৯. সসঙ্খাৰসুত্তৱণ্ণনা

১৬৯. নৱমে সসঙ্খাৰেন দুক্খেন কসিৰেন অধিমত্তপযোগং কত্ৱাৱ কিলেসপৰিনিব্বানধম্মোতি সসঙ্খাৰপৰিনিব্বাযী. অসঙ্খাৰেন অপ্পযোগেন অধিমত্তপযোগং অকত্ৱাৱ কিলেসপৰিনিব্বানধম্মোতি অসঙ্খাৰপৰিনিব্বাযী. ধম্মানুসাৰী পুগ্গলো হি আগমনম্হি কিলেসে ৱিক্খম্ভেন্তো অপ্পদুক্খেন অকসিৰেন অকিলমন্তোৱ ৱিক্খম্ভেতুং সক্কোতি. সদ্ধানুসাৰী পুগ্গলো পন দুক্খেন কসিৰেন কিলমন্তো হুত্ৱা ৱিক্খম্ভেতুং, তস্মা ধম্মানুসাৰিস্স পুব্বভাগমগ্গক্খণে কিলেসচ্ছেদকং ঞাণং অদন্ধং তিখিণং সূৰং হুত্ৱা ৱহতি. যথা নাম তিখিণেন অসিনা কদলিং ছিন্দন্তস্স ছিন্নট্ঠানং মট্ঠং হোতি, অতিসীঘং ৱহতি, সদ্দো ন সুয্যতি, বলৱৱাযামকিচ্চং ন হোতি, এৱৰূপা ধম্মানুসাৰিনো পুব্বভাগভাৱনা হোতি. সদ্ধানুসাৰিনো পন পুব্বভাগক্খণে কিলেসচ্ছেদকং ঞাণং দন্ধং অতিখিণং অসূৰং হুত্ৱা ৱহতি. যথা নাম কুণ্ঠেন অসিনা কদলিং ছিন্দন্তস্স ছিন্নট্ঠানং ন মট্ঠং হোতি, অতিসীঘং ন ৱহতি, সদ্দো সুয্যতি, বলৱৱাযামকিচ্চং ইচ্ছিতব্বং হোতি, এৱৰূপা সদ্ধানুসাৰিনো পুব্বভাগভাৱনা হোতি. এৱং সন্তেপি নেসং কিলেসক্খযে নানত্তং নত্থি, অনৱসেসাৱ কিলেসা খীযন্তি.

সসঙ্খাৰসুত্তৱণ্ণনা নিট্ঠিতা.