ছব্বিসতিমো পৰিচ্ছেদো

২৬. ৱুট্ঠানৱিসুদ্ধিকথা

১০১৯. তস্সেৱং পটিপন্নস্স, সিখাপত্তা ৱিপস্সনা;

ৱুট্ঠানগামিনী নাম, যদা হোতি তদা পন.

১০২০. পৰিকম্মোপচাৰানুলোমগোত্ৰভুতো পৰং;

মগ্গো ততো ফলং হোতি, ভৱঙ্গা পচ্চৱেক্খণা.

১০২১. পৰিকম্মোপচাৰানুলোমসঙ্খাতগোচৰা;

মগ্গস্সাৱজ্জনং হুত্ৱা, নিব্বানে হোতি গোত্ৰভু.

১০২২. চতুত্থং পঞ্চমং ৱাথ, ছট্ঠং ৱাপি যথাৰহং;

অপ্পেতি মগ্গজৱনং, নিব্বানে সকিমেৱ তং.

১০২৩. ততো ফলানি তীণি দ্ৱে, একং ৱাথ যথাক্কমং;

মগ্গাৱসেসনিৰোধমগ্গৱুট্ঠানৱীথিযং.

১০২৪. ততো ভৱঙ্গপাতোৱ,

তং ছেত্ৱা পচ্চৱেক্খণা;

তিস্সো পঞ্চৱিধা হোন্তি,

যথাযোগং তথা হি চ.

১০২৫. মগ্গং ফলঞ্চ নিব্বানং, অৱস্সং পচ্চৱেক্খতি;

হীনে কিলেসে সেসে চ, পচ্চৱেক্খতি ৱা ন ৱা.

১০২৬. ততো চ পুন সঙ্খাৰে, ৱিপস্সন্তো যথা পুৰে;

অপ্পেতি অনুপুব্বেন, সেসমগ্গফলানি চ.

১০২৭. তত্থ ৱুচ্চন্তি নিব্বান-ফলমগ্গৱিপস্সনা;

সুঞ্ঞতা চানিমিত্তা চ, তথাপণিহিতানি চ.

১০২৮. সুঞ্ঞতাৱিপস্সনাদিনামেন হি ৱিপস্সতি;

ৱিমোক্খমুখভূতাতি, তিৱিধা ভাজিতা তথা.

১০২৯. সুঞ্ঞতাদিকনামেন, ৱিমোক্খা তিৱিধা মতা;

নিব্বানফলমগ্গা চ, সমাপত্তিসমাধযো.

১০৩০. তত্থেৱ পঠমভূমিং, পত্তো অৰিযপুগ্গলো;

সত্তক্খত্তুপৰমো সো, সোতাপন্নোতি ৱুচ্চতি.

১০৩১. পত্তো দুতিযভূমিঞ্চ, সকদাগামিনামকো;

সকিমেৱ ইমং লোকং, আগন্ত্ৱা হোতি মানুসং.

১০৩২. পত্তো ততিযভূমিঞ্চ, অনাগামীতি ৱুচ্চতি;

ব্ৰহ্মলোকা অনাগন্ত্ৱা, ইধকামোপপত্তিযা.

১০৩৩. পত্তো চতুত্থভূমিঞ্চ, অৰহা অগ্গপুগ্গলো;

দিট্ঠেৱ ধম্মে দুক্খগ্গিং, নিব্বাপেতীতি ৱুচ্চতি.

১০৩৪. ইতি মগ্গফলট্ঠানং, ৱসা অৰিযপুগ্গলা;

দ্ৱিধাপি চতুধা যুগ্গা, অট্ঠ হোন্তি ৱিভাগতো.

১০৩৫. উভতোভাগৱিমুত্ত-

ৱিভাগাদিৱসা পন;

ৱিভত্তা হোন্তি সত্তেতে,

যথাযোগং তথা হি চ.

১০৩৬. সদ্ধাধুৰস্সানিচ্চতো, ৱুট্ঠানং দুক্খতোপি চ;

পঞ্ঞাধুৰস্সানত্ততো, ইতি দীপেন্তি পণ্ডিতা.

১০৩৭. সদ্ধানুসাৰি আদিম্হি, মজ্ঝে সদ্ধাৱিমুত্তকো;

অন্তে পঞ্ঞাৱিমুত্তোৱ, তস্মা সদ্ধাধুৰো সিযা.

১০৩৮. ধম্মানুসাৰি আদিম্হি, দিট্ঠিপ্পত্তো ততোপৰি;

অন্তে পঞ্ঞাৱিমুত্তোৱ, হোতি পঞ্ঞাধুৰোপি চ.

১০৩৯. সমথযানিকা চেৱ, ৰূপানুত্তৰপাদকা;

ৱিপস্সনাযানিকা চ, সব্বে সুক্খৱিপস্সকা.

১০৪০. ধুৰৱুট্ঠানভেদেন, হোন্তি পঞ্চেৱ সব্বথা;

আৰুপ্পপাদকা চাপি, আদিম্হি দুৱিধা তথা.

১০৪১. ছসু ঠানেসু মজ্ঝকে, কাযসক্খীতি ভাজিতা;

উভতোভাগৱিমুত্তো, অৰহত্তে পতিট্ঠিতো.

১০৪২. ইত্থং ৱুত্তযানধুৰ-ৱুট্ঠানানং ৱিভাগতো;

মগ্গপ্ফলভূমিযো চ, সত্তট্ঠাৰিযপুগ্গলা.

১০৪৩. তত্থ চানুত্তৰঞাণং, সচ্চানং পটিৱেধকং;

সমুচ্ছেদপ্পহানেন, ক্লেসানুসযসোধনং.

১০৪৪. চতুমগ্গৱিভাগেন, ৱুট্ঠানন্তি পকিত্তিতং;

ঞাণদস্সনৱিসুদ্ধি, নাম হোতি তথাপি চ.

১০৪৫. মগ্গো চ পৰিজানাতি, দুক্খং তেভূমকং তথা;

যথাযোগং পজহতি, তণ্হাসমুদযম্পি চ.

১০৪৬. নিৰোধং সচ্ছিকৰোতি, মগ্গসচ্চমনুত্তৰং;

ভাৱনাৱীথিমোতিণ্ণো, ভাৱেতীতি পৱুচ্চতি.

১০৪৭. দিট্ঠিগ্গতৱিচিকিচ্ছা-সীলব্বতমসেসতো;

অপাযগমনীযঞ্চ, ৰাগদোসাদিকত্তযং.

১০৪৮. তদেকট্ঠে কিলেসে চ, সহজাতপ্পহানতো;

পজহাতি সোতাপত্তি-মগ্গো পঠমভূমিকো.

১০৪৯. তদেকট্ঠে পজহতি, ৰাগদোসাদিকেপি চ;

থূলে তু সকদাগামি-মগ্গো দুতিযভূমিকো.

১০৫০. পজহাতি অনাগামি-মগ্গো নিৰৱসেসতো;

কামৰাগব্যাপাদে চ, তদেকট্ঠে চ সম্ভৱা.

১০৫১. ৰূপাৰূপৰাগমানু-দ্ধচ্চাৱিজ্জাতি পঞ্চকং;

অগ্গমগ্গো পজহতি, ক্লেসে সেসে চ সব্বথা.

১০৫২. ইতি সচ্চপটিৱেধং, ক্লেসক্খযফলাৱহং;

মগ্গঞাণং পকাসেন্তি, ৱিসুদ্ধিং সত্তমং বুধা.

১০৫৩. ছব্বিসুদ্ধিকমেনেৱং, সব্বথায ৱিসুদ্ধিযা;

সত্তমাযানুপত্তব্বং, নিব্বানন্তি পৱুচ্চতি.

১০৫৪. ক্লেসক্খযকৰং তাণং, সংসাৰাতিক্কমং পৰং;

পাৰিমং তীৰমভযং, সব্বসঙ্খাৰনিস্সটং.

১০৫৫. তেনম্মদনিম্মদনং, পিপাসৱিনযাদিনা;

ক্লেসসংসাৰসঙ্খাৰ-পটিপক্খনিদস্সিতং.

১০৫৬. অজৰামৰমচ্চন্ত-মনুপ্পাদমসঙ্খতং;

অনুত্তৰমসঙ্খাৰং, অনন্তমতুলঞ্চ তং.

১০৫৭. পৰমত্থমনোপম্মং, সন্তি অপ্পটিমং সুখং;

নিৰোধসচ্চ নিব্বানং, একন্তং অমতং পদং.

১০৫৮. সোপাদিসেসনিব্বান-ধাতু চেৱ তথাপৰা;

অনুপাদিসেসা চেতি, দুৱিধা পৰিযাযতো.

১০৫৯. সুঞ্ঞতং চানিমিত্তঞ্চ, তথাপণিহিতন্তি চ;

অত্তাদিগাহাভাৱেন, তিৱিধাপি চ ভাজিতং.

১০৬০. ক্লেসসংসাৰসঙ্খাৰ-পচ্চনীকৱিভাগতো;

ভৱক্খযাদিভেদেহি, বহুধাপি পৱুচ্চতি.

১০৬১. তদেৱমচ্চুতং ধম্মং, লোকুত্তৰমকালিকং;

ৱানাভাৱা ৱানাতীতো, ‘‘নিব্বান’’ন্তি পকিত্তিতং.

ইতি নিব্বানৱিভাগে ৱুট্ঠানৱিসুদ্ধিকথা নিট্ঠিতা.

ছব্বীসতিমো পৰিচ্ছেদো.

নিট্ঠিতো চ সব্বথাপি নিব্বানৱিভাগো.