২. দুতিযো পৰিচ্ছেদো

খন্ধত্তযসঙ্খেপো

৭৩. ৱেদনানুভৱো তেধা, সুখদুক্খমুপেক্খযা;

ইট্ঠানিট্ঠানুভৱনমজ্ঝানুভৱলক্খণা.

৭৪. কাযিকং মানসং দুক্খং, সুখোপেক্খা চ ৱেদনা;

একং মানসমেৱেতি, পঞ্চধিন্দ্ৰিযভেদতো.

৭৫. যথা তথা ৱা সঞ্ঞাণং, সঞ্ঞা সতিনিবন্ধনং;

ছধা ছদ্ৱাৰসম্ভূতফস্সজানং ৱসেন সা.

৭৬. সঙ্খাৰা চেতনা ফস্সো,

মনক্কাৰাযু সণ্ঠিতি;

তক্কো চাৰো চ ৱাযামো,

পীতি ছন্দোধিমোক্খকো.

৭৭. সদ্ধা সতি হিৰোত্তপ্পং, চাগো মেত্তা মতি পুন;

মজ্ঝত্ততা চ পস্সদ্ধী, কাযচিত্তৱসা দুৱে.

৭৮. লহুতা মুদুকম্মঞ্ঞপাগুঞ্ঞমুজুতা তথা;

দযা মুদা মিচ্ছাৱাচা, কম্মন্তাজীৱসংৱৰো.

৭৯. লোভো দোসো চ মোহো চ, দিট্ঠি উদ্ধচ্চমেৱ চ;

অহিৰীকং অনোত্তপ্পং, ৱিচিকিচ্ছিতমেৱ চ.

৮০. মানো ইস্সা চ মচ্ছেৰং, কুক্কুচ্চং থিনমিদ্ধকং;

ইতি এতেৱ পঞ্ঞাস, সঙ্খাৰক্খন্ধসঞ্ঞিতা.

৮১. ব্যাপাৰো চেতনা ফস্সো, ফুসনং সৰণং তহিং;

মনক্কাৰো পালনাযু, সমাধি অৱিসাৰতা.

৮২. আৰোপনানুমজ্জট্ঠা, তক্কচাৰা পনীহনা;

ৱীৰিযং পীননা পীতি, ছন্দো তু কত্তুকামতা.

৮৩. অধিমোক্খো নিচ্ছযো সদ্ধা,

পসাদো সৰণং সতি;

হিৰী পাপজিগুচ্ছা হি,

ওত্তপ্পং তস্স ভীৰুতা.

৮৪. অলগ্গো চ অচণ্ডিক্কং, চাগো মেত্তা মতি পন;

যাথাৱবোধো মজ্ঝত্তং, সমৱাহিতলক্খণং.

৮৫. ছ যুগানি কাযচিত্তদৰগাৰৱথদ্ধতা-

অকম্মঞ্ঞত্তগেলঞ্ঞকুটিলানং ৱিনোদনা.

৮৬. তানুদ্ধতাদিথিনাদিদিট্ঠাদীনং যথাক্কমং;

সেসকাদিঅসদ্ধাদিমাযাদীনং ৱিপক্খিনো.

৮৭. দুক্খাপনযনকামা, দযা মোদা পমোদনা;

ৱচীদুচ্চৰিতাদীনং, ৱিৰামো ৱিৰতিত্তযং.

৮৮. লোভো দোসো চ মোহো চ,

গেধচণ্ডমনন্ধনা;

কমেন দিট্ঠি দুগ্গাহো,

উদ্ধচ্চং ভন্ততং মতং.

৮৯. অহিৰীকমলজ্জত্তং, অনোত্তপ্পমতাসতা;

সংসযো ৱিচিকিচ্ছা হি, মানো উন্নতিলক্খণো.

৯০. পৰস্সকসম্পত্তীনং,

উসূযা চ নিগূহনা;

ইস্সামচ্ছেৰকা তাপো,

কতাকতস্স সোচনা.

৯১. থিনং চিত্তস্স সঙ্কোচো, অকম্মঞ্ঞত্ততা পন;

মিদ্ধমিচ্চেৱমেতেসং, লক্খণঞ্চ নযে বুধো.

৯২. ৱেদনাদিসমাধন্তা, সত্ত সব্বগসঞ্ঞিতা;

তক্কাদিঅধিমোক্খন্তা, ছ পকিণ্ণকনামকা.

৯৩. সদ্ধাদযো ৱিৰমন্তা, অৰণা পঞ্চৱীসতি;

লোভাদিমিদ্ধকন্তানি, সৰণানি চতুদ্দস.

৯৪. ইস্সামচ্ছেৰকুক্কুচ্চদোসা কামে দযা মুদা;

কামে ৰূপে চ সেসা ছ-চত্তালীস তিধাতুজা.

৯৫. ছন্দনিচ্ছযমজ্ঝত্তমনক্কাৰা সউদ্ধৱা;

দযাদী পঞ্চ মানাদী, ছ যেৱাপন সোড়স.

৯৬. ছন্দাদী পঞ্চ নিযতা, তত্থেকাদস নেতৰা;

অহিৰীকমনোত্তপ্পং, লোকনাসনকং দ্ৱযং.

৯৭. এতে দ্ৱে মোহুদ্ধচ্চাতি, চত্তাৰো পাপসব্বগা;

লোকপালদুকং ৱুত্তং, হিৰিওত্তপ্পনামকং.

৯৮. আৰম্মণূপনিজ্ঝানা, ঝানঙ্গা তক্কচাৰকা;

পীতি একগ্গতা চেতি, সত্ত ৱিত্তিত্তযেন ৱে.

৯৯. সদ্ধা সতি মতেকগ্গ-ধিতি লোকৱিনাসকা;

পালকা নৱ চেতানি, বলানি অৱিকম্পতো.

১০০. এত্থ সদ্ধাদিপঞ্চাযু, কত্ৱাত্ৰ চতুধা মতিং;

ৱেদনাহি দ্ৱিসত্তেতে, ইন্দ্ৰিযানাধিপচ্চতো.

১০১. মনৰূপিন্দ্ৰিযেহেতে, সব্বে ইন্দ্ৰিযনামকা;

বাৱীসতি ভৱন্তাযুদ্ৱযং কত্ৱেকসঙ্গহং.

১০২. দিট্ঠীহেকগ্গতাতক্কসতীৱিৰতিযো পথা;

অট্ঠ নিয্যানতো আদিচতুৰো ভিত্ৱান দ্ৱাদস.

১০৩. ফস্সো চ চেতনা চেৱ,

দ্ৱেৱেত্থাহাৰণত্ততো;

আহাৰা মনৱোজাহি,

ভৱন্তি চতুৰোথৱা.

১০৪. হেতু মূলট্ঠতো পাপে,

লোভাদিত্তযমীৰিতং;

কুসলাব্যাকতে চাপি,

অলোভাদিত্তযং তথা.

১০৫. দিট্ঠিলোভদুসা কম্মপথাপাযস্স মগ্গতো;

তব্বিপক্খা সুগতিযা, তযোতি ছ পথীৰিতা.

১০৬. পস্সদ্ধাদিযুগানি ছ, ৱগ্গত্তা যুগড়ানি তু;

উপকাৰা সতি ধী চ, বহূপকাৰভাৱতো.

১০৭. ওঘাহৰণতো যোগা,

যোজনেনাভৱগ্গতো;

সৱনেনাসৱা দিট্ঠি-

মোহেজেত্থ দুধা লুভো.

১০৮. দড়্হগ্গাহেন দিট্ঠেজা, উপাদানং তিধা তহিং;

দিট্ঠি দোসেন তে গন্থা, গন্থতো দিট্ঠিহ দ্ৱিধা.

১০৯. পঞ্চাৱৰণতো কাম-কঙ্খাদোসুদ্ধৱং তপো;

থিনমিদ্ধঞ্চ মোহেন, ছ ৱা নীৱৰণানিথ.

১১০. কত্ৱা তাপুদ্ধৱং একং, থিনমিদ্ধঞ্চ ৱুচ্চতি;

কিচ্চস্সাহাৰতো চেৱ, ৱিপক্খস্স চ লেসতো.

১১১. দিট্ঠেজুদ্ধৱদোসন্ধ-

কঙ্খাথিনুণ্ণতী দস;

লোকনাসযুগেনেতে,

কিলেসা চিত্তক্লেসতো.

১১২. লোভদোসমূহমান-দিট্ঠিকঙ্খিস্সমচ্ছৰা;

সংযোজনানি দিট্ঠেজা, ভিত্ৱা বন্ধনতো দুধা.

১১৩. তানি মোহুদ্ধৱংমানকঙ্খাদোসেজদিট্ঠিযো;

দুধাদিট্ঠি তিধা লোভং, ভিত্ৱা সুত্তে দসীৰিতা.

১১৪. দিট্ঠিলোভমূহমানদোসকঙ্খা তহিং দুধা;

কত্ৱা লোভমিমে সত্তানুসযা সমুদীৰিতা.

১১৫. দিট্ঠি এৱ পৰামাসো, ঞেয্যো এৱং সমাসতো;

অত্থো সঙ্খাৰক্খন্ধস্স, ৱুত্তো ৱুত্তানুসাৰতো.

ইতি সচ্চসঙ্খেপে খন্ধত্তযসঙ্খেপো নাম

দুতিযো পৰিচ্ছেদো.