১৪. এতদগ্গৱগ্গো

(১৪) ৬. ছট্ঠএতদগ্গৱগ্গৱণ্ণনা

তপুস্স-ভল্লিকৱত্থু

২৪৮. উপাসকপাড়িসংৱণ্ণনায পঠমে সব্বপঠমং সৰণং গচ্ছন্তানন্তি সব্বেসং পঠমং হুত্ৱা সৰণং গচ্ছন্তানং. ইতো পৰন্তি সত্তসত্তাহতো পৰং. গমনূপচ্ছেদং অকাসীতি গমনৱিচ্ছেদং অকাসি. যথা তে গোণা ধুৰং ছড্ডেত্ৱা পোথিযমানাপি ন গচ্ছন্তি, তথা অকাসীতি অত্থো. তেসন্তি তপুস্সভল্লিকানং. অধিমুচ্চিত্ৱাতি আৱিসিত্ৱা. যক্খস্স আৱট্টো যক্খাৱট্টো. এৱং সেসেসুপি. অতীতবুদ্ধানং আচিণ্ণং ওলোকেসীতি অতীতবুদ্ধা কেন ভাজনেন পটিগ্গণ্হিংসূতি বুদ্ধাচিণ্ণং ওলোকেসি. দ্ৱেৱাচিকে সৰণে পতিট্ঠাযাতি সঙ্ঘস্স অনুপ্পন্নত্তা বুদ্ধধম্মৱসেন দ্ৱেৱাচিকে সৰণে পতিট্ঠহিত্ৱা. চেতিযন্তি পূজনীযৱত্থুং. জীৱকেসধাতুযাতি জীৱমানস্স ভগৱতো কেসধাতুযা.

অনাথপিণ্ডিকসেট্ঠিৱত্থু

২৪৯. দুতিযে তেনেৱ গুণেনাতি তেনেৱ দাযকভাৱসঙ্খাতেন গুণেন. সো হি সব্বকামসমিদ্ধতায ৱিগতমচ্ছেৰতায কৰুণাদিগুণসমঙ্গিতায চ নিচ্চকালং অনাথানং পিণ্ডমদাসি. তেন সব্বকালং উপট্ঠিতো অনাথানং পিণ্ডো এতস্স অত্থীতি অনাথপিণ্ডিকোতি সঙ্খং গতো. যোজনিকৱিহাৰে কাৰেত্ৱাতি যোজনে যোজনে একমেকং ৱিহাৰং কাৰেত্ৱা. ‘‘এৱৰূপং দানং পৱত্তেসী’’তি ৱত্ৱা তমেৱ দানং ৱিভজিত্ৱা দস্সেন্তো ‘‘দেৱসিকং পঞ্চ সলাকভত্তানি হোন্তী’’তিআদিমাহ. তত্থ সলাকায গাহেতব্বং ভত্তং সলাকভত্তং. একস্মিং পক্খে একদিৱসং দাতব্বং ভত্তং পক্খিকভত্তং. ধুৰগেহে ঠপেত্ৱা দাতব্বং ভত্তং ধুৰভত্তং. আগন্তুকানং দাতব্বং ভত্তং আগন্তুকভত্তং. এৱং সেসেসুপি. পঞ্চ আসনসতানি গেহে নিচ্চপঞ্ঞত্তানেৱ হোন্তীতি গেহে নিসীদাপেত্ৱা ভুঞ্জন্তানং পঞ্চন্নং ভিক্খুসতানং পঞ্চ আসনসতানি নিচ্চপঞ্ঞত্তানি হোন্তি.

চিত্তগহপতিৱত্থু

২৫০. ততিযে মিগা এৱ মিগৰূপানি. ভিক্খং সমাদাপেত্ৱাতি, ‘‘ভন্তে, ময্হং অনুগ্গহং কৰোথ, ইধ নিসীদিত্ৱা ভিক্খং গণ্হথা’’তি ভিক্খাগহণত্থং সমাদাপেত্ৱা. ৱিৱট্টং উদ্দিস্স উপচিতং নিব্বেধভাগিযকুসলং উপনিস্সযো. সড়াযতনৱিভত্তিমেৱ দেসেসীতি সড়াযতনৱিভাগপ্পটিসংযুত্তমেৱ ধম্মকথং কথেসি. থেৰেনাতি তত্থ সন্নিহিতানং সব্বেসং জেট্ঠেন মহাথেৰেন. পঞ্হং ৱিস্সজ্জেতুং অসক্কোন্তেনাতি চিত্তেন গহপতিনা ‘‘যা ইমা, ভন্তে থেৰ, অনেকৱিহিতা দিট্ঠিযো লোকে উপ্পজ্জন্তি, ‘সস্সতো লোকো’তি ৱা, ‘অসস্সতো লোকো’তি ৱা, ‘অন্তৱা লোকো’তি ৱা, ‘অনন্তৱা লোকো’তি ৱা, ‘তং জীৱং তং সৰীৰ’ন্তি ৱা, ‘অঞ্ঞং জীৱং অঞ্ঞং সৰীৰ’ন্তি ৱা, ‘হোতি তথাগতো পৰং মৰণা’তি ৱা, ‘ন হোতি তথাগতো পৰং মৰণা’তি ৱা, ‘হোতি চ ন হোতি চ তথাগতো পৰং মৰণা’তি ৱা, ‘নেৱ হোতি ন ন হোতি তথাগতো পৰং মৰণা’তি ৱা যানি চিমানি দ্ৱাসট্ঠি দিট্ঠিগতানি ব্ৰহ্মজালে গণিতানি, ইমা নু খো, ভন্তে, দিট্ঠিযো কিস্মিং সতি হোন্তি, কিস্মিং অসতি ন হোন্তী’’তি এৱমাদিনা (সং. নি. ৪.৩৪৫) পঞ্হে পুট্ঠে তং পঞ্হং ৱিস্সজ্জেতুং অসক্কোন্তেন. ইমং কিৰ পঞ্হং যাৱততিযং পুট্ঠো মহাথেৰো তুণ্হী অহোসি. অথ ইসিদত্তত্থেৰো চিন্তেসি – ‘‘অযং থেৰো নেৱ অত্তনা ব্যাকৰোতি, ন অঞ্ঞং অজ্ঝেসতি, উপাসকো চ ভিক্খুসঙ্ঘং ৱিহেসতি, অহমেতং ব্যাকৰিত্ৱা ফাসুৱিহাৰং কত্ৱা দস্সামী’’তি. এৱং চিন্তেত্ৱা চ আসনতো ৱুট্ঠায থেৰস্স সন্তিকং গন্ত্ৱা ‘‘ব্যাকৰোমহং, ভন্তে, চিত্তস্স গহপতিনো এতং পঞ্হ’’ন্তি (সং. নি. ৪.৩৪৫) আহ. এৱং ৱুত্তে থেৰো ‘‘ব্যাকৰোহি ত্ৱং, আৱুসো ইসিদত্ত, চিত্তস্স গহপতিনো এতং পঞ্হ’’ন্তি ইসিদত্তং অজ্ঝেসি. তেন ৱুত্তং – ‘‘পঞ্হং ৱিস্সজ্জেতুং অসক্কোন্তেন অজ্ঝিট্ঠো’’তি.

পঞ্হং ৱিস্সজ্জেত্ৱাতি ‘‘যা ইমা, গহপতি, অনেকৱিহিতা দিট্ঠিযো লোকে উপ্পজ্জন্তি ‘সস্সতো লোকো’তি ৱা, ‘অসস্সতো লোকো’তি ৱা…পে… যানি চিমানি দ্ৱাসট্ঠি দিট্ঠিগতানি ব্ৰহ্মজালে গণিতানি, ইমা খো, গহপতি, দিট্ঠিযো সক্কাযদিট্ঠিযা সতি হোন্তি, সক্কাযদিট্ঠিযা অসতি ন হোন্তী’’তিআদিনা নযেন পঞ্হং ৱিস্সজ্জেত্ৱা. গিহিসহাযকভাৱে ঞাতেতি থেৰস্স গিহিসহাযকভাৱে চিত্তেন গহপতিনা ঞাতে. চিত্তো কিৰ, গহপতি, তস্স পঞ্হৱেয্যাকৰণে তুট্ঠো ‘‘কুতো, ভন্তে, অয্যো ইসিদত্তো আগচ্ছতী’’তি ৱত্ৱা ‘‘অৱন্তিযা খো অহং, গহপতি, আগচ্ছামী’’তি ৱুত্তো ‘‘অত্থি, ভন্তে, অৱন্তিযা ইসিদত্তো নাম কুলপুত্তো অম্হাকং অদিট্ঠসহাযো পব্বজিতো, দিট্ঠো সো আযস্মতা’’তি পুচ্ছি. থেৰো চ ‘‘এৱং, গহপতী’’তি ৱত্ৱা ‘‘কহং নু খো, ভন্তে, সো আযস্মা এতৰহি ৱিহৰতী’’তি পুন পুট্ঠো তুণ্হী অহোসি. অথ চিত্তো গহপতি ‘‘অয্যো নো, ভন্তে, ইসিদত্তো’’তি পুচ্ছিত্ৱা ‘‘এৱং, গহপতী’’তি ৱুত্তে অত্তনো গিহিসহাযভাৱং অঞ্ঞাসি.

তেজোসমাপত্তিপাটিহাৰিযং দস্সেত্ৱাতি একস্মিং কিৰ দিৱসে চিত্তো গহপতি ‘‘সাধু মে, ভন্তে, অয্যো উত্তৰিমনুস্সধম্মা ইদ্ধিপাটিহাৰিযং দস্সেতূ’’তি মহাথেৰং যাচি. থেৰো ‘‘তেন হি ত্ৱং, গহপতি, আড়িন্দে উত্তৰাসঙ্গং পঞ্ঞাপেত্ৱা তত্থ তিণকলাপং ওকিৰা’’তি ৱত্ৱা তেন চ তথা কতে সযং ৱিহাৰং পৱিসিত্ৱা চ ঘটিকং দত্ৱা তথাৰূপং ইদ্ধাভিসঙ্খাৰং অভিসঙ্খাৰেসি, যথা তাড়চ্ছিগ্গড়েন চ অগ্গড়ন্তৰিকায চ অচ্চি নিক্খমিত্ৱা তিণানি ঝাপেতি, উত্তৰাসঙ্গং ন ঝাপেতি. অথ চিত্তো গহপতি উত্তৰাসঙ্গং পপ্ফোটেত্ৱা সংৱিগ্গো লোমহট্ঠজাতো একমন্তং ঠিতো থেৰং বহি নিক্খমন্তং দিস্ৱা ‘‘অভিৰমতু, ভন্তে, অয্যো মচ্ছিকাসণ্ডে, ৰমণীযং অম্বাটকৱনং, অহং অয্যস্স উস্সুক্কং কৰিস্সামি চীৱৰপিণ্ডপাতসেনাসনগিলানপচ্চযভেসজ্জপৰিক্খাৰান’’ন্তি আহ. ততো থেৰো ‘‘ন দানি ইধ ৱসিতুং সক্কা’’তি তম্হা ৱিহাৰা পক্কামি. তং সন্ধাযেতং ৱুত্তং – ‘‘তেজোসমাপত্তি পাটিহাৰিযং দস্সেত্ৱা ‘ইদানি ইধ ৱসিতুং ন যুত্ত’ন্তি যথাসুখং পক্কামী’’তি. দ্ৱে অগ্গসাৱকাতিআদীসু যং ৱত্তব্বং, তং ৱিত্থাৰতো ৱিনযপাড়িযং আগতমেৱ.

সদ্ধোতি লোকিযলোকুত্তৰায সদ্ধায সমন্নাগতো. সীলেনাতি অগাৰিযসীলং অনগাৰিযসীলন্তি দুৱিধং সীলং, তেসু ইধ অগাৰিযং সীলং অধিপ্পেতং, তেন সমন্নাগতোতি অত্থো. যসোভোগসমপ্পিতোতি যাদিসো অনাথপিণ্ডিকাদীনং পঞ্চউপাসকসতপৰিৱাৰসঙ্খাতো অগাৰিযো যসো, তাদিসেনেৱ যসেন, যো চ ধনধঞ্ঞাদিকো চেৱ সত্তৱিধঅৰিযধনসঙ্খাতো চাতি দুৱিধো ভোগো, তেন চ সমন্নাগতোতি অত্থো. যং যং পদেসন্তি পুৰত্থিমাদীসু দিসাসু এৱৰূপো কুলপুত্তো যং যং পদেসং ভজতি, তত্থ তত্থ এৱৰূপেন লাভসক্কাৰেন পূজিতোৱ হোতীতি অত্থো.

হত্থকআড়ৱকৱত্থু

২৫১. চতুত্থে চতুব্বিধেন সঙ্গহৱত্থুনাতি দানপিযৱচনঅত্থচৰিযাসমানত্ততাসঙ্খাতেন চতুব্বিধেন সঙ্গহৱত্থুনা. ‘‘স্ৱে ভত্তচাটিযা সদ্ধিং আড়ৱকস্স পেসেতব্বো অহোসী’’তি ৱুত্তমত্থং পাকটং কত্ৱা দস্সেতুং – ‘‘তত্ৰাযং অনুপুব্বিকথা’’তিআদিমাহ. মিগৱত্থায অৰঞ্ঞং গন্ত্ৱাতি আড়ৱকো ৰাজা ৱিৱিধনাটকূপভোগং ছড্ডেত্ৱা চোৰপ্পটিবাহনত্থঞ্চ পটিৰাজনিসেধনত্থঞ্চ ব্যাযামকৰণত্থঞ্চ সত্তমে সত্তমে দিৱসে মিগৱং গচ্ছন্তো একদিৱসং বলকাযেন সদ্ধিং ‘‘যস্স পস্সেন মিগো পলাযতি, তস্সেৱ সো ভাৰো’’তি কতকতিকৱত্তো মিগৱত্থায অৰঞ্ঞং গন্ত্ৱা. একং মিগন্তি অত্তনো ঠিতট্ঠানেন পলাতং এণিমিগং. অনুবন্ধিত্ৱাতি তিযোজনমগ্গং এককোৱ অনুবন্ধিত্ৱা. জৱসম্পন্নো হি ৰাজা ধনুং গহেত্ৱা পত্তিকোৱ তিযোজনং তং মিগমনুবন্ধি. ঘাতেত্ৱাতি যস্মা এণিমিগা তিযোজনৱেগা এৱ হোন্তি, তস্মা পৰিক্খিণজৱং তং মিগং উদকং পৱিসিত্ৱা ঠিতং ঘাতেত্ৱা. দ্ৱিধা ছেত্ৱা ধনুকোটিযং লগেত্ৱা নিৱত্তেত্ৱা আগচ্ছন্তোতি অনত্থিকোপি মংসেন ‘‘নাসক্খি মিগং গহেতু’’ন্তি অপৱাদমোচনত্থং দ্ৱিধা ছিন্নং ধনুকোটিযং লগেত্ৱা আগচ্ছন্তো. সন্দচ্ছাযন্তি ঘনচ্ছাযং বহলপত্তপলাসং.

ৰুক্খে অধিৱত্থা দেৱতাতি আড়ৱকং যক্খং সন্ধায ৱদতি. সো হি মহাৰাজূনং সন্তিকা ৱৰং লভিত্ৱা মজ্ঝন্হিকসমযে তস্স ৰুক্খস্স ছাযায ফুট্ঠোকাসং পৱিট্ঠে পাণিনো খাদন্তো তত্থ পটিৱসতি. আড়ৱকস্স নিসীদনপল্লঙ্কে নিসীদীতি যত্থ অভিলক্খিতেসু মঙ্গলদিৱসাদীসু আড়ৱকো নিসীদিত্ৱা সিৰিং অনুভোতি, তস্মিংযেৱ দিব্বৰতনপল্লঙ্কে নিসীদি. অত্তনো গমনে অসম্পজ্জমানে ‘‘কিং নু খো কাৰণ’’ন্তি আৱজ্জেন্তাতি তদা কিৰ সাতাগিৰহেমৱতা ভগৱন্তং জেতৱনেযেৱ ৱন্দিত্ৱা ‘‘যক্খসমাগমং গমিস্সামা’’তি সপৰিৱাৰা নানাযানেহি আকাসেন গচ্ছন্তি, আকাসে চ যক্খানং ন সব্বত্থ মগ্গো অত্থি, আকাসট্ঠানি ৱিমানানি পৰিহৰিত্ৱা মগ্গট্ঠানেনেৱ মগ্গো হোতি, আড়ৱকস্স পন ৱিমানং ভূমট্ঠং সুগুত্তং পাকাৰপৰিক্খিত্তং সুসংৱিহিতদ্ৱাৰট্টালকগোপুৰং উপৰি কংসজালসঞ্ছন্নমঞ্জূসাসদিসং তিযোজনং উব্বেধেন, তস্স উপৰি মগ্গো হোতি, তে তং পদেসমাগম্ম গন্তুমসমত্থা অহেসুং. বুদ্ধানঞ্হি নিসিন্নোকাসস্স উপৰিভাগেন যাৱ ভৱগ্গা কোচি গন্তুমসমত্থো, তস্মা অত্তনো গমনে অসম্পজ্জমানে ‘‘কিং নু খো কাৰণ’’ন্তি আৱজ্জেসুং. তেসং কথং সুত্ৱা চিন্তেসীতি যস্মা অস্সদ্ধস্স সদ্ধাকথা দুক্কথা হোতি দুস্সীলাদীনং সীলকথাদযো ৱিয, তস্মা তেসং যক্খানং সন্তিকা ভগৱতো পসংসং সুত্ৱা এৱ অগ্গিম্হি পক্খিত্তলোণসক্খৰা ৱিয অব্ভন্তৰে উপ্পন্নকোপেন পটপটাযমানহদযো হুত্ৱা চিন্তেসি. পব্বতকূটন্তি কেলাসপব্বতকূটং.

ইতো পট্ঠায আড়ৱকযুদ্ধং ৱিত্থাৰেতব্বন্তি সো কিৰ মনোসিলাতলে ৱামপাদেন ঠত্ৱা ‘‘পস্সথ দানি তুম্হাকং ৱা সত্থা মহানুভাৱো, অহং ৱা’’তি দক্খিণপাদেন সট্ঠিযোজনমত্তং কেলাসকূটপব্বতং অক্কমি, তং অযোকূটপ্পহতো ৱিয নিদ্ধন্তঅযপিণ্ডো পপটিকাযো মুঞ্চি. সো তত্ৰ ঠত্ৱা ‘‘অহং আড়ৱকো’’তি উগ্ঘোসেসি, সকলজম্বুদীপং সদ্দো ফৰি. তিযোজনসহস্সৱিত্থতহিমৱাপি সম্পকম্পি যক্খস্সানুভাৱেন. সো ৱাতমণ্ডলং সমুট্ঠাপেসি ‘‘এতেনেৱ সমণং পলাপেস্সামী’’তি. তে পুৰত্থিমাদিভেদা ৱাতা সমুট্ঠহিত্ৱা অড্ঢযোজনযোজনদ্ৱিযোজনতিযোজনপ্পমাণানি পব্বতকূটানি পদালেত্ৱা ৱনগচ্ছৰুক্খাদীনি উম্মূলেত্ৱা আড়ৱিনগৰং পক্খন্দা জিণ্ণহত্থিসালাদীনি চুণ্ণেন্তা ছদনিট্ঠকা আকাসে ভমেন্তা. ভগৱা ‘‘মা কস্সচি উপৰোধো হোতূ’’তি অধিট্ঠাসি. তে ৱাতা দসবলং পত্ৱা চীৱৰকণ্ণমত্তম্পি চালেতুং নাসক্খিংসু. ততো মহাৱস্সং সমুট্ঠাপেসি ‘‘উদকেন অজ্ঝোত্থৰিত্ৱা সমণং মাৰেস্সামী’’তি. তস্সানুভাৱেন উপৰূপৰি সতপটলসহস্সপটলাদিভেদা ৱলাহকা উট্ঠহিত্ৱা পৱস্সিংসু. ৱুট্ঠিধাৰাৱেগেন পথৱী ছিদ্দা অহোসি. ৱনৰুক্খাদীনং উপৰি মহোঘো আগন্ত্ৱা দসবলস্স চীৱৰে উস্সাৱবিন্দুমত্তম্পি তেমেতুং নাসক্খি. ততো পাসাণৱস্সং সমুট্ঠাপেসি. মহন্তানি মহন্তানি পব্বতকূটানি ধূমাযন্তানি পজ্জলন্তানি আকাসেনাগন্ত্ৱা দসবলং পত্ৱা দিব্বমালাগুড়ানি সম্পজ্জিংসু. ততো পহৰণৱস্সং সমুট্ঠাপেসি. একতোধাৰা উভতোধাৰা অসিসত্তিখুৰপ্পাদযো ধূমাযন্তা পজ্জলন্তা আকাসেনাগন্ত্ৱা দসবলস্স পাদমূলে দিব্বপুপ্ফানি অহেসুং.

ততো অঙ্গাৰৱস্সং সমুট্ঠাপেসি. কিংসুকৱণ্ণা অঙ্গাৰা আকাসেনাগন্ত্ৱা দসবলস্স পাদমূলে দিব্বপুপ্ফানি হুত্ৱা ৱিকিৰিংসু. ততো কুক্কুড়ৱস্সং সমুট্ঠাপেসি. অচ্চুণ্হো কুক্কুড়ো আকাসেনাগন্ত্ৱা দসবলস্স পাদমূলে চন্দনচুণ্ণং হুত্ৱা নিপতি. ততো ৱালিকৱস্সং সমুট্ঠাপেসি. অতিসুখুমা ৱালিকা ধূমাযন্তা পজ্জলন্তা আকাসেনাগন্ত্ৱা দসবলস্স পাদমূলে দিব্বপুপ্ফানি হুত্ৱা নিপতিংসু. ততো কললৱস্সং সমুট্ঠাপেসি. তং ধূমাযন্তং পজ্জলন্তং আকাসেনাগন্ত্ৱা দসবলস্স পাদমূলে দিব্বগন্ধং হুত্ৱা নিপতি. ততো অন্ধকাৰং সমুট্ঠাপেসি ‘‘ভিংসেত্ৱা সমণং পলাপেস্সামী’’তি. চতুৰঙ্গসমন্নাগতং অন্ধকাৰসদিসং হুত্ৱা দসবলং পত্ৱা সূৰিযপ্পভাৱিহতমিৱন্ধকাৰং অন্তৰধাযি. এৱং যক্খো ইমাহি নৱহি ৱাতৱস্সপাসাণপহৰণঙ্গাৰকুক্কুড়ৱালিককললন্ধকাৰৱুট্ঠীহি ভগৱন্তং পলাপেতুমসক্কোন্তো নানাৱিধপ্পহৰণহত্থঅনেকপ্পকাৰৰূপভূতগণসমাকুলায চতুৰঙ্গিনিযা সেনায সযমেৱ ভগৱন্তং অভিগতো. তে ভূতগণা অনেকপ্পকাৰৱিকাৰে কত্ৱা ‘‘গণ্হথ হনথা’’তি ভগৱতো উপৰি আগচ্ছন্তা ৱিয চ হোন্তি. অপিচ খো নিদ্ধন্তলোহপিণ্ডং ৱিয মক্খিকা ভগৱন্তং অল্লীযিতুমসমত্থা এৱ অহেসুং.

এৱং সব্বৰত্তিং অনেকপ্পকাৰৱিভিংসাকাৰদস্সনেনপি ভগৱন্তং চালেতুমসক্কোন্তো আড়ৱকো চিন্তেসি – ‘‘যংনূনাহং কেনচি অজেয্যং দুস্সাৱুধং মুঞ্চেয্য’’ন্তি. সচে হি সো দুট্ঠো আকাসে তং দুস্সাৱুধং মুঞ্চেয্য, দ্ৱাদস ৱস্সানি দেৱো ন ৱস্সেয্য. সচে পথৱিযং মুঞ্চেয্য, সব্বৰুক্খতিণাদীনি সুস্সিত্ৱা দ্ৱাদসৱস্সন্তৰং ন পুন ৰুহেয্যুং. সচে সমুদ্দে মুঞ্চেয্য, তত্তকপালে উদকবিন্দু ৱিয সব্বং সুস্সেয্য. সচে সিনেৰুপব্বতে মুঞ্চেয্য, খণ্ডাখণ্ডং হুত্ৱা ৱিকিৰেয্য. সো এৱংমহানুভাৱং দুস্সাৱুধং উত্তৰিসাটকং মুঞ্চিত্ৱা অগ্গহেসি. যেভুয্যেন দসসহস্সিলোকধাতুদেৱতা ৱেগেন সন্নিপতিংসু ‘‘অজ্জ ভগৱা আড়ৱকং দমেস্সতি, তত্থ ধম্মং সোস্সামা’’তি. যুদ্ধদস্সনকামাপি দেৱতা সন্নিপতিংসু. এৱং সকলম্পি আকাসং দেৱতাহি পৰিপুণ্ণং অহোসি. অথাড়ৱকো ভগৱতো সমীপে উপৰূপৰি ৱিচৰিত্ৱা ৱত্থাৱুধং মুঞ্চি. তং অসনিচক্কং ৱিয আকাসে ভেৰৱসদ্দং কৰোন্তং ধূমাযন্তং পজ্জলন্তং ভগৱন্তং পত্ৱা যক্খস্স মানমদ্দনত্থং পাদপুঞ্ছনচোড়ং হুত্ৱা পাদমূলে নিপতি. আড়ৱকো তং দিস্ৱা ছিন্নৱিসাণো ৱিয উসভো, উদ্ধটদাঠো ৱিয সপ্পো নিত্তেজো নিম্মদো নিপাতিতমানদ্ধজো অহোসি. এৱমিদং আড়ৱকযুদ্ধং ৱিত্থাৰেতব্বং.

অট্ঠ পঞ্হে পুচ্ছীতি –

‘‘কিং সূধ ৱিত্তং পুৰিসস্স সেট্ঠং,

কিং সু সুচিণ্ণং সুখমাৱহাতি;

কিং সু হৱে সাদুতৰং ৰসানং,

কথং জীৱিং জীৱিতমাহু সেট্ঠ’’ন্তি. (সং. নি. ১.২৪৬; সু. নি. ১৮৩) –

আদিনা অট্ঠ পঞ্হে পুচ্ছি. সত্থা ৱিস্সজ্জেসীতি –

‘‘সদ্ধীধ ৱিত্তং পুৰিসস্স সেট্ঠং,

ধম্মো সুচিণ্ণো সুখমাৱহাতি;

সচ্চং হৱে সাদুতৰং ৰসানং,

পঞ্ঞাজীৱিং জীৱিতমাহু সেট্ঠ’’ন্তি. (সং. নি. ১.২৪৬; সু. নি. ১৮৪) –

আদিনা ৱিস্সজ্জেসি. ৱিক্কন্দমানাযাতি অচ্চন্তং পৰিদেৱমানায.

মহানামসক্কৱত্থু

২৫২. পঞ্চমে সত্থা ততো পৰং পটিঞ্ঞং নাদাসীতি সংৱচ্ছৰতো পৰং সিক্খাপদপঞ্ঞত্তিযা পচ্চযপ্পৱাৰণাসাদিযনস্স ৱাৰিতত্তা ‘‘পটিঞ্ঞং নাদাসী’’তি ৱুত্তং. তথা হি ভগৱা ততিযৱাৰেপি মহানামেন সক্কেন ‘‘ইচ্ছামহং, ভন্তে, সঙ্ঘং যাৱজীৱং ভেসজ্জেন পৱাৰেতু’’ন্তি (পাচি. ৩০৪-৩০৫) ৱুত্তে ‘‘সাধু সাধু, মহানাম, তেন হি ত্ৱং, মহানাম, সঙ্ঘং যাৱজীৱং ভেসজ্জেন পৱাৰেহী’’তি পটিঞ্ঞং অদাসিযেৱ. এৱং পটিঞ্ঞং দত্ৱা পচ্ছা ছব্বগ্গিযেহি ভিক্খূহি মহানামস্স সক্কস্স ৱিহেঠিতভাৱং সুত্ৱা ছব্বগ্গিযে ভিক্খূ ৱিগৰহিত্ৱা সিক্খাপদং পঞ্ঞপেসি ‘‘অগিলানেন ভিক্খুনা চাতুমাসপ্পচ্চযপৱাৰণা সাদিতব্বা অঞ্ঞত্ৰ পুনপ্পৱাৰণায অঞ্ঞত্ৰ নিচ্চপ্পৱাৰণায. ততো চে উত্তৰি সাদিযেয্য, পাচিত্তিয’’ন্তি. তস্মা পঠমং অনুজানিত্ৱাপি পচ্ছা সিক্খাপদবন্ধনেন ৱাৰিতত্তা ‘‘পটিঞ্ঞং নাদাসী’’তি ৱুত্তং.

উগ্গগহপত্যাদিৱত্থু

২৫৩-২৫৬. ছট্ঠসত্তমঅট্ঠমনৱমানি সুৱিঞ্ঞেয্যানেৱ.

নকুলপিতুগহপতিৱত্থু

২৫৭. দসমে সুসুমাৰগিৰিনগৰেতি এৱংনামকে নগৰে. তস্স কিৰ নগৰস্স ৱত্থুপৰিগ্গহদিৱসে অৱিদূৰে উদকৰহদে সুসুমাৰো সদ্দমকাসি, গিৰং নিচ্ছাৰেসি. অথ নগৰে অনন্তৰাযেন মাপিতে তমেৱ সুসুমাৰগিৰকৰণং সুভনিমিত্তং কত্ৱা ‘‘সুসুমাৰগিৰী’’ত্ৱেৱস্স নামং অকংসু. কেচি পন ‘‘সুসুমাৰসণ্ঠানত্তা সুসুমাৰো নাম একো গিৰি, সো তস্স নগৰস্স সমীপে, তস্মা তং সুসুমাৰগিৰি এতস্স অত্থীতি সুসুমাৰগিৰীতি ৱুচ্চতী’’তি ৱদন্তি. ভেসকড়াৱনেতি ভেসকড়ানামকে ৱনে. ‘‘ভেসকলাৱনে’’তিপি পাঠো. কথং পন ভগৱতি নেসং পুত্তসঞ্ঞা পতিট্ঠাসীতি আহ – ‘‘অযং কিৰা’’তিআদি. দহৰস্সেৱ দহৰা আনীতাতি মে দহৰস্সেৱ সতো দহৰা আনীতাতি অত্থো. অতিচৰিতাতি অতিক্কমিত্ৱা চৰন্তো.

(ছট্ঠএতদগ্গৱগ্গৱণ্ণনা নিট্ঠিতা.)

উপাসকপাড়িসংৱণ্ণনা নিট্ঠিতা.