চতুত্থো পৰিচ্ছেদো

৪. ৱীথিপৰিকম্মকথা

১২৬. পঠমাৱজ্জনং পঞ্চ-দসন্নং পৰতো ভৱে;

দুতিযাৱজ্জনং হোতি, একৱীসতিতো পৰং.

১২৭. একম্হা পঞ্চৱিঞ্ঞাণং, পঞ্চম্হা সম্পটিচ্ছনং;

সুখসন্তীৰণং হোতি, পঞ্চৱীসতিতো পৰং.

১২৮. সত্ততিংসতিতো হোতি, উপেক্খাতীৰণদ্ৱযং;

ৱোট্ঠব্বনসৰূপানং, দ্ৱিন্নং কামজৱা পৰং.

১২৯. মগ্গাভিঞ্ঞা পৰং দ্ৱিন্নং, তিণ্ণন্নং লোকিযপ্পনা;

ফলা চতুন্নং পঞ্চন্নং, উপৰিট্ঠফলদ্ৱযং.

১৩০. ভৱন্তি চত্তালীসম্হা, সুখপাকা দ্ৱিহেতুকা;

তথেকচত্তালীসম্হা, উপেক্খায সমাযুতা.

১৩১. হোন্তি সত্ততিতো কামে, সুখপাকা তিহেতুকা;

দ্ৱাসত্ততিম্হা জাযন্তি, উপেক্খাসহিতা পন.

১৩২. একূনসট্ঠিতো ৰূপ-পাকা পাকা অৰূপিনো;

কমাট্ঠচত্তালীসম্হা, তথেকদ্ৱিতিহীনতো.

১৩৩. পুব্বসঙ্গহমিচ্চেৱং, ৱিগণেত্ৱা ৱিচক্খণো;

পৰসঙ্গহসঙ্খ্যাদিং, ৱিভাৱেয্য ৱিসাৰদো.

১৩৪. পঞ্চদ্ৱাৰাৱজ্জনতো, দস চিত্তানি দীপযে;

সেসাৱজ্জনতো পঞ্চচত্তালীসন্তি ভাসিতং.

১৩৫. পঞ্চৱিঞ্ঞাণতো পাপৱিপাকা সম্পটিচ্ছনা;

পৰমেকং দ্ৱযং পুঞ্ঞৱিপাকা সম্পটিচ্ছনা.

১৩৬. সন্তীৰণা দ্ৱিহেতুম্হা, পাকা দ্ৱাদস জাযৰে;

তিহেতুকামপাকম্হা, একৱীসতি লব্ভৰে.

১৩৭. ৰূপাৱচৰপাকম্হা, পৰমেকূনৱীসতি;

নৱট্ঠাৰূপপাকম্হা, সত্ত ছাপি যথাক্কমং.

১৩৮. পটিঘম্হা তু সত্তেৱ, সিতম্হা তেৰসেৰিতা;

পাপপুঞ্ঞদ্ৱিহেতুম্হা, একৱীসতি ভাৱযে.

১৩৯. দ্ৱিহেতুকামক্ৰিযতো, অট্ঠাৰস উপেক্খকা;

সত্তৰস সুখোপেতা, ৱিভাৱেয্য ৱিচক্খণো.

১৪০. কামপুঞ্ঞতিহেতুম্হা, তেত্তিংসেৱ উপেক্খকা;

তেপঞ্ঞাস সুখোপেতা, ভৱন্তীতি পকাসিতং.

১৪১. তিহেতুকামক্ৰিযতো, চতুৱীসতিপেক্খকা;

সুখিতম্হা তু দীপেয্য, পঞ্চৱীসতি পণ্ডিতো.

১৪২. দসৰূপজৱম্হেকা-দসদ্ৱাদস তেৰস;

যথাক্কমং পঞ্চদস, আৰুপ্পা পৰিদীপযে.

১৪৩. ফলম্হা চুদ্দসেৱাহু, মগ্গম্হা তু সকং ফলং;

পৰং সঙ্গহমিচ্চেৱং, ৱিগণেয্য ৱিসাৰদো.

১৪৪. পুব্বাপৰসমোধান-মিতি ঞত্ৱা ততো পৰং;

ৱত্থুৱীথিসমোধানং, যথাসম্ভৱমুদ্দিসে.

১৪৫. পঞ্চ ৱত্থূনি নিস্সায, কমতো পঞ্চমানসা;

তেত্তিংস পন নিস্সায, হদযং মানসা সিযুং.

১৪৬. কামপাকমনোধাতু-হসিতুপ্পাদমানসা;

দোসমূলানি মগ্গো চ, ৰূপজ্ঝানাৱ সব্বথা.

১৪৭. দসাৱসেসাপুঞ্ঞানি, কামপুঞ্ঞমহাক্ৰিযা;

ৱোট্ঠব্বাৰূপজৱনং, সত্ত লোকুত্তৰানি চ.

১৪৮. দ্ৱেচত্তালীস চিত্তানি, পঞ্চৱোকাৰভূমিযং;

নিস্সায হদযং হোন্তি, অৰূপে নিস্সযং ৱিনা.

১৪৯. আৰুপ্পপাকা চত্তাৰো, অনিস্সাযেতি সব্বথা;

ৱিত্থাৰেনট্ঠধা ভিন্নং, সঙ্খেপা তিৱিধং ভৱে.

১৫০. তেচত্তালীস নিস্সায, অনিস্সায চতুব্বিধং;

নিস্সিতানিস্সিতা সেসা, দ্ৱেচত্তালীস মানসা.

১৫১. পঞ্চ চিত্তপ্পনা হোন্তি, কমেনেকেকৱীথিযং;

মনোধাতুত্তিকং নাম, পঞ্চদ্ৱাৰিকমীৰিতং.

১৫২. সুখতীৰণৱোট্ঠব্ব-পৰিত্তজৱনা পন;

একতিংসাপি জাযন্তে, ছসু ৱীথীসু সম্ভৱা.

১৫৩. মহাপাকা পনট্ঠাপি, উপেক্খাতীৰণদ্ৱযং;

ছসু দ্ৱাৰেসু জাযন্তি, দস মুত্তা চ ৱীথিযা.

১৫৪. চুতিসন্ধিভৱঙ্গানং, ৱসা পাকা মহগ্গতা;

নৱ ৱীথিৱিমুত্তাতি, দসধা ৱীথিসঙ্গহো.

১৫৫. একদ্ৱাৰিকচিত্তানি, পঞ্চছদ্ৱাৰিকা তথা;

ছদ্ৱাৰিকৱিমুত্তা চ, ৱিমুত্তাতি চ সব্বথা.

১৫৬. ছত্তিংস তযেকতিংস, দস চেৱ নৱেতি চ;

ঞত্ৱা ৱীথিসমোধানং, গোচৰঞ্চ সমুদ্দিসে.

১৫৭. কমতো পঞ্চৱিঞ্ঞাণা, লোকুত্তৰমহগ্গতা;

অভিঞ্ঞাৱজ্জিতা সব্বা, পঞ্চতালীস মানসা.

১৫৮. যথাসম্ভৱতো হোন্তি, ৰূপাদেকেকগোচৰা;

পঞ্চগোচৰমীৰেন্তি, মনোধাতুত্তিকং পন.

১৫৯. সন্তীৰণমহাপাকা, পৰিত্তজৱনানি চ;

ৱোট্ঠব্বনমভিঞ্ঞা চ, তেচত্তালীস সম্ভৱা.

১৬০. ছাৰম্মণেসু হোন্তীতি, অট্ঠধা তিৱিধা পুন;

একাৰম্মণচিত্তানি, পঞ্চছাৰম্মণানি চ.

১৬১. সঙ্খেপা মানসা পঞ্চ-চত্তালীস তযো তথা;

তেচত্তালীস চেৱেতি, সত্তধাপি সিযুং কথং.

১৬২. কামপাকমনোধাতু-হসিতুপ্পাদমানসা;

পঞ্চৱীস যথাযোগং, পৰিত্তাৰম্মণা মতা.

১৬৩. কসিণুগ্ঘাটিমাকাসং, পঠমাৰুপ্পমানসং;

তস্সেৱ নত্থিভাৱং তু, ততিযাৰুপ্পকং তথা.

১৬৪. আলম্বিত্ৱা পৱত্তন্তি, আৰুপ্পা কমতো ততো;

দুতিযঞ্চ চতুত্থঞ্চ, ছ মহগ্গতগোচৰা.

১৬৫. অপ্পমাণসমঞ্ঞা তে, নিব্বানে পন গোচৰে;

অট্ঠ লোকুত্তৰা ধম্মা, নিযমেন ৱৱত্থিতা.

১৬৬. কসিণাসুভকোট্ঠাসে,

আনাপানে চ যোগিনো;

পটিভাগনিমিত্তম্হি,

অপ্পমঞ্ঞানুযুঞ্জতো.

১৬৭. সত্তপণ্ণত্তিযঞ্চেৱ, ৰূপজ্ঝানং পৱত্ততি;

যথাৱুত্তনিমিত্তম্হি, সেসমাৰুপ্পকন্তি চ.

১৬৮. অভিঞ্ঞাৱজ্জিতা একৱীস মহগ্গতা সব্বা;

সব্বে পণ্ণত্তিসঙ্খাতে, নৱত্তব্বে পৱত্তৰে.

১৬৯. জাযন্তাকুসলা ঞাণৱিপ্পযুত্তজৱা তথা;

অপ্পমাণং ৱিনা ৱীস, পৰিত্তাদীসু তীসুপি.

১৭০. তিহেতুকামপুঞ্ঞানি, পুঞ্ঞাভিঞ্ঞা চ পঞ্চিমে;

চতূসুপি পৱত্তন্তি, অৰহত্তদ্ৱযং ৱিনা.

১৭১. ক্ৰিযাভিঞ্ঞা চ ৱোট্ঠব্বং, ক্ৰিযাকামে তিহেতুকা;

ছ সব্বত্থাপি হোন্তীতি, সত্তধা মানসা ঠিতা.

১৭২. একতিচ্চতুকোট্ঠাসগোচৰা তিৱিধা পন;

সমসট্ঠি তথা ৱীস, কমেনেকাদসেতি চ.

১৭৩. পঞ্চদ্ৱাৰেসু পঞ্চাপি, পচ্চুপ্পন্নাৱ গোচৰা;

তেকালিকা নৱত্তব্বা, মনোদ্ৱাৰে যথাৰহং.

১৭৪. অজ্ঝত্তা চ বহিদ্ধা চ, পঞ্চদ্ৱাৰেসু গোচৰা;

মনোদ্ৱাৰে নৱত্তব্বো, নত্থিভাৱোপি লব্ভতি.

১৭৫. পঞ্চদ্ৱাৰেসু পঞ্চন্ন-মেকমেকো চ গোচৰো;

ছাপি আৰম্মণা হোন্তি, মনোদ্ৱাৰম্হি সব্বথা.

১৭৬. পঞ্চদ্ৱাৰেসু গহিতং, তদঞ্ঞম্পি চ গোচৰং;

মনোদ্ৱাৰে ৱৱত্থানং, গচ্ছতীতি হি দেসিতং.

১৭৭. অতীতা ৱত্তমানা চ, সম্ভৱা কামসন্ধিযা;

ছদ্ৱাৰগহিতা হোন্তি, তিৱিধা তেপি গোচৰা.

১৭৮. কম্মনিমিত্তমেৱেকং, মনোদ্ৱাৰে উপট্ঠিতং;

নৱত্তব্বমতীতঞ্চ, ধম্মাৰম্মণসঙ্গহং.

১৭৯. আলম্বিত্ৱা যথাযোগং, পটিসন্ধিমহগ্গতা;

অন্তে চুতি ভৱে মজ্ঝে, ভৱঙ্গম্পি পৱত্ততীতি.

ইতি চিত্তৱিভাগে ৱীথিপৰিকম্মকথা নিট্ঠিতা.

চতুত্থো পৰিচ্ছেদো.