গণ্হাতি, অৱণ্ণম্পি কথিতং গণ্হাতিযেৱ. অযম্পি আধেয্যমুখোযেৱ নাম আধাতব্বমুখো, যং যং সুণাতি, তত্থ তত্থ ঠপিতমুখোতি অত্থো.

লোলোতি সদ্ধাদীনং ইত্তৰকালপ্পতিতত্তা অস্সদ্ধিযাদীহি লুলিতভাৱেন লোলো. ইত্তৰভত্তীতিআদীসু পুনপ্পুনং ভজনেন সদ্ধাৱ ভত্তিপেমং. সদ্ধাপেমম্পি গেহস্সিতপেমম্পি ৱট্টতি, পসাদো সদ্ধাপসাদো. এৱং পুগ্গলো লোলো হোতীতি এৱং ইত্তৰসদ্ধাদিতায পুগ্গলো লোলো নাম হোতি. হলিদ্দিৰাগো ৱিয, থুসৰাসিম্হি কোট্টিতখানুকো ৱিয, অস্সপিট্ঠিযং ঠপিতকুম্ভণ্ডং ৱিয চ অনিবদ্ধট্ঠানে মুহুত্তেন কুপ্পতি. মন্দো মোমূহোতি অঞ্ঞাণভাৱেন মন্দো, অৱিসযতায মোমূহো, মহামূড়্হোতি অত্থো.

অৱজানাতিসুত্তৱণ্ণনা নিট্ঠিতা.