অট্ঠৱীসতিমো পৰিচ্ছেদো

২৮. অত্থপঞ্ঞত্তিকথা

১০৮৪. তত্থ চ পুব্বাপৰিয-পৱত্তক্খন্ধসম্মতা;

ৱিঞ্ঞত্তিন্দ্ৰিযৱিপ্ফাৰ-ৱিসেসোপনিবন্ধনা.

১০৮৫. দেৱযক্খমনুস্সাদি-নানাভেদা সলক্খিকা;

সত্তপঞ্ঞত্তি নামাযং, স্ৱাযং সত্তোতি সম্মতো.

১০৮৬. ৱট্টত্তযমুপাদায,

খন্ধাযতনৱুত্তিযা;

কাৰকো ৱেদকো ৱাযং,

সন্ধাৱতি ভৱে ভৱে.

১০৮৭. তস্মা সংসাৰমাপন্নো, সত্তো নাম স পুগ্গলো;

অহমত্তাপৰা ইত্থী, পুৰিসোতি চ কপ্পিতো.

১০৮৮. স্ৱাযং খন্ধাদিতো সত্তো, অঞ্ঞোতি চ ন ৱুচ্চতি;

খন্ধাদিৱিনিমুত্তস্স, সত্তস্সেৱ অভাৱতো.

১০৮৯. খন্ধা খন্ধানমেৱাযং, সত্তোতি চ ন ৱুচ্চতি;

খন্ধৱোহাৰতো তস্স, অঞ্ঞৱোহাৰসম্ভৱা.

১০৯০. ইচ্চেৱং খন্ধনানত্তে-কত্তমুত্তোপি অত্থতো;

তব্বিসেসাৱচৰিত-ৱোহাৰো চ তু দিস্সতি.

১০৯১. তেনাযং পুগ্গলো সত্তো, জাযতিজ্জিয্যতীতি চ;

মীযতীতি চ তস্সাযং, সংসাৰোতি পৱুচ্চতি.

১০৯২. মতো জাতো চ ন স্ৱেৱ, খন্ধভেদোপচাৰতো;

নাপৰো স্ৱেৱ সন্তানভেদাভাৱোপচাৰতো.

১০৯৩. নানত্তেকত্তমিচ্চেৱং, পুগ্গলস্সোপচাৰতো;

উচ্ছেদসস্সতত্তং ৱা, তস্মা নোপেতি পুগ্গলো.

১০৯৪. ইচ্চাযং পুগ্গলো নাম, সত্তো সংসাৰকাৰকো;

খন্ধাদিকমুপাদায, পঞ্ঞত্তোতি পৱুচ্চতি.

১০৯৫. তস্মা পুগ্গলসঙ্খাতা, সংসাৰোপনিবন্ধনা;

সত্তপঞ্ঞত্তি নামাতি, ৱিঞ্ঞাতব্বা ৱিভাৱিনা.

১০৯৬. অজ্ঝত্তিকা চ কেসাদিকোট্ঠাসা বাহিৰেসু চ;

ভূমিপব্বতপাসাণতিণৰুক্খলতাদিকা.

১০৯৭. ভূতসম্ভাৰনিব্বত্তিৱিভাগপৰিকপ্পিতা;

তমুপাদায সম্ভাৰপঞ্ঞত্তীতি পৱুচ্চতি.

১০৯৮. ভূতসম্ভাৰসণ্ঠানৱিভাগপৰিকপ্পিতা;

সণ্ঠানপঞ্ঞত্তি নাম, থম্ভকুম্ভাদিকা মতা.

১০৯৯. ভূতসম্ভাৰসঙ্ঘাতৱিসেসপৰিকপ্পিতা;

সঙ্ঘাতপঞ্ঞত্তি নাম, ৰথগেহাদিকা মতা.

১১০০. ভূতসম্ভাৰৱিসেসপৰিণামপকপ্পিতা;

পৰিণামপঞ্ঞত্তীতি, দধিভত্তাদিকা মতা.

১১০১. ইত্থমজ্ঝত্তবহিদ্ধা, ধম্মা সম্ভাৰসম্ভূতা;

সন্তানৱুত্তি সঙ্কেতসিদ্ধা পঞ্ঞত্তি পঞ্চধা.

১১০২. তথা তথা সমুপ্পন্নৱিকপ্পাভোগসম্মতা;

ৱিকপ্পপঞ্ঞত্তি নাম, কালাকাসদিসাদিকা.

১১০৩. তং তং নিমিত্তমাগম্ম, ততোপট্ঠানকপ্পিতা;

উপট্ঠানপঞ্ঞত্তীতি, পটিভাগাদিকা মতা.

১১০৪. ৱিসেসাকাৰমত্তাপি, অত্থন্তৰপকপ্পিতা;

আকাৰপঞ্ঞত্তি নাম, ৱিঞ্ঞত্তিলহুতাদিকা.

১১০৫. তং তং কাৰণমাগম্ম, তথা ৱোহাৰকপ্পিতা;

ৱোহাৰপঞ্ঞত্তি নাম, কথিনাপত্তিআদিকা.

১১০৬. বালো যো সো চ মে অত্তা,

সো ভৱিস্সামি মং চ তু;

নিচ্চো ধুৱো সস্সতোতি-

আদিকা পন সব্বথা.

১১০৭. তব্বোহাৰনিমিত্তানং, অভাৱেপি পৱত্তিতো;

অভিনিৱেসপঞ্ঞত্তি, নাম তিত্থিযকপ্পিতা.

১১০৮. ইচ্চেৱং লোকসাসনতিত্থাযতনকপ্পিতা;

সন্তানমুত্তসঙ্কেতসিদ্ধা অত্থাপি পঞ্চধা.

১১০৯. সঙ্কানৱুত্তিসন্তানমুত্তভেদৱসা দ্ৱিধা;

অত্থপঞ্ঞত্তি নামাযং, দসধা পৰিদীপিতা.

১১১০. ইতি ৱুত্তপ্পকাৰেসু, পঞ্ঞত্তত্থেসু পণ্ডিতা;

পঞ্ঞত্তিমত্তং সন্ধায, ৱোহৰন্তি যথাকথং.

১১১১. তদঞ্ঞে পন বালা চ, তিত্থিযাপি অকোৱিদা;

পঞ্ঞত্তিমতিধাৱিত্ৱা, গণ্হন্তি পৰমত্থতো.

১১১২. তে তথা গহিতাকাৰা, অঞ্ঞাণগহিতা জনা;

মিচ্ছত্তাভিনিৱিট্ঠা চ, ৱড্ঢন্তি ভৱবন্ধনং.

১১১৩. দুৱিধেসুপি অত্থেসু, তস্মা পণ্ডিতজাতিকো;

পৰমত্থপঞ্ঞত্তীসু, ৱিভাগমিতি লক্খযেতি.

ইতি পঞ্ঞত্তিৱিভাগে অত্থপঞ্ঞত্তিকথা নিট্ঠিতা.

অট্ঠৱীসতিমো পৰিচ্ছেদো.