১৬. একধম্মপাড়ি

(১৬) ৪. একধম্মপাড়ি-চতুত্থৱগ্গৱণ্ণনা

৩২২. চতুত্থস্স পঠমে সঞ্ঞাণভূতাতি উপলক্খণভূতা. পঞ্চদসযোজনাৱট্টক্খন্ধাতি পঞ্চদসযোজনক্খন্ধপৰিক্খেপা. যথা চাতি চ-সদ্দেন কদম্বৰুক্খাদীনং কপ্পট্ঠাযিভাৱং ৱিয যোজনসতুব্বেধাদিভাৱং সমুচ্চিনোতি, ন পন জম্বুযা জম্বুদীপস্স ৱিয তেহি অপৰগোযানাদীনং সঞ্ঞাণভাৱং. ৰামণেয্যকন্তি ৰমণীযভাৱং. সেসপদেসূতি ৱনৰামণেয্যকাদিপদেসু. উগ্গতং কূলং উস্সিতভাৱো এতস্সাতি উক্কূলং, ৱিগতং অপগতং কূলং এতস্সাতি ৱিকূলন্তি আহ – ‘‘উন্নতট্ঠানং নিন্নট্ঠান’’ন্তি চ. নন্দিযাৱট্টমচ্ছপিট্ঠেনেৱাতি কুজ্জককুলিসকমচ্ছসঙ্ঘাতপিট্ঠেনেৱ.

৩২৩. দুতিযাদীসু চত্তাৰো অপাযা অঞ্ঞত্ৰ মনুস্সেহীতি অধিপ্পেতা, ন দেৱা অঞ্ঞত্ৰ মনুস্সেহীতি হীনায জাতিযা অধিপ্পেতত্তা. উপাদাযুপাদাযাপি মজ্ঝিমদেসো লব্ভতি, যত্থ গতি ভিক্খূনং ভিক্খুনীনং উপাসকানং উপাসিকানং অঞ্ঞেসম্পি কম্মৱাদিকিৰিযৱাদিৱিঞ্ঞুজাতিকানং, যো পতিৰূপদেসোতি ৱুচ্চতি. তেনাহ – ‘‘সকলোপি হী’’তিআদি.

৩২৪. এড়াতি দোসো. তেনাহ – ‘‘নিদ্দোসমুখাতি অত্থো’’তি.

৩২৬. তথাগতস্স গুণে জানিত্ৱা চক্খুনাপি দস্সনং দস্সনমেৱ, অজানিত্ৱা পন দস্সনং তিৰচ্ছানগতানম্পি হোতিযেৱাতি আহ – ‘‘যে তথাগতস্স গুণে জানিত্ৱা’’তিআদি.

৩২৭. পকাসেত্ৱা কথিতন্তি সচ্চানি পকাসেত্ৱা কথিতং.

৩২৮. সুতানং ধম্মানং অসম্মোসো ধাৰণন্তি আহ – ‘‘ধাৰেন্তীতি ন পম্মুস্সন্তী’’তি.

৩২৯. অত্থানত্থং উপপৰিক্খন্তীতি ‘‘অযং ইমিস্সা পাড়িযা অত্থো, অযং ন অত্থো’’তি অত্থানত্থং উপপৰিক্খন্তি. অনত্থপৰিহাৰেন হি অত্থগ্গহণং যথা অধম্মপৰিৱজ্জনেন ধম্মপ্পটিপত্তি.

৩৩০. অনুলোমপটিপদন্তি নিব্বানস্স অনুলোমিকং পটিপদং.

৩৩১. সংৱেগজনকেসু কাৰণেসূতি সংৱেগজনকেসু জাতিআদীসু কাৰণেসু. সংৱেজনীযেসু ঠানেসু সহোত্তপ্পঞাণং সংৱেগো.

৩৩২. উপাযেনাতি যেন উপাযেন ৱট্টূপচ্ছেদো, তেন উপাযেন. পধানৱীৰিযং কৰোন্তীতি সম্মপ্পধানসঙ্খাতং ৱীৰিযং কৰোন্তি উপ্পাদেন্তি.

৩৩৩. ৱৱস্সজীযন্তি ৱিস্সজ্জীযন্তি এত্থ সঙ্খাৰাতি ৱৱস্সগ্গো, অসঙ্খতা ধাতূতি আহ – ‘‘ৱৱস্সগ্গো ৱুচ্চতি নিব্বান’’ন্তি.

৩৩৪. উত্তমন্নানন্তি উত্তমানং পঞ্চন্নং ভোজনানং. উত্তমৰসানন্তি উত্তমানং ৰসানং. উঞ্ছাচাৰেনাতি উঞ্ছাচৰিযায কস্সচি অপৰিগ্গহভূতস্স কিঞ্চি অযাচিত্ৱা গহণং উঞ্ছাচাৰো. এত্থ চাতিআদিনা অন্নাদীনং অগ্গভাৱো নাম মনাপপৰমো ইচ্ছিতক্খণলাভো, ন তেসং লাভিতামত্তন্তি দস্সেতি. পটিলভন্তীতি দেন্তি পণীতভাৱেন. ভত্তস্স একপাতীতি একপাতিপূৰং ভত্তং. ইদং কিং নামাতি ‘‘ইদং অন্নগ্গৰসগ্গং নাম হোতি, ন হোতী’’তি পুচ্ছতি. উঞ্ছেন কপালাভতেনাতি মিস্সকভত্তেন. যাপেন্তেতি যাপনসীসেন যাপনহেতুং ভত্তং ৱদতি. উপাদায অগ্গৰসং নামাতি তং তং উপাদাযুপাদায অন্নগ্গৰসগ্গং দট্ঠব্বন্তি দস্সেতি. চক্কৱত্তিআহাৰতো হি চাতুমহাৰাজিকানং আহাৰো অগ্গোতি এৱং যাৱ পৰনিম্মিতৱসৱত্তিদেৱা নেতব্বং.

৩৩৫. অত্থৰসো নাম চত্তাৰি সামঞ্ঞফলানি ‘‘অৰিযমগ্গানং ফলভূতো ৰসো’’তি কত্ৱা. ধম্মৰসো নাম চত্তাৰো মগ্গা ‘‘সামঞ্ঞফলস্স হেতুভূতো ৰসো’’তি কত্ৱা ৱিমুত্তিৰসো নাম অমতং নিব্বানং ‘‘সব্বসঙ্খাৰসমথো’’তি কত্ৱা.

চতুত্থৱগ্গৱণ্ণনা নিট্ঠিতা.

জম্বুদীপপেয্যালো নিট্ঠিতো.