৭-৮. মহামোগ্গল্লানসুত্তাদিৱণ্ণনা

১৬৭-১৬৮. সত্তমট্ঠমেসু মহামোগ্গল্লানত্থেৰস্সাতিআদিনা মোগ্গল্লানত্থেৰস্স হেট্ঠা তিণ্ণং মগ্গানং সুখপটিপদদন্ধাভিঞ্ঞভাৱো, অৰহত্তমগ্গস্স দুক্খপটিপদখিপ্পাভিঞ্ঞভাৱো ৱুত্তো, সাৰিপুত্তত্থেৰস্স পন হেট্ঠিমানং তিণ্ণং মগ্গানং সুখপটিপদদন্ধাভিঞ্ঞভাৱো, অৰহত্তমগ্গস্স চ সুখপটিপদখিপ্পাভিঞ্ঞভাৱো দস্সিতো. যং পন ৱুত্তং ৱিসুদ্ধিমগ্গে (ৱিসুদ্ধি. ২.৮০১) ‘‘বুদ্ধানং পন চত্তাৰোপি মগ্গা সুখপটিপদখিপ্পাভিঞ্ঞাৱ অহেসুং, তথা ধম্মসেনাপতিস্স. মহামোগ্গল্লানত্থেৰস্স পন পঠমমগ্গো সুখপটিপদখিপ্পাভিঞ্ঞো অহোসি, উপৰি তযো দুক্খপটিপদদন্ধাভিঞ্ঞা’’তি. যঞ্চ ৱুত্তং অট্ঠসালিনিযং (ধ. স. অট্ঠ. ১৪৭৬) ‘‘তথাগতস্স হি সাৰিপুত্তত্থেৰস্স চ চত্তাৰোপি মগ্গা সুখপটিপদখিপ্পাভিঞ্ঞাৱ অহেসুং, মহামোগ্গল্লানত্থেৰস্স পন পঠমমগ্গো সুখপটিপদখিপ্পাভিঞ্ঞো উপৰি তযো দুক্খপটিপদখিপ্পাভিঞ্ঞা’’তি, তং সব্বং অঞ্ঞমঞ্ঞং নানুলোমেতি. ইমায পাড়িযা ইমায চ অট্ঠকথায ন সমেতি, তস্মা ৱীমংসিতব্বমেতং. তংতংভাণকানং ৱা মতেন তত্থ তত্থ তথা তথা ৱুত্তন্তি গহেতব্বং.

মহামোগ্গল্লানসুত্তাদিৱণ্ণনা নিট্ঠিতা.