ততিযো পৰিচ্ছেদো

৩. ৱীথিসঙ্গহকথা

৮৫. চক্খুসোতঘানজিৱ্হা-কাযাযতন পঞ্চধা;

পসাদা হদযঞ্চেতি, ছ ৱত্থূনি ৱিনিদ্দিসে.

৮৬. চক্খুসোতঘানজিৱ্হা-কাযদ্ৱাৰা চ পঞ্চধা;

মনোদ্ৱাৰং ভৱঙ্গন্তি, ছ দ্ৱাৰা চিত্তৱীথিযা.

৮৭. ৰূপসদ্দগন্ধৰস-ফোট্ঠব্বা পঞ্চ গোচৰা;

ধম্মাৰম্মণপঞ্ঞত্তি, ছ দ্ৱাৰাৰম্মণক্কমা.

৮৮. নিমিত্তগতিকম্মানি, কম্মমেৱাথ গোচৰা;

পটিসন্ধিভৱঙ্গানং, চুতিযা চ যথাৰহং.

৮৯. মৰণাসন্নসত্তস্স, যথোপট্ঠিতগোচৰং;

ছদ্ৱাৰেসু তমাৰব্ভ, পটিসন্ধি ভৱন্তৰে.

৯০. একচিত্তক্খণা হোতি, যাৱজীৱং ততো পৰং;

ভৱঙ্গং পৰিযোসানে, চুতি চেকক্খণা ভৱে.

৯১. দুহেতাহেতুচুতিযা, কামাৱচৰসন্ধিযো;

তিহেতুকামচুতিযা, সব্বাপি পটিসন্ধিযো.

৯২. ৰূপাৱচৰচুতিযা, সহেতুপটিসন্ধিযো;

আৰুপ্পতোপৰি কামে, তত্থ ৱাপি তিহেতুকা.

৯৩. পটিসন্ধি ভৱঙ্গঞ্চ, একমেৱেকজাতিযং;

চুতি চাৰম্মণঞ্চস্স, এৱমেৱ যথাৰহং.

৯৪. ৰূপাদাৰম্মণে চক্খু-প্পসাদাদিম্হি ঘট্টিতে;

মজ্ঝে ভৱঙ্গং ছিন্দিত্ৱা, ৱীথি নাম পৱত্ততি.

৯৫. আৱজ্জপঞ্চৱিঞ্ঞাণসম্পটিচ্ছনতীৰণা;

ৱোট্ঠব্বকামজৱনতদাৰম্মণনামকা.

৯৬. সত্তেৱ ঠানসঙ্খেপা, পঞ্চদ্ৱাৰিকমানসা;

চতুপঞ্ঞাস সব্বেপি, ৱিত্থাৰেন সৰূপতো.

৯৭. আৱজ্জসব্বজৱনতদাৰম্মণনামকা;

সত্তসট্ঠি সৰূপেন, মনোদ্ৱাৰিকমানসা.

৯৮. ইট্ঠে আৰম্মণে হোন্তি, পুঞ্ঞপাকানি সব্বথা;

অনিট্ঠে পাপপাকানি, নিযমোযং পকাসিতো.

৯৯. তত্থাপি অতিইট্ঠম্হি, তদাৰম্মণতীৰণং;

সোমনস্সযুতং ইট্ঠমজ্ঝত্তম্হি উপেক্খিতং.

১০০. গোচৰেতিপৰিত্তম্হি, অতিঅপ্পাযুকে পন;

ভৱঙ্গমেৱ চলতি, মোঘৱাৰোতি সো কতো.

১০১. ৱোট্ঠব্বনং পৰিত্তম্হি, দ্ৱত্তিক্খত্তুং পৱত্ততি;

ততো ভৱঙ্গপাতোৱ, সোপি মোঘোতি ৱুচ্চতি.

১০২. জৱনঞ্চ মহন্তম্হি, জৱিত্ৱান ততো পৰং;

ন সম্ভোতি তদালম্বং, সোপি মোঘোতি ৱুচ্চতি.

১০৩. গোচৰেতিমহন্তম্হি, অতিদীঘাযুকে পন;

সম্ভোতি চ তদালম্বং, সম্পুণ্ণোতি পৱুচ্চতি.

১০৪. গোচৰেতিমহন্তম্হি, তদাৰম্মণসম্ভৱো;

পঞ্চদ্ৱাৰে মনোদ্ৱাৰে, ৱিভূতে পন গোচৰে.

১০৫. কামাৱচৰসত্তানং, কামাৱচৰগোচৰে;

পৰিত্তজৱনেস্ৱেৱ, তদাৰম্মণমুদ্দিসে.

১০৬. নাতিতিক্খে নাতিসীঘে, নাতিতেজুস্সদে জৱে;

সমমন্দপ্পৱত্তম্হি, তদাৰম্মণমিচ্ছিতং.

১০৭. সুখোপেতং তদালম্বং, উপেক্খাক্ৰিযতো পৰং;

ন হোতুপেক্খাসহিতং, সুখিতক্ৰিযতো তথা.

১০৮. ন হোতি দোমনস্সম্হা, সোমনস্সিকমানসং;

তদাৰম্মণমঞ্ঞঞ্চ, ভৱঙ্গং চুতি ৱা তথা.

১০৯. ৰজ্জনাদিৱসেনেত্থ, জৱনাকুসলং ভৱে;

কুসলং পন সম্ভোতি, সদ্ধাপঞ্ঞাদিসম্ভৱে.

১১০. তদেৱ ৱীতৰাগানং, ক্ৰিযা নাম পৱুচ্চতি;

অৱিপাকতমাপন্নং, ৱট্টমূলপৰিক্খযা.

১১১. অপ্পনাজৱনং সেসং, মহগ্গতমনুত্তৰং;

ছব্বীসতি যথাযোগং, অপ্পনাৱীথিযং ভৱে.

১১২. পৰিকম্মং কৰোন্তস্স, কসিণাদিকগোচৰে;

সুসমাহিতচিত্তস্স, উপচাৰসমাধিনা.

১১৩. পৰিকম্মোপচাৰানুলোমগোত্ৰভুতো পৰং;

পঞ্চমং ৱা চতুত্থং ৱা, জৱনং হোতি অপ্পনা.

১১৪. পুথুজ্জনান সেক্খানং, কামপুঞ্ঞতিহেতুতো;

তিহেতুকামক্ৰিযতো, ৱীতৰাগানমপ্পনা.

১১৫. তত্ৰাপি সুখিতজৱং, সুখিতদ্ৱযতো পৰং;

উপেক্খিতম্হা সম্ভোতি, উপেক্খেকগ্গতাযুতং.

১১৬. পঞ্চ ৱাৰে ছ ৱা সত্ত, পৰিত্তজৱনং ভৱে;

সকিং দ্ৱে ৱা তদালম্বং, সকিমাৱজ্জনাদযো.

১১৭. অপ্পনাজৱনঞ্চেকং, পঠমুপ্পত্তিযং পন;

ততো পৰং ৱসীভূতং, অহোৰত্তং পৱত্ততি.

১১৮. সকিং দ্ৱে ৱা নিৰোধস্স, সমাপত্তিক্খণে পন;

চতুত্থাৰুপ্পজৱনং, ততো চিত্তং নিৰুজ্ঝতি.

১১৯. নিৰোধা ৱুট্ঠহন্তস্স, উপৰিট্ঠফলদ্ৱযং;

পঞ্চাভিঞ্ঞা তথা মগ্গা, একচিত্তক্খণা মতা.

১২০. ফলমেকদ্ৱযং তথা, তিস্সো ৱা মগ্গৱীথিযং;

সমাপত্তিক্খণে তম্পি, অহোৰত্তং পৱত্ততি.

১২১. পঞ্চদ্ৱাৰে ন লব্ভন্তি, লোকুত্তৰমহগ্গতা;

ৱীথিমুত্তমনোধাতু, পঞ্চ চিত্তানি অন্তিমে.

১২২. পৰিত্তানেৱ সব্বানি, পঞ্চদ্ৱাৰেসু সম্ভৱা;

মনোদ্ৱাৰম্হি ৱোট্ঠব্ব-তদালম্বজৱা সিযুং.

১২৩. ঘানজিৱ্হাকাযৱীথি, তদাৰম্মণমেৱ চ;

ৰূপে নত্থি তথাৰূপে, চক্খুসোতাপি ৱীথিযো.

১২৪. সব্বাপি ৱীথিযো কামে,

ৰূপে তিস্সো পকাসিতা;

একা ৱীথি পনাৰূপে,

নত্থাসঞ্ঞীসু কাচিপি.

১২৫. সত্তাপি ৱীথিচিত্তানি, কামে ৰূপে ছ সম্ভৱা;

অৰূপে দ্ৱে মনোদ্ৱাৰা-ৱজ্জনং জৱনন্তি চাতি.

ইতি চিত্তৱিভাগে ৱীথিসঙ্গহকথা নিট্ঠিতা.

ততিযো পৰিচ্ছেদো.