দুতিযো পৰিচ্ছেদো

২. পকিণ্ণককথা

৪৬. কুসলানেকৱীসেৱ, দ্ৱাদসাকুসলানি চ;

ছত্তিংসতি ৱিপাকানি, ক্ৰিযাচিত্তানি ৱীসতি.

৪৭. কামেসু চতুপঞ্ঞাস, ৰূপেসু দস পঞ্চ চ;

দ্ৱাদসাৰুপ্পচিত্তানি, অট্ঠানুত্তৰমানসা.

৪৮. কামে তেৱীস পাকানি, পুঞ্ঞাপুঞ্ঞানি ৱীসতি;

একাদস ক্ৰিযা চেতি, চতুপঞ্ঞাস সব্বথা.

৪৯. পুঞ্ঞপাকক্ৰিযাভেদা, তযো ৰূপেসু পঞ্চকা;

আৰুপ্পেতি চতুক্কানি, সত্তৱীস মহগ্গতা.

৫০. চতুমগ্গফলানং তু, ৱসেনট্ঠপি ঝানতো;

দসোভযম্পি মিস্সেত্ৱা, তালীসানুত্তৰা সিযুং.

৫১. পুঞ্ঞপাকক্ৰিযাপাপা, সন্তি কামে মহগ্গতে;

পাপং নত্থি ক্ৰিযাপাপা, ন ৱিজ্জন্তি অনুত্তৰে.

৫২. পাপাহেতুকমুত্তানি, অনৱজ্জানি সব্বথা;

একূনসট্ঠি চিত্তানি, পুঞ্ঞপাকক্ৰিযাৱসা.

৫৩. কম্মচিত্তানি তেত্তিংস, পুঞ্ঞাপুঞ্ঞানি সব্বথা;

ছত্তিংস তেসং পাকানি, ক্ৰিযা ৱীস ন চোভযং.

৫৪. চক্খুৱিঞ্ঞাণধাতাদি, পঞ্চৱিঞ্ঞাণনামকা;

পঞ্চদ্ৱাৰাৱজ্জনঞ্চ, দুৱিধং সম্পটিচ্ছনং.

৫৫. মনোধাতুত্তযং নাম, ছসত্ততি ততো পৰে;

মনোৱিঞ্ঞাণধাতূতি, সত্তধা ধাতুভেদতো.

৫৬. মনোৱিঞ্ঞাণধাতুঞ্চ, মনোধাতুত্তযং তথা;

কত্ৱা মনোৱিঞ্ঞাণন্তি, ছ ৱিঞ্ঞাণা পকিত্তিতা.

৫৭. আৱজ্জনং দস্সনঞ্চ, সৱনং ঘাযনং তথা;

সাযনং ফুসনঞ্চেৱ, সম্পটিচ্ছনতীৰণং.

৫৮. ৱোট্ঠব্বনঞ্চ জৱনং, তদাৰম্মণনামকং;

ভৱঙ্গং চুতি সন্ধীতি, চিত্তং চুদ্দসধা ঠিতং.

৫৯. আৱজ্জনাদযো দ্ৱে দ্ৱে, যুগা সত্ত যথাক্কমং;

তীণি তীৰণচিত্তানি, একং ৱোট্ঠব্বনং মতং.

৬০. কুসলাকুসলা সব্বে, ফলা চাৱজ্জনং ৱিনা;

ক্ৰিযা চ পঞ্চপঞ্ঞাস, জৱনন্তি পৱুচ্চৰে.

৬১. সন্তীৰণমহাপাকা, তদাৰম্মণনামকা;

একাদস পৱত্তন্তি, জৱনাৰম্মণে যতো.

৬২. মহগ্গতমহাপাকা, উপেক্খাতীৰণদ্ৱযং;

চুতিসন্ধিভৱঙ্গানি, চিত্তানেকূনৱীসতি.

৬৩. জৱনাৱজ্জনাদীনি, ৱোট্ঠব্বসুখতীৰণা;

মহগ্গতমহাপাকা, উপেক্খাতীৰণাতি চ.

৬৪. অট্ঠসট্ঠি তথা দ্ৱে চ, নৱট্ঠ দ্ৱে যথাক্কমং;

একদ্ৱিতিচতুপ্পঞ্চকিচ্চট্ঠানানি নিদ্দিসে.

৬৫. ৰূপপাকা মহাপাকা, মনোধাতু চ তীৰণং;

ৰূপং জনেন্তি একূনৱীসতি নেতৰদ্ৱযং.

৬৬. অভিঞ্ঞাৱজ্জিতা সব্বে, অপ্পনাজৱনা পন;

ৰূপং জনেন্তি ছব্বীস, পণামেন্তিৰিযাপথং.

৬৭. অভিঞ্ঞাদ্ৱযৱোট্ঠব্বপৰিত্তজৱনা পন;

দ্ৱত্তিংস ৰূপৱিঞ্ঞত্তিইৰিযাপথসাধকা.

৬৮. পঞ্চৱিঞ্ঞাণমাৰুপ্প-ৱিপাকা সব্বসন্ধিযো;

চুতি খীণাসৱস্সেতি, সোড়সেতে ন কিঞ্চিপি.

৬৯. ৰূপং জনেন্তি চিত্তানি, সত্তসত্ততি সব্বথা;

অট্ঠপঞ্ঞাস চিত্তানি, পণামেন্তিৰিযাপথং.

৭০. দ্ৱত্তিংস চতুৱিঞ্ঞত্তিং, সমুট্ঠাপেন্তি মানসা;

ন জনেন্তি তস্সম্পেকং, যথাৱুত্তানি সোড়স.

৭১. সোমনস্সসহগতা, পৰিত্তজৱনা পন;

হসনম্পি জনেন্তীতি, চতুকিচ্চানি তেৰস.

৭২. সব্বম্পি পঞ্চৱোকাৰে, কিচ্চমেতং পকাসিতং;

আৰুপ্পে পন সব্বম্পি, ৰূপাযত্তং ন ৱিজ্জতি.

৭৩. অসঞ্ঞীনং তু সব্বানি, চিত্তানেৱ ন লব্ভৰে;

ৰূপক্খন্ধোৱ তেসং তু, অত্তভাৱোতি ৱুচ্চতি.

৭৪. পাণাতিপাতথেয্যাদিৱসেনোপচিতং পন;

উদ্ধচ্চৰহিতাপুঞ্ঞং, চতুৰাপাযভূমিযং.

৭৫. দত্ৱা সন্ধিং পৱত্তে তু, পঞ্চৱোকাৰভূমিযং;

উদ্ধচ্চসহিতঞ্চাপি, সত্ত পাকানি পচ্চতি.

৭৬. দানসীলাদিভেদেন, পৱত্তং কুসলং পন;

কামে মানসমুক্কট্ঠং, চতুক্কং তু তিহেতুকং.

৭৭. দত্ৱা তিহেতুকং সন্ধিং, কামে সুগতিযং পন;

সোড়স পুঞ্ঞপাকানি, পৱত্তে তু ৱিপচ্চতি.

৭৮. তিহেতুকোমকং পুঞ্ঞং, উক্কট্ঠঞ্চ দ্ৱিহেতুকং;

দত্ৱা দ্ৱিহেতুকং সন্ধিং, কামে সুগতিযং তথা.

৭৯. পৱত্তে পন ঞাণেন, সম্পযুত্তং ৱিৱজ্জিয;

দ্ৱাদস পুঞ্ঞপাকানি, ৱিপচ্চতি যথাৰহং.

৮০. দ্ৱিহেতুকোমকং পুঞ্ঞং, পটিসন্ধিমহেতুকং;

দেতি মানুসকে চেৱ, ৱিনিপাতাসুৰে তথা.

৮১. অট্ঠাহেতুকপাকানি, পৱত্তে তু ৱিপচ্চৰে;

চত্তাৰিপি চতুক্কানি, পঞ্চৱোকাৰভূমিযং.

৮২. ভাৱনামযপুঞ্ঞং তু, মহগ্গতমনুত্তৰং;

যথাভূমিনিযামেন, দেতি পাকং যথাসকং.

৮৩. কটত্তাৰূপপাকানি, পঞ্চৱোকাৰভূমিযং;

আৰুপ্পানুত্তৰে পাকং, তথা ৰূপমসঞ্ঞিসু.

৮৪. পুঞ্ঞাপুঞ্ঞানি কম্মানি, তেত্তিংসাপি চ যব্বথা;

সঞ্জনেন্তি যথাযোগং, পটিসন্ধিপৱত্তিযং.

ইতি চিত্তৱিভাগে পকিণ্ণককথা নিট্ঠিতা.

দুতিযো পৰিচ্ছেদো.