১৩. তেৰসমো পৰিচ্ছেদো

নিস্সন্দফলৱিভাগো

১৭৯২. ৱিপস্সনায নিস্সন্দমিতি ৱুত্তমিতো পৰং;

সচ্চানং পটিৱেধাদিং, পৱক্খামি যথাক্কমং.

১৭৯৩. পৰিঞ্ঞা চ পহানঞ্চ, সচ্ছিকিৰিযা চ ভাৱনা;

ইতি দুক্খাদিসচ্চেসু, কিচ্চমাহু চতুব্বিধং.

১৭৯৪. তং সব্বং মগ্গকালম্হি, কৰিস্সতি ততো পৰং;

পটিপস্সদ্ধকিচ্চত্তা, কতং হোতি ফলে কথং.

১৭৯৫. ছিন্নতালো ফলস্সেৱ, ছিন্নানুসযমূলকা;

খন্ধা নালমধিট্ঠানং, ৱিপল্লাসপৱত্তিযা.

১৭৯৬. অচ্চন্তপটিপক্খত্তা, চতুমগ্গপৱত্তিযা;

পৰং ক্লেসা ন জাযন্তি, দড্ঢবীজঙ্কুৰং যথা.

১৭৯৭. নিয্যানট্ঠৱিসেসেন, অঞ্ঞমঞ্ঞস্স পচ্চযো;

মগ্গোৱ মগ্গং ভাৱেতি, জাযমানোথ ৱা পুন.

১৭৯৮. মগ্গপ্পৱত্তিসন্তানে, ভাৱনাতি পৱুচ্চতি;

ৱত্তমানেন তং কিচ্চং, নিপ্ফাদিতমসেসতো.

১৭৯৯. ইতি তীণিপি সচ্চানি, কিচ্চতো পটিৱিজ্ঝতি;

নিব্বানং সচ্ছিকুব্বন্তো, মগ্গো একক্খণে সহ.

১৮০০. কিচ্চপ্পৱত্তিতো চেত্থ, পটিৱেধোতি ৱুচ্চতি;

তঞ্চ সাধেতি মগ্গোযং, নিয্যন্তো সন্তিগোচৰো.

১৮০১. পৰিচ্চজিত্ৱা সঙ্খাৰে, মগ্গস্সাৰব্ভ নিব্বুতিং,

নিয্যানমেৱ সচ্চেসু, কিচ্চসাধনমীৰিতং.

১৮০২. মগ্গো এৱ হি নিয্যাতি, সেসা তস্সোপকাৰকা;

অপ্পেন্তা ঝানধম্মা চ, বুজ্ঝন্তা বোধিপক্খিযা.

১৮০৩. তস্মা তস্সেৱ ৱুট্ঠানং, পকাসেন্তি ৱিসেসতো;

খন্ধেহি চ কিলেসেহি, ৱিমোক্খত্তযতো কথং.

১৮০৪. কত্ৱানাভিনিৱেসং তু, যত্থ তত্থ যথা তথা;

ভূমিধম্মং পৰিগ্গয্হ, ৱিপস্সিত্ৱা ততো পৰং.

১৮০৫. যতো কুতোচি ৱুট্ঠানং, যদি হোতি অনিচ্চতো;

হুত্ৱাধিমোক্খবহুলো, সদ্ধিন্দ্ৰিযৱিসেসতো.

১৮০৬. অনিমিত্তৱিমোক্খেন, নিয্যন্তো সত্তপুগ্গলো;

সদ্ধানুসাৰী পঠমে, মজ্ঝে সদ্ধাৱিমুত্তকো.

১৮০৭. অন্তে পঞ্ঞাৱিমুত্তোতি, তমীৰেন্তি তথাগতা;

সঙ্খাৰে দুক্খতো দিস্ৱা, ৱুট্ঠহন্তো স পুগ্গলো.

১৮০৮. পস্সদ্ধিবহুলো হুত্ৱা, সমাধিন্দ্ৰিযলাভতো;

তথেৱাপ্পণিহিতেন, নিয্যন্তো তিৱিধো ভৱে.

১৮০৯. অনত্ততো ৱুট্ঠহিত্ৱা, ৱেদবাহুল্যযোগতো;

সুঞ্ঞতেনাথ নিয্যন্তো, পঞ্ঞিন্দ্ৰিযৱিসেসতো.

১৮১০. ধম্মানুসাৰী পঠমে, দিট্ঠিপ্পত্তো ততো পৰং;

অন্তে পঞ্ঞাৱিমুত্তোতি, তম্পি দীপেন্তি পণ্ডিতা.

১৮১১. আনেঞ্জপাদকজ্ঝান-নামকাযৱিসেসতো;

সচ্ছিকত্ৱান নিব্বানং, মজ্ঝে ছ কাযসক্খিনো.

১৮১২. অৰূপতো চ মগ্গেন, আনেঞ্জেন চ ৰূপতো;

ৱিমুত্তো উভতোভাগ-ৱিমুত্তো অৰহা ভৱে.

১৮১৩. তিৱিমোক্খমুখীভূতা, ইতি ৱুট্ঠানসাধিকা;

সত্তপুগ্গলভেদঞ্চ, সম্পাদেতি ৱিপস্সনা.

১৮১৪. অধিমুচ্চতি সদ্ধা চ, যথাৱত্থুসভাৱতো;

ঞেয্যধম্মেসু সব্বত্থ, পঞ্ঞা চ পটিৱিজ্ঝতি.

১৮১৫. তস্মা সদ্ধা চ পঞ্ঞা চ, ৱত্থুনিচ্ছযলক্খণা;

ৱত্থুপ্পতিট্ঠিতা চাযং, তিলক্খণৱিপস্সনা.

১৮১৬. তস্মা সদ্ধাধুৰো যোগী, দিস্ৱোড়াৰিকলক্খণং;

ততো পৰমনত্তাতি, সুখুমে অধিমুচ্চতি.

১৮১৭. তস্সেৱমধিমুত্তস্স, সদ্ধা ৱা পন কেৱলা;

সমাধিন্দ্ৰিযাধিকা চ, ৱুট্ঠানঘটিকা ভৱে.

১৮১৮. থূললক্খণমোহায, পঞ্ঞাধুৰে ৱিপস্সতো;

ধম্মসভাৱমাহচ্চ, সুখুমং পটিৱিজ্ঝতি.

১৮১৯. তস্মা সদ্ধাধুৰস্সেৱ, ৱুট্ঠানদ্ৱযমাদিতো;

অন্তে সদ্ধানুগতস্স, পঞ্ঞা সুপৰিপূৰতি.

১৮২০. পঞ্ঞাধুৰস্স সেসন্তি, কেচি আচৰিযা পন;

ধুৰসংসন্দনং নাম, ৱুট্ঠানেসু ৱিভাৱযুং.

১৮২১. সত্তক্খত্তুপৰমো চ,

কোলংকোলো তথাপৰো;

একবীজীতি তিৱিধো,

সোতাপন্নো পৱুচ্চতি.

১৮২২. সকিংদেৱ ইমং লোকং, আগন্ত্ৱা পুন পুগ্গলো;

সকদাগামিনামেন, দুতিযোপি পকাসিতো.

১৮২৩. অন্তৰাপৰিনিব্বাযী, উপহচ্চাপৰো তথা;

অসঙ্খাৰং সসঙ্খাৰং, উদ্ধংসোতোতি পঞ্চধা.

১৮২৪. অনাগামী চ ততিযো, চতুত্থো অৰহাতি চ;

ইত্থং ফলট্ঠা চত্তাৰো, মগ্গট্ঠা চ ততোপৰে.

১৮২৫. ভাৱনাপৰিযাযেন, পটিৱেধানুৰূপতো;

চত্তাৰো চ যুগা হোন্তি, অট্ঠ চাৰিযপুগ্গলা.

১৮২৬. দিট্ঠিকঙ্খা পহীযন্তি, আদিমগ্গেন সব্বথা;

অপাযগমনীযম্পি, পাপমঞ্ঞং পহীযতি.

১৮২৭. সকদাগামিমগ্গেন, খীযন্তোড়াৰিকা তথা;

অনাগামিকমগ্গেন, কামদোসাৱ সব্বথা.

১৮২৮. অৰহত্তেন সব্বেপি, ক্লেসা খীযন্তি সব্বথা;

ক্লেসহানি যথাযোগ-মিতি ঞেয্যা ৱিভাৱিনা.

১৮২৯. পটিসম্ভিদা চতস্সো, অত্থে ধম্মে নিৰুত্তিযং;

পটিভানে চ ভাসন্তি, ঞাণং ভেদগতং বুধা.

১৮৩০. হেতুপ্ফলঞ্চ নিব্বানং, ভাসিতত্থো তথাপৰো;

পাকাক্ৰিযাতি পঞ্চেতে, অত্থনামেন ভাসিতা.

১৮৩১. হেতু চাৰিযমগ্গো চ, ভাসিতঞ্চ তথাপৰং;

কুসলাকুসলঞ্চেতি, পঞ্চ ধম্মো পকাসিতো.

১৮৩২. তত্থেৱং দসধা ভেদে, অত্থধম্মে যথাৰহং;

যো ৱোহাৰো সভাৱেন, সা নিৰুত্তীতি সম্মতা.

১৮৩৩. তংতংগোচৰকিচ্চাদি-ভেদভিন্নং তহিং তহিং;

পৱত্তমানং যং ঞাণং, পটিভানং তমীৰিতং.

১৮৩৪. পুব্বযোগো বাহুস্সচ্চং,

দেসভাসা তথাগমো;

পৰিপুচ্ছা চাধিগমো,

নিস্সযো মিত্তসম্পদা.

১৮৩৫. ইচ্চূপনিস্সযং লদ্ধা, ভিজ্জতি পটিসম্ভিদা;

অসেক্খভূমিযং ৱাথ, সেক্খভূমিযমেৱ ৱা.

১৮৩৬. সৰস্সতো আগমতো, তথালম্বণতোপি চ;

নামুপ্পত্তিং পকাসেন্তি, ফলস্স তিৱিধং বুধা.

১৮৩৭. তিধা ততো সমাপত্তি, সোতাপত্তিফলাদিকা;

সুঞ্ঞতা চানিমিত্তা চ, তথাপ্পণিহিতাতি চ.

১৮৩৮. তঞ্চ ৱুত্তনযেনেৱ, সমাপজ্জিতুমিচ্ছতো;

ৱিপস্সন্তস্স সঙ্খাৰে, ফলমপ্পেতি অত্তনো.

১৮৩৯. নিৰোধং তু সমাপত্তিং, ৰূপাৰূপস্স লাভকো;

সমাপজ্জতানাগামী, অৰহা চ যথা তথা.

১৮৪০. ৰূপাৰূপসমাপত্তিং, সমাপজ্জ যথাক্কমং;

ৱুট্ঠহিত্ৱা ৱিপস্সন্তো, তত্থ তত্থেৱ সঙ্খতে.

১৮৪১. যুগনন্ধং পৱত্তেত্ৱা, সমথঞ্চ ৱিপস্সনং;

যাৱাকিঞ্চঞ্ঞাযতন-মিত্থং পত্ৱা ততো পৰং.

১৮৪২. অধিট্ঠেয্যমধিট্ঠায, কত্ৱাভোগং যথাৰহং;

মগ্গাৰূপসমাপত্তিং, সমাপজ্জতি পণ্ডিতো.

১৮৪৩. ততো নিৰোধং ফুসতি, চিত্তুপ্পাদদ্ৱযা পৰং;

তস্সেৱং মনসাভাৱো, নিৰোধোতি পৱুচ্চতি.

১৮৪৪. ফলচিত্তসমুপ্পাদা, ৱুট্ঠানং তস্স দীপিতং;

ততো ভৱঙ্গং ছেত্ৱান, পচ্চৱেক্খতি বুদ্ধিমা.

১৮৪৫. ইচ্চানেকগুণাধাৰং, পঞ্ঞাভাৱনমুত্তমং;

ভাৱেয্য মতিমা যোগী, পত্থেন্তো হিতমত্তনো.

১৮৪৬. ইত্থং সুসম্পাদিতসীলচিত্ত-

পঞ্ঞাৱিসুদ্ধী পটিপাদযন্তা;

পত্ৱান সম্বোধিমপেতসোকা,

পালেন্তি সোত্থিং পৰমং চিৰায.

১৮৪৭. তে পত্তিপত্তা পৰমপ্পতীতা,

পক্খালিতক্লেসমলা মহেসী;

অচ্চন্তৱোদাতগুণোদিতত্তা,

লোকস্স হোন্তুত্তমদক্খিণেয্যা.

ইতি নামৰূপপৰিচ্ছেদে নিস্সন্দফলৱিভাগো নাম

তেৰসমো পৰিচ্ছেদো.

নিট্ঠিতো চ সব্বথাপি ৱিপস্সনাৱিভাগো.

নিগমনকথা

১৮৪৮. এত্তাৱতা পটিঞ্ঞাতো, পৱক্খামীতি আদিতো;

নামৰূপপৰিচ্ছেদো, পৰিনিট্ঠাপিতো মযা.

১৮৪৯. তেৰসেৱ পৰিচ্ছেদা, ৱিভত্তা সত্ত সাধিকা;

নামৰূপপৰিচ্ছেদে, ভাণৱাৰা পকাসিতা.

১৮৫০. অভিধম্মপৰমত্থা, সমথো চ ৱিপস্সনা;

ৱিসুং ৱিসুং ৱিভত্তাতি, ৱিভাগেত্থ তিধা মতা.

১৮৫১. সোযং ৱিজ্জাৱিমোক্খা চ, হদযেসু ৱিভাৱিনং;

ৱল্লভত্তমধিট্ঠায, সাসনেত্থ গৱেসিনং.

১৮৫২. মনোগততমুদ্ধংসী, ৰৱিৰংসীৱ পণ্ডিতো;

দস্সেতু চিৰমালোকং, সদ্ধম্মৰতনালযে.

১৮৫৩. পণ্ডিচ্চং পৰমত্থেসু, পাটৱং পটিপত্তিযং;

পত্থযন্তেন ভিক্খূন-মিত্থং সুগতসাসনে.

১৮৫৪. নামৰূপপৰিচ্ছেদ-মসংকিণ্ণমনাকুলং;

কুব্বতা হিতকামেন, সুকতেন কতেন মে.

১৮৫৫. মহামেৰুনিভং গেহং, মহাচেতিযভূসিতং;

মহাৱিহাৰমাৰুড়্হ-মহাবোধিমহুস্সৱং.

১৮৫৬. অলঙ্কাতুং পহোন্তালং, চিৰকালং তপোধনা;

লঙ্কাদীপস্সলঙ্কাৰং, কলঙ্কাপগতালযং.

১৮৫৭. নামৰূপপৰিচ্ছেদো,

অন্তৰাযং ৱিনা যথা;

নিট্ঠিতোযং তথা লোকে,

নিট্ঠন্তজ্ঝাসযা সুভা.

ইতি অনুৰুদ্ধাচৰিযেন ৱিৰচিতং

নামৰূপপৰিচ্ছেদপকৰণং নিট্ঠিতং.