সত্তৱীসতিমো পৰিচ্ছেদো

৫. পঞ্ঞত্তিৱিভাগো

২৭. পভেদকথা

১০৬২. চিত্তং চেতসিকং ৰূপং, নিব্বানম্পি চ ভাজিতং;

তস্মা দানি যথাযোগং, পঞ্ঞত্তিপি পৱুচ্চতি.

১০৬৩. সা চাযং অত্থপঞ্ঞত্তি-নামপঞ্ঞত্তিভেদতো;

দুৱিধা হোতি পঞ্ঞত্তি, অত্থপঞ্ঞত্তি তত্থ চ.

১০৬৪. সত্তসম্ভাৰসণ্ঠান-সঙ্ঘাটপৰিণামতো;

ৱিকপ্পুপট্ঠানাকাৰৱোহাৰাভিনিৱেসতো.

১০৬৫. তথা পৱত্তসঙ্কেতসিদ্ধা অত্থা পকপ্পিতা;

পঞ্ঞাপীযন্তি নামাতি, পঞ্ঞত্তীতি পকিত্তিতা.

১০৬৬. অত্থা হি পৰমত্থত্থা, পঞ্ঞত্তত্থাতি চ দ্ৱিধা;

তত্থ চ পৰমত্থত্থা, সচ্চিকট্ঠা সলক্খণা.

১০৬৭. পঞ্ঞত্তত্থা সচ্চিকট্ঠসলক্খণসভাৱতো;

অঞ্ঞথা গহিতা তংতমুপাদায পকপ্পিতা.

১০৬৮. তস্মা উপাদাপঞ্ঞত্তি, অত্থপঞ্ঞত্তিনামকা;

পঞ্ঞপেতব্বনামাৱ, পঞ্ঞত্তত্থাৱ সব্বথা.

১০৬৯. পৰমত্থা যথাৱুত্তা, চিত্তচেতসিকাদযো;

পঞ্ঞত্তা ইত্থিপুৰিসমঞ্চপীঠপটাদযো.

১০৭০. যেন ৱুচ্চতি তং নামং, পঞ্ঞপেতীতি ৱুচ্চতি;

পঞ্ঞত্তীতি চ সা নামপঞ্ঞত্তীতি ততো মতা.

১০৭১. সঙ্খা সমঞ্ঞা পঞ্ঞত্তি, ৱোহাৰোতি চ ভাজিতা;

চতুধা পঞ্ঞপেতব্বপঞ্ঞত্তীতি হি ৱণ্ণিতা.

১০৭২. ততো নামং নামকম্মং, নামধেয্যং অথাপৰং;

নিৰুত্তি ব্যঞ্জনমভিলাপোতি পন ভাজিতা.

১০৭৩. নামপঞ্ঞত্তি নামাতি, পঞ্ঞত্তি দুৱিধা কতা;

সব্বেৱ ধম্মা পঞ্ঞত্তিপথাতি পন ভাজিতা.

১০৭৪. পৰমত্থপঞ্ঞত্তত্থা, দুৱিধা হোন্তি তত্থ চ;

পঞ্ঞত্তিপথাৱ হোন্তি, পৰমত্থা সলক্খণা.

১০৭৫. পঞ্ঞত্তত্থা পঞ্ঞত্তি চ, পঞ্ঞপেতব্বমত্ততো;

পঞ্ঞত্তিপথা চ নামপঞ্ঞত্তিপথভাৱতো.

১০৭৬. নামম্পি পঞ্ঞাপেতব্বমেৱ কিঞ্চাপি কেনচি;

নামমেৱম্পেতং তত্থ, পঞ্ঞত্তিচ্চেৱ ৱণ্ণিতং.

১০৭৭. পঞ্ঞপেতব্বধম্মা চ, তেসং পঞ্ঞাপিতাপি চ;

ইচ্ছিতব্বাপি পঞ্ঞত্তিপথা পঞ্ঞত্তিনানতা.

১০৭৮. ইতি ৱুত্তানুসাৰেন, ৱুত্তং অট্ঠকথানযে;

নযং গহেত্ৱা এত্থাপি, পঞ্ঞত্তি দুৱিধা কতা.

১০৭৯. তস্মিম্পি পৰমত্থা চ, সচ্চিকট্ঠসলক্খণা;

অত্থা পঞ্ঞত্তিমত্তা চ, অত্থপঞ্ঞত্তিনামকা.

১০৮০. তেসং পঞ্ঞাপিকা চেৱ, নামপঞ্ঞত্তিনামিকা;

ইচ্চেৱং ৱণ্ণনামগ্গে, ঞেয্যত্তা তিৱিধা কতা.

১০৮১. পৰমত্থসচ্চং নাম, পৰমত্থাৱ তত্থ চ;

সচ্চিকট্ঠসভাৱত্তা, অৱিসংৱাদকা হি তে.

১০৮২. সম্মুতিসচ্চং পঞ্ঞত্তিদ্ৱযং ৱোহাৰৱুত্তিযা;

লোকসমঞ্ঞাধিপ্পাযাৱিসংৱাদকভাৱতো.

১০৮৩. ইতি সচ্চদ্ৱযম্পেতং, অক্খাসি পুৰিসুত্তমো;

তেনাপি নামসংৱিঞ্ঞূ, ৱোহৰেয্যুভযম্পি ৱা.

ইতি পঞ্ঞত্তিৱিভাগে পভেদকথা নিট্ঠিতা.

সত্তৱীসতিমো পৰিচ্ছেদো.