১৭. পসাদকৰধম্মৱগ্গৱণ্ণনা

৩৬৬. অদ্ধমিদন্তি সন্ধিৱসেন পাড়িযং ৰস্সং কত্ৱা ৱুত্তং, ম-কাৰো পদসন্ধিকৰোতি আহ – ‘‘অদ্ধা ইদ’’ন্তি. একংসো এসাতি একংসো হেতু এস লাভানং. পাপকং নামাতি অপ্পকম্পি পাপং নাম ব্যত্তং একংসেন ন কৰোতি. তথস্সাতি তথা সম্মাপটিপজ্জমানস্স অস্স. আৰঞ্ঞিকত্তং…পে… তেচীৱৰিকত্তন্তি ইমেসং ধুতধম্মানং গহণেনেৱ ইতৰেসম্পি তংসভাগানং গহিতভাৱো দট্ঠব্বো. থাৱৰপ্পত্তভাৱোতি সাসনে থিৰভাৱপ্পত্তি থেৰভাৱো. আকপ্পস্স সম্পত্তীতি ‘‘অঞ্ঞো মে আকপ্পো কৰণীযো’’তি এৱং ৱুত্তস্স আকপ্পস্স সম্পত্তি. কোলপুত্তীতি কোলপুত্তিযন্তি আহ – ‘‘কুলপুত্তভাৱো’’তি. সম্পন্নৰূপতাতি উপধিসম্পদা. ৱচনকিৰিযাযাতি ৱচনপ্পযোগস্স মধুৰভাৱো মঞ্জুস্সৰতা. তেনস্স লাভো উপ্পজ্জতীতি ইদং ন লাভুপ্পাদনূপাযদস্সনপৰং, অথ খো এৱং সম্মাপটিপজ্জমানস্স অনিচ্ছন্তস্সেৱ লাভো উপ্পজ্জতীতি লাভস্স অব্যভিচাৰহেতুদস্সনপৰং দট্ঠব্বং. যথাহ –

‘‘আকঙ্খেয্য চে, ভিক্খৱে, ভিক্খু লাভী অস্সং চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানন্তি, সীলেস্ৱেৱস্স পৰিপূৰকাৰী’’তি (ম. নি. ১.৬৫).

পসাদকৰধম্মৱগ্গৱণ্ণনা নিট্ঠিতা.