১৪. এতদগ্গৱগ্গো

(১৪) ৭. সত্তমএতদগ্গৱগ্গৱণ্ণনা

সুজাতাৱত্থু

২৫৮. উপাসিকাপাড়িসংৱণ্ণনায পঠমং সুৱিঞ্ঞেয্যমেৱ.

ৱিসাখাৱত্থু

২৫৯. দুতিযে মহালতাপসাধনস্সাতি মহালতাপিড়ন্ধনস্স. তস্মিঞ্চ পিড়ন্ধনে চতস্সো ৱজিৰনাড়িযো উপযোগং অগমংসু. মুত্তানং একাদস নাড়িযো, পৱাড়স্স দ্ৱাৱীসতি নাড়িযো, পদুমৰাগমণীনং তেত্তিংস নাড়িযো. ইতি এতেহি চ অঞ্ঞেহি চ ইন্দনীলাদীহি নীলপীতলোহিতোদাতমঞ্জিট্ঠসামকবৰৱণ্ণৱসেন সত্তৱণ্ণেহি ৱৰৰতনেহি নিট্ঠানং অগমাসি, তং সীসে পটিমুক্কং যাৱ পাদপিট্ঠিযা ভস্সতি, পঞ্চন্নং হত্থীনং বলং ধাৰযমানাৱ নং ইত্থী ধাৰেতুং সক্কোতি. অন্তোঅগ্গি বহি ন নীহৰিতব্বোতিআদীনং অত্থো উপৰি আৱি ভৱিস্সতি. সেসমেত্থ সুৱিঞ্ঞেয্যমেৱ.

খুজ্জুত্তৰা-সামাৱতীৱত্থু

২৬০-২৬১. ততিযচতুত্থেসু পাযাসস্সাতি বহলতৰস্স পাযাসস্স. তং পাযাসং ভুঞ্জন্তেসূতি তং বহলতৰং গৰুসিনিদ্ধং পাযাসং ভুঞ্জন্তেসু. জীৰাপেতুং অসক্কোন্তোতি অন্তৰামগ্গে অপ্পাহাৰতায মন্দগহণিকত্তা জীৰাপেতুং অসক্কোন্তো. ৱাড়মিগট্ঠানেতি ৱাড়মিগেহি অধিট্ঠিতট্ঠানে. অনুৱিজ্জন্তোতি ৱিচাৰেন্তো. সালাতি নড়কাৰসালা. মুধা ন কৰিস্সতীতি মূল্যং ৱিনা ন কৰিস্সতি. আলিম্পেসীতি অগ্গিং অদাসি, অগ্গিং জালেসীতি অত্থো. পেক্খাতি আগমেহি. উপধিসম্পদাতি সৰীৰসম্পত্তি. ৱটৰুক্খং পত্ৱাতি নিগ্ৰোধৰুক্খং পত্ৱা. সুৱণ্ণকটকেতি সুৱণ্ণৱলযে. অব্ভুং মেতি মে অৱড্ঢীতি অত্থো. অন্তো অসোধেত্ৱাতি পণ্ণসালায অন্তো কস্সচি অত্থিভাৱং ৱা নত্থিভাৱং ৱা অনুপধাৰেত্ৱা. সেসং সুৱিঞ্ঞেয্যমেৱ.

উত্তৰানন্দমাতাৱত্থু

২৬২. পঞ্চমে উপনিস্সযং দিস্ৱাতি ইমিনা যথা ৱিসেসাধিগমস্স সতিপি পচ্চুপ্পন্নপচ্চযসমৱাযে অৱস্সং উপনিস্সযসম্পদা ইচ্ছিতব্বা, এৱং দিট্ঠধম্মৱেদনীযভাৱেন ৱিপচ্চনকস্স কম্মস্সপি পচ্চুপ্পন্নসমৱাযো ৱিয উপনিস্সযসম্পদাপি সৱিসেসা ইচ্ছিতব্বাতি দস্সেতি. তথা হি উক্কংসগতসপ্পুৰিসূপনিস্সযযোনিসোমনসিকাৰেসু লব্ভমানেসুপি উপনিস্সযৰহিতস্স ৱিসেসাধিগমো ন সম্পজ্জতেৱাতি. কপ্পিযং কত্ৱাতি যথা কপ্পিযং হোতি, তথা কত্ৱা. পত্তে পতিট্ঠপেয্যাতি আহাৰং দানমুখে ৱিস্সজ্জেয্য. তীহি চেতনাহীতি পুব্বভাগমুঞ্চঅনুমোদনাচেতনাহি. ৱুত্তঞ্হেতং –

‘‘পুব্বেৱ দানা সুমনো, দদং চিত্তং পসাদযে;

দত্ৱা অত্তমনো হোতি, এসা পুঞ্ঞস্স সম্পদা’’তি. (অ. নি. ৬.৩৭; পে. ৱ. ৩০৫);

তৱ মনং সন্ধাৰেহীতি ‘‘অজ্জ ভত্তং চিৰাযিত’’ন্তি কোধতো তৱ চিত্তং সন্ধাৰেহি, মা কুজ্ঝীতি অত্থো. ওলোকিতোলোকিতট্ঠানং…পে… সম্পৰিকিণ্ণং ৱিয অহোসীতি তেন কসিতট্ঠানং সব্বং সুৱণ্ণভাৱাপত্তিযা মহাকোসাতকিপুপ্ফেহি সঞ্ছন্নং ৱিয অহোসি. তাদিসেতি তযা সদিসে. ন কোপেমীতি ন ৱিনাসেমি, জাতিযা ন হীড়েমি. পূজং কৰোতীতি সম্মাসম্বুদ্ধস্স পূজং কৰোতি. অন্তৰৱত্থুন্তি গেহঙ্গণং. ভোতি সম্বোধনে নিপাতো. জেতি অৱঞ্ঞালপনং. সযং অৰিযসাৱিকাভাৱতো সত্থুৱসেন ‘‘সপিতিকা ধীতা’’তি ৱত্ৱা সত্থু সম্মুখা ধম্মস্সৱনেন তস্সা ৱিসেসাধিগমং পচ্চাসীসন্তী ‘‘দসবলে খমন্তেযেৱ খমিস্সামী’’তি আহ. কদৰিযন্তি থদ্ধমচ্ছৰিং.

সুপ্পৱাসাৱত্থু

২৬৩. ছট্ঠে পণীতদাযিকানন্তি পণীতৰসৱত্থূনং দাযিকানং. আযুনো ঠিতিহেতুং ভোজনং দেন্তী আযুং দেতি নাম. এস নযো ৱণ্ণং দেতীতিআদীসু. তেনাহ – ‘‘পঞ্চ ঠানানী’’তি. কম্মসৰিক্খকঞ্চেতং ফলন্তি দস্সেন্তো ‘‘আযুং খো পন দত্ৱা’’তিআদিমাহ. তত্থ দত্ৱাতি দানহেতু. ভাগিনীতি ভাগৱতী লদ্ধুং ভব্বা.

সুপ্পিযাৱত্থু

২৬৪. সত্তমে ঊৰুমংসং ছিন্দিত্ৱা দাসিযা অদাসীতি আগতফলা ৱিঞ্ঞাতসাসনা অৰিযসাৱিকা অত্তনো সৰীৰদুক্খং অচিন্তেত্ৱা তস্স ভিক্খুনো ৰোগৱূপসমমেৱ পচ্চাসীসন্তী অত্তনো ঊৰুমংসং ছিন্দিত্ৱা দাসিযা অদাসি. সত্থাপি তস্সা তথাপৱত্তং অজ্ঝাসযসম্পত্তিং দিস্ৱা ‘‘মম সম্মুখীভাৱূপগমনেনেৱস্সা ৱণো ৰুহিত্ৱা সঞ্ছৱি জাযতি, ফাসুভাৱো হোতী’’তি চ দিস্ৱা ‘‘পক্কোসথ ন’’ন্তি আহ. সা চিন্তেসীতি ‘‘সব্বলোকস্স হিতানুকম্পকো সত্থা ন মং দুক্খাপেতুং পক্কোসতি, অত্থেত্থ কাৰণ’’ন্তি চিন্তেসি. অত্তনা কতকাৰণং সব্বং কথেসীতি বুদ্ধানুভাৱৱিভাৱনত্থং কথেসি, ন অত্তনো দড়্হজ্ঝাসযতায ৱিভাৱনত্থং. গিলানুপট্ঠাকীনং অগ্গট্ঠানে ঠপেসীতি অগণিতত্তদুক্খা গিলানানং ভিক্খূনং গেলঞ্ঞৱূপসমনে যুত্তপ্পযুত্তাতি গিলানুপট্ঠাকীনং অগ্গট্ঠানে ঠপেসীতি.

কাতিযানীৱত্থু

২৬৫. অট্ঠমে অৱেচ্চপ্পসন্নানন্তি ৰতনত্তযগুণে যাথাৱতো ঞত্ৱা পসন্নানং, সো পনস্স পসাদো মগ্গেনাগতত্তা কেনচি অকম্পনীযো. অধিগতেনাতি মগ্গাধিগমেনেৱ অধিগতেন. ‘‘অৱিগতেনা’’তি ৱা পাঠো, তস্সত্থো ‘‘কদাচি অৱিগচ্ছন্তেনা’’তি. সো অপ্পধংসিযো চ হোতি, তস্মা ৱুত্তং – ‘‘অধিগতেন অচলপ্পসাদেনা’’তি. তত্থ কাযসক্খিং কত্ৱাতি পমুখং কত্ৱা, ৱচনত্থতো পন নামকাযেন দেসনায সম্পটিচ্ছনৱসেন সক্খিভূতং কত্ৱাতি অত্থো. উম্মগ্গং খনিত্ৱাতি ঘৰসন্ধিচ্ছেদনেন অন্তোপৱিসনমগ্গং খনিত্ৱা. দুল্লভস্সৱনন্তি দুল্লভসদ্ধম্মস্সৱনং. মহাপথৱী পৱিসিতব্বা ভৱেয্যাতি অৱীচিপ্পৱেসনং ৱদতি.

নকুলমাতাৱত্থু

২৬৬. নৱমে ৱিস্সাসকথনেনেৱ নকুলমাতা নকুলপিতা চ সত্থুৱিস্সাসিকা নাম জাতাতি ৱুত্তং – ‘‘ৱিস্সাসিকানন্তি ৱিস্সাসকথং কথেন্তীনং উপাসিকান’’ন্তি. গহপতানীতি গেহসামিনী. ৱুত্তমেৱাতি উপাসকপাড়িযং নকুলপিতুকথাযং ৱুত্তনযমেৱ.

কাড়ীকুৰৰঘৰিকাৱত্থু

২৬৭. দসমে অনুস্সৱেনেৱাতি পচ্চক্খতো ৰূপদস্সনেন সত্থু সম্মুখা ধম্মস্সৱনেন চ ৱিনা কেৱলং অনুস্সৱনেনেৱ পৰস্স ৱচনং অনুগতস্সৱনেনেৱ উপ্পন্নেন পসাদেন. অনুস্সৱিকপ্পসাদন্তি অনুস্সৱতো আগতপ্পসাদং.

(সত্তমএতদগ্গৱগ্গৱণ্ণনা নিট্ঠিতা.)

উপাসিকাপাড়িসংৱণ্ণনা সমত্তা.

নিট্ঠিতা চ মনোৰথপূৰণিযা

অঙ্গুত্তৰনিকায-অট্ঠকথায

এতদগ্গৱগ্গৱণ্ণনায অনুত্তানত্থদীপনা.