৫. অনুসোতসুত্তৱণ্ণনা

৫. পঞ্চমে অনুসোতং গচ্ছতীতি সংসাৰসোতস্স অনুকূলভাৱেন গচ্ছতি. পচ্চনীকপটিপত্তিযাতি সংসাৰসোতস্স পটিকূলৱসেন পৱত্তনিব্বিদানুপস্সনাদিপটিপত্তিযা. ঠিতসভাৱোতি অচলপ্পসাদাদিসমন্নাগমেন ঠিতসভাৱো. অনাগামী হি অস্সদ্ধিযেহি কামৰাগব্যাপাদেহি অকম্পনিযচিত্ততায তম্হা লোকা অনাৱত্তিধম্মতায চ ঠিতসভাৱো নাম. ওঘং তৰিত্ৱাতি কামোঘাদিচতুব্বিধং ওঘং অতিক্কমিত্ৱা. পৰতীৰং গতোতি নিব্বানপাৰং গতো. ব্ৰাহ্মণোতি বাহিতপাপতায ব্ৰাহ্মণোতি সঙ্খং গতো খীণাসৱো. তেনাহ ‘‘সেট্ঠো নিদ্দোসো’’তি. পঞ্চৱেৰকম্মন্তি পাণাতিপাতাদিপঞ্চদুচ্চৰিতং. সহাপি দুক্খেন সহাপি দোমনস্সেনাতি কিলেসপৰিযুট্ঠানে সতি উপ্পন্নেন দুক্খদোমনস্সেন সদ্ধিম্পি. পৰিপুণ্ণন্তি তিস্সন্নং সিক্খানং একাযপি অনূনং. পৰিসুদ্ধন্তি নিৰুপক্কিলেসং. ব্ৰহ্মচৰিযন্তি সেট্ঠচৰিযং. ইমিনা ৱাৰেন সোতাপন্নসকদাগামিনো কথিতা. কিং পন তে ৰুদন্তা ব্ৰহ্মচৰিযং চৰন্তীতি? আম, কিলেসৰোদনেন ৰোদন্তা চৰন্তি নাম, সীলসম্পন্নো পুথুজ্জনভিক্খু এত্থেৱ সঙ্গহিতো.

চেতোৱিমুত্তিন্তি ফলসমাধিং. পঞ্ঞাৱিমুত্তিন্তি ফলঞাণং. ছহাকাৰেহি পাৰগতোতি অভিঞ্ঞাপাৰগূ, পৰিঞ্ঞাপাৰগূ, ভাৱনাপাৰগূ, পহানপাৰগূ, সচ্ছিকিৰিযাপাৰগূ, সমাপত্তিপাৰগূতি এৱং ছহি আকাৰেহি সব্বধম্মানং পাৰং পৰিযোসানং গতো. সেসমেত্থ সুৱিঞ্ঞেয্যমেৱ.

অনুসোতসুত্তৱণ্ণনা নিট্ঠিতা.