১. পঠমো পৰিচ্ছেদো

ৰূপসঙ্খেপো

৩. সচ্চানি পৰমত্থঞ্চ, সম্মুতিঞ্চাতি দ্ৱে তহিং;

থদ্ধভাৱাদিনা ঞেয্যং, সচ্চং তং পৰমত্থকং.

৪. সন্নিৱেসৱিসেসাদিঞেয্যং সম্মুতি তং দ্ৱযং;

ভাৱসঙ্কেতসিদ্ধীনং, তথত্তা সচ্চমীৰিতং.

৫. পৰমত্থো সনিব্বানপঞ্চক্খন্ধেত্থ ৰাসিতো;

খন্ধত্থো চ সমাসেত্ৱা, ৱুত্তোতীতাদিভেদনং.

৬. ৱেদনাদীসুপেকস্মিং, খন্ধসদ্দো তু ৰুড়্হিযা;

সমুদ্দাদেকদেসে তু, সমুদ্দাদিৰৱো যথা.

৭. তত্থ সীতাদিৰুপ্পত্তা, ৰূপং ভ্ৱাপানলানিলং;

ভূতং কথিনদৱতাপচনীৰণভাৱকং.

৮. চক্খু সোতঞ্চ ঘানঞ্চ, জিৱ্হা কাযো পভা ৰৱো;

গন্ধো ৰসোজা ইত্থী চ, পুমা ৱত্থু চ জীৱিতং.

৯. খং জাতি জৰতা ভঙ্গো, ৰূপস্স লহুতা তথা;

মুদুকম্মঞ্ঞতা কাযৱচীৱিঞ্ঞত্তি ভূতিকং.

১০. চক্খাদী দট্ঠুকামাদিহেতুকম্মজভূতিকা;

পসাদা ৰূপসদ্দাদী, চক্খুঞাণাদিগোচৰা.

১১. ওজা হি যাপনা ইত্থিপুমলিঙ্গাদিহেতুকং;

ভাৱদ্ৱযং তু কাযংৱ, ব্যাপি নো সহৱুত্তিকং.

১২. নিস্সযং ৱত্থু ধাতূনং, দ্ৱিন্নং কম্মজপালনং;

জীৱিতং উপ্পলাদীনং, উদকংৱ ঠিতিক্খণে.

১৩. খং ৰূপানং পৰিচ্ছেদো, জাতিআদিত্তযং পন;

ৰূপনিব্বত্তি পাকো চ, ভেদো চেৱ যথাক্কমং.

১৪. লহুতাদিত্তযং তং হি, ৰূপানং কমতো সিযা;

অদন্ধথদ্ধতা চাপি, কাযকম্মানুকূলতা.

১৫. অভিক্কমাদিজনকচিত্তজস্সানিলস্স হি;

ৱিকাৰো কাযৱিঞ্ঞত্তি, ৰূপত্থম্ভাদিকাৰণং.

১৬. ৱচীভেদকচিত্তেন, ভূতভূমিৱিকাৰতা;

ৱচীৱিঞ্ঞত্তুপাদিন্নঘট্টনস্সেৱ কাৰণং.

১৭. ৰূপমব্যাকতং সব্বং, ৱিপ্পযুত্তমহেতুকং;

অনালম্বং পৰিত্তাদি, ইতি একৱিধং নযে.

১৮. অজ্ঝত্তিকানি চক্খাদী, পঞ্চেতেৱ পসাদকা;

ৱত্থুনা ৱত্থু তানেৱ, দ্ৱাৰা ৱিঞ্ঞত্তিভী সহ.

১৯. সেসং বাৱীসতি চেকৱীস ৱীসতি বাহিৰং;

অপ্পসাদমৱত্থুং চ, অদ্ৱাৰঞ্চ যথাক্কমং.

২০. পসাদা পঞ্চ ভাৱাযু, ইন্দ্ৰিযনিন্দ্ৰিযেতৰং;

ৱিনাপং আদিতো যাৱ, ৰসা থূলং ন চেতৰং.

২১. অট্ঠকং অৱিনিব্ভোগং, ৱণ্ণগন্ধৰসোজকং;

ভূতং তং তু ৱিনিব্ভোগমিতৰন্তি ৱিনিদ্দিসে.

২২. অট্ঠাৰসাদিতো ৰূপা, নিপ্ফন্নং তু ন চেতৰং;

ফোট্ঠব্বমাপৱজ্জং তু, ভূতং কামে ন চেতৰং.

২৩. সেক্খসপ্পটিঘাসেক্খপটিঘং দ্ৱযৱজ্জিতং;

ৱণ্ণং তদিতৰং থূলং, সুখুমঞ্চেতি তং তিধা.

২৪. কম্মজাকম্মজংনেৱকম্মাকম্মজতো তিধা;

চিত্তোজউতুজাদীনং, ৱসেনাপি তিধা তথা.

২৫. দিট্ঠং সুতং মুতঞ্চাপি, ৱিঞ্ঞাতং ৱত চেতসা;

একমেকঞ্চ পঞ্চাপি, ৱীসতি চ কমা সিযুং.

২৬. হদযং ৱত্থু ৱিঞ্ঞত্তি, দ্ৱাৰং চক্খাদিপঞ্চকং;

ৱত্থু দ্ৱাৰঞ্চ সেসানি, ৱত্থু দ্ৱাৰঞ্চ নো সিযা.

২৭. নিপ্ফন্নং ৰূপৰূপং খং, পৰিচ্ছেদোথ লক্খণং;

জাতিআদিত্তযং ৰূপং, ৱিকাৰো লহুতাদিকং.

২৮. যথা সঙ্খতধম্মানং, লক্খণং সঙ্খতং তথা;

পৰিচ্ছেদাদিকং ৰূপং, তজ্জাতিমনতিক্কমা.

২৯. কম্মচিত্তানলাহাৰপচ্চযানং ৱসেনিধ;

ঞেয্যা পৱত্তি ৰূপস্স, পিণ্ডানঞ্চ ৱসা কথং.

৩০. কম্মজং সেন্দ্ৰিযং ৱত্থু, ৱিঞ্ঞত্তি চিত্তজা ৰৱো;

চিত্তগ্গিজো লহুতাদিত্তযং চিত্তানলন্নজং.

৩১. অট্ঠকং জাতি চাকাসো, চতুজা জৰতা খযং;

কুতোচি নেৱ জাতং তপ্পাকভেদং হি তং দ্ৱযং.

৩২. জাতিযাপি ন জাতত্তং, কুতোচিট্ঠকথানযা;

লক্খণাভাৱতো তস্সা, সতি তস্মিং ন নিট্ঠিতি.

৩৩. কম্মচিত্তানলন্নেহি, পিণ্ডা নৱ চ সত্ত চ;

চত্তাৰো দ্ৱে চ ৱিঞ্ঞেয্যা, সজীৱে দ্ৱে অজীৱকে.

৩৪. অট্ঠকং জীৱিতেনাযুনৱকং ভাৱৱত্থুনা;

চক্খাদী পঞ্চ দসকা, কলাপা নৱ কম্মজা.

৩৫. সুদ্ধট্ঠৱিঞ্ঞত্তিযুত্তনৱকোপি চ দসকো;

সুদ্ধসদ্দেন নৱকো, লহুতাদিদসেককো.

৩৬. ৱিঞ্ঞত্তিলহুতাদীহি, পুন দ্ৱাদস তেৰস;

চিত্তজা ইতি ৱিঞ্ঞেয্যা, কলাপা সত্ত ৱা ছ ৱা.

৩৭. সুদ্ধট্ঠং সদ্দনৱকং, লহুতাদিদসেককং;

সদ্দেনলহুতাদীহি, চতুৰোতুজকণ্ণিকা.

৩৮. সুদ্ধট্ঠলহুতাদীহি, অন্নজা দ্ৱেতিমে নৱ;

সত্ত চত্তাৰি দ্ৱে চেতি, কলাপা ৱীসতী দ্ৱিভি.

৩৯. তযট্ঠকা চ চত্তাৰো, নৱকা দসকা নৱ;

তযো দ্ৱেকো চ একেন, দস দ্ৱীহি চ তীহি চ.

৪০. চতুন্নম্পি চ ধাতূনং, অধিকংসৱসেনিধ;

ৰূপভেদোথ ৱিঞ্ঞেয্যো, কম্মচিত্তানলন্নজো.

৪১. কেসাদিমত্থলুঙ্গন্তা, পথৱংসাতি ৱীসতি;

পিত্তাদিমুত্তকন্তা তে, জলংসা দ্ৱাদসীৰিতা.

৪২. যেন সন্তপ্পনং যেন, জীৰণং দহনং তথা;

যেনসিতাদিপাকোতি, চতুৰংসানলাধিকা.

৪৩. উদ্ধাধোগমকুচ্ছিট্ঠা, কোট্ঠাসেয্যঙ্গসাৰি চ;

অস্সাসোতি চ ৱিঞ্ঞেয্যা, ছড়ংসা ৱাযুনিস্সিতা.

৪৪. পুব্বমুত্তকৰীসঞ্চুদৰিযং চতুৰোতুজা;

কম্মা পাচগ্গি চিত্তম্হা-স্সাসোতি ছপি একজা.

৪৫. সেদসিঙ্ঘানিকস্সু চ, খেড়ো চিত্তোতুসম্ভৱা;

দ্ৱিজা দ্ৱত্তিংস কোট্ঠাসা, সেসা এৱ চতুব্ভৱা.

৪৬. একজেস্ৱাদিচতূসু, উতুজা চতুৰট্ঠকা;

জীৱীতনৱকো পাচেস্সাসে চিত্তভৱট্ঠকো.

৪৭. দ্ৱিজেসু মনতেজেহি, দ্ৱে দ্ৱে হোন্তি পনট্ঠকা;

সেসতেজানিলংসেসু, একেকম্হি তযো তযো.

৪৮. অট্ঠকোজমনগ্গীহি, হোন্তি অট্ঠসু কম্মতো;

অট্ঠাযুনৱকা এৱং, ইমে অট্ঠ চতুব্ভৱা.

৪৯. চতুৱীসেসু সেসেসু, চতুজেসুট্ঠকা তযো;

একেকম্হি চ ৱিঞ্ঞেয্যা, পিণ্ডা চিত্তানলন্নজা.

৫০. কম্মজা কাযভাৱৱ্হা, দসকাপি সিযুং তহিং;

চতুৱীসেসু অংসেসু, একেকম্হি দুৱে দুৱে.

৫১. পঞ্চাপি চক্খুসোতাদী, পদেসদসকা পুন;

নৱকা সদ্দসঙ্খাতা, দ্ৱেতিচ্চেৱং কলাপতো.

৫২. তেপঞ্ঞাস দসেকঞ্চ, নৱুত্তৰসতানি চ;

দসকা নৱকা চেৱ, অট্ঠকা চ সিযুং কমা.

৫৩. সেকপঞ্চসতং কাযে, সহস্সং তং পৱত্ততি;

পৰিপুণ্ণিন্দ্ৰিযে ৰূপং, নিপ্ফন্নং ধাতুভেদতো.

৫৪. চিত্তুপ্পাদে সিযুং ৰূপ-হেতূ কম্মাদযো পন;

ঠিতি ন পাঠে চিত্তস্স, ন ভঙ্গে ৰূপসম্ভৱো.

৫৫. ‘‘অঞ্ঞথত্তং ঠিতস্সা’’তি, ৱুত্তত্তাৱ ঠিতিক্খণং;

অত্থীতি চে পবন্ধেন, ঠিতি তত্থ পৱুচ্চতি.

৫৬. অথ ৱা তিক্খণে কম্মং, চিত্তমত্তুদযক্খণে;

উতুওজাত্তনো ঠানে, ৰূপহেতূ ভৱন্তি হি.

৫৭. সেয্যস্সাদিক্খণে কায-

ভাৱৱত্থুৱসা তযো;

দসকা হোন্তিভাৱিস্স,

ৱিনা ভাৱং দুৱে সিযুং.

৫৮. ততো পৰঞ্চ কম্মগ্গিচিত্তজা তে চ পিণ্ডিকা;

অট্ঠকা চ দুৱে পুব্বে, ৱুত্তৱুত্তক্খণে ৱদে.

৫৯. কালেনাহাৰজং হোতি, চক্খাদিদসকানি চ;

চতুপচ্চযতো ৰূপং, সম্পিণ্ডেৱং পৱত্ততি.

৬০. তং সত্তৰসচিত্তাযু, ৱিনা ৱিঞ্ঞত্তিলক্খণং;

সন্ততামৰণা ৰূপং, জৰাদিফলমাৱহং.

৬১. ভঙ্গা সত্তৰসুপ্পাদে, জাযতে কম্মজং ন তং;

তদুদ্ধং জাযতে তস্মা, তক্খযা মৰণং ভৱে.

৬২. আযুকম্মুভযেসং ৱা, খযেন মৰণং ভৱে;

উপক্কমেন ৱা কেসঞ্চুপচ্ছেদককম্মুনা.

৬৩. ওপপাতিকভাৱিস্স, দসকা সত্ত কম্মজা;

কামে আদো ভৱন্তগ্গিজাহি পুব্বেৱ ভূযতে.

৬৪. আদিকপ্পনৰানঞ্চ, অপাযে অন্ধকস্স চ;

বধিৰস্সাপি আদো ছ, পুব্বেৱেতৰজা সিযুং.

৬৫. তত্থেৱন্ধবধিৰস্স, পঞ্চ হোন্তি অভাৱিনো;

যুত্তিযা ইধ ৱিঞ্ঞেয্যা, পঞ্চ ৱা চতুৰোপি ৱা.

৬৬. চক্খাদিত্তযহীনস্স, চতুৰোৱ ভৱন্তিতি;

ৱুত্তং উপপৰিক্খিত্ৱা, গহেতব্বং ৱিজানতা.

৬৭. ৰূপে জীৱিতছক্কঞ্চ, চক্খাদিসত্তকত্তযং;

পঞ্চ ছ উতুচিত্তেহি, পঞ্চ ছাসঞ্ঞিনং ভৱে.

৬৮. পঞ্চধাত্ৱাদিনিযমা, পাঠে গন্ধৰসোজনং;

নুপ্পত্তি তত্থ ভূতানং, অফোট্ঠব্বপৱত্তিনং.

৬৯. থদ্ধুণ্হীৰণভাৱোৱ, নত্থি ধাত্ৱাদিকিচ্চতো;

অঞ্ঞং গন্ধাদীনং তেসং, তক্কিচ্চেনোপলদ্ধিতো.

৭০. ৰূপে সপ্পটিঘত্তাদি, তত্থ ৰুপ্পনতা ৱিয;

ঘট্টনঞ্চ ৰৱুপ্পাদস্সঞ্ঞত্থস্সেৱ হেতুতা.

৭১. ইচ্ছিতব্বমিমেকন্তমেৱং পাঠাৱিৰোধতো;

অথ ৱা তেহি ৱিঞ্ঞেয্যং, দসকং নৱকট্ঠকং.

৭২. সব্বং কামভৱে ৰূপং, ৰূপে একূনৱীসতি;

অসঞ্ঞীনং দস গন্ধৰসোজাহি চ ব্ৰহ্মুনং.

ইতি সচ্চসঙ্খেপে ৰূপসঙ্খেপো নাম

পঠমো পৰিচ্ছেদো.