তেৱীসতিমো পৰিচ্ছেদো

৪. নিব্বানৱিভাগো

২৩. মূলৱিসুদ্ধিকথা

৮৯৫. ইত্থং চিত্তং চেতসিকং, ৰূপঞ্চেৱাতি সঙ্খতা;

ৱুত্তা অসঙ্খতং দানি, নিব্বানন্তি পৱুচ্চতি.

৮৯৬. সীলৱিসুদ্ধি আদিম্হি, ততো চিত্তৱিসুদ্ধি চ;

দিট্ঠিৱিসুদ্ধিনামা চ, কঙ্খাৱিতৰণাপি চ.

৮৯৭. ততো পৰং মগ্গামগ্গ-ঞাণদস্সননামিকা;

তথা পটিপদাঞাণ-দস্সনা ঞাণদস্সনং.

৮৯৮. ইচ্চানুক্কমতো ৱুত্তা, সত্ত হোন্তি ৱিসুদ্ধিযো;

সত্তমানুত্তৰা তত্থ, পুব্বভাগা ছ লোকিযা.

৮৯৯. সংৱৰো পাতিমোক্খো চ, তথেৱিন্দ্ৰিযসংৱৰো;

আজীৱপাৰিসুদ্ধি চ, সীলং পচ্চযনিস্সিতং.

৯০০. ইতি সীলৱিসুদ্ধীতি, সুদ্ধমেতং পৱুচ্চতি;

চতুপাৰিসুদ্ধিসীলং, ধুতঙ্গপৰিৱাৰিতং.

৯০১. কসিণানি দসাসুভা, দসানুস্সতিযো পন;

অপ্পমঞ্ঞা চ সঞ্ঞা চ, ৱৱত্থাৰুপ্পকাতি চ.

৯০২. সমথক্কম্মট্ঠানানি, তালীসট্ঠকথানযে;

পাড়িযং তু ৱিভত্তানি, অট্ঠতিংসাতি ৱণ্ণিতং.

৯০৩. পথৱাপো চ তেজো চ,

ৱাযো নীলঞ্চ পীতকং;

লোহিতোদাতমাকাসং,

আলোককসিণন্তি চ.

৯০৪. কসিণানি দসেতানি, ৱুত্তানট্ঠকথানযে;

অট্ঠেৱ পাড়িযং হিত্ৱা, অন্তে তু কসিণদ্ৱযং.

৯০৫. উদ্ধুমাতং ৱিনীলঞ্চ, ৱিপুব্বকং ৱিখাযিতং;

ৱিচ্ছিদ্দকঞ্চ ৱিক্খিত্তং, হতৱিক্খিত্তলোহিতং.

৯০৬. পুড়ৱকং অট্ঠিকঞ্চেতি, অসুভা দস দেসিতা;

ৰূপকাযৱিভাগায, দসকাযৱিপত্তিযা.

৯০৭. বুদ্ধে ধম্মে চ সঙ্ঘে চ, সীলে চাগে চ অত্তনা;

দেৱতোপসমাযঞ্চ, সত্তানুস্সতিযো কমা.

৯০৮. মৰণস্সতি নামেকা, তথা কাযগতাসতি;

আনাপানস্সতিচ্চেৱং, দসানুস্সতিযো মতা.

৯০৯. মেত্তা কৰুণা মুদিতা, উপেক্খাতি চতুব্বিধা;

ৱুত্তা ব্ৰহ্মৱিহাৰা চ, অপ্পমঞ্ঞাতি তাদিনা.

৯১০. একাহাৰে পটিক্কূল-সঞ্ঞা নামেকমেৱ তু;

চতুধাতুৱৱত্থানং, চতুধাতুপৰিগ্গহো.

৯১১. আকাসানঞ্চাযতনং, ৱিঞ্ঞাণঞ্চমথাপৰং;

আকিঞ্চঞ্ঞং তথা নেৱ-সঞ্ঞানাসঞ্ঞনামকং.

৯১২. ইচ্চানুক্কমতো ৱুত্তা, অৰূপজ্ঝানিকা পন;

অৰূপকম্মট্ঠানানি, চত্তাৰোপি পকিত্তিতা.

৯১৩. কসিণাসুভকোট্ঠাসে, আনাপানে চ সব্বথা;

দিস্ৱা সুত্ৱা ফুসিত্ৱা ৱা, পৰিকম্মং তু কুব্বতো.

৯১৪. উগ্গহো নাম সম্ভোতি, নিমিত্তং তত্থ যুঞ্জতো;

পটিভাগো তমাৰব্ভ, তত্থ ৱত্ততি অপ্পনা.

৯১৫. সাধু সত্তা সুখী হোন্তু, দুক্খা মুচ্চন্তু পাণিনো;

অহো সত্তা সুখপ্পত্তা, হোন্তু যদিচ্ছকাতি চ.

৯১৬. উদ্দিস্স ৱা অনোদিস্স, যুঞ্জতো সত্তগোচৰে;

অপ্পমঞ্ঞা পনপ্পেন্তি, অনুপুব্বেন ৱত্তিকা.

৯১৭. কসিণুগ্ঘাটিমাকাসে, পঠমাৰুপ্পমানসে;

তস্সেৱ নত্থিভাৱে চ, ততিযাৰুপ্পকেতি চ.

৯১৮. যুঞ্জন্তস্স পনেতেসু, গোচৰেসু চতূসুপি;

অপ্পেন্তি অনুপুব্বেন, আৰুপ্পাপি চতুব্বিধা.

৯১৯. আনাপানঞ্চ কসিণং, পঞ্চকজ্ঝানিকং তহিং;

পঠমজ্ঝানিকা ৱুত্তা, কোট্ঠাসাসুভভাৱনা.

৯২০. সুখিতজ্ঝানিকা তিস্সো, অপ্পমঞ্ঞা চ হেট্ঠিমা;

উপেক্খাৰুপ্পকা পঞ্চ, উপেক্খাঝানিকাতি চ.

৯২১. একা দসেকা দস চ, তযো পঞ্চেতি সব্বথা;

পৰিকম্মৱসা তিংস, ছ কোট্ঠাসা যথাক্কমং.

৯২২. পঞ্চকাদিসুখোপেক্খা, ঝানভেদা চতুব্বিধা;

একচ্চতুপঞ্চঝান-ৱসেন তিৱিধা সিযুং.

৯২৩. ৰূপাৰূপৱসা দ্ৱে চ, অপ্পনাতো পুনেকধা;

ইচ্চেৱমপ্পনা কম্ম-ট্ঠানভেদা সমিস্সিতা.

৯২৪. দ্ৱে চ সঞ্ঞাৱৱত্থানা, অট্ঠানুস্সতিযোতি চ;

সেসা দস পৱুচ্চন্তি, উপচাৰসমাধিকা.

৯২৫. পৰিকম্মোপচাৰানুলোমগোত্ৰভুতো পৰং;

পঞ্চমং ৱা চতুত্থং ৱা, জৱনং হোতি অপ্পনা.

৯২৬. অপ্পনাজৱনং সব্বং, লোকুত্তৰমহগ্গতং;

তিহেতুকপৰিত্তানি, পুৰিমানি যথাৰহং.

৯২৭. আৱজ্জনা চ ৱসিতা, তংসমাপজ্জনা তথা;

অধিট্ঠানা চ ৱুট্ঠানা, পচ্চৱেক্খণ পঞ্চমা.

৯২৮. ৱসিতাহি ৱসীভূতা, ইতি কত্ৱান পঞ্চহি;

ভাৱেন্তস্স পনপ্পেন্তি, উপৰূপৰি অপ্পনা.

৯২৯. যুঞ্জন্তস্স তু ৱুট্ঠায, কসিণজ্ঝানপঞ্চমা;

পঞ্চাভিঞ্ঞা হি অপ্পেন্তি, ৰূপসদ্দাদিগোচৰে.

৯৩০. লোকুত্তৰা পনপ্পেন্তি, সব্বে নিব্বানগোচৰে;

অনিচ্চদুক্খানত্তাতি, ভূমিধম্মে ৱিপস্সতো.

৯৩১. তত্থ চ পাদকজ্ঝানং, সম্মট্ঠজ্ঝানমেৱ ৱা;

অজ্ঝাসযো চ ৱুট্ঠান-গামিনী চ ৱিপস্সনা.

৯৩২. মগ্গানং ঝানভেদায, যথাযোগং নিযামতা;

যথাসকং ফলানং তু, মগ্গা হোন্তি নিযামতা.

৯৩৩. মগ্গানন্তৰমেৱাথ, ভূমিধম্মে ৱিপস্সতো;

ফলসমাপত্তিযম্পি, অপ্পেতি ফলমানসং.

৯৩৪. অনুপুব্বসমাপত্তিং, সমাপজ্জিস্স ৱুট্ঠিতো;

ঝানধম্মে ৱিপস্সিত্ৱা, তত্থ তত্থেৱ পণ্ডিতো.

৯৩৫. চতুত্থাৰুপ্পমপ্পেত্ৱা, একদ্ৱিজৱনাপৰং;

নিৰোধং নাম ফুসতি, সমাপত্তিমচিত্তকং.

৯৩৬. অৰহা ৱা অনাগামী, পঞ্চৱোকাৰভূমিযং;

যথাসকং ফলুপ্পাদো, ৱুট্ঠানন্তি ততো মতো.

৯৩৭. অপ্পনাপৰিযোসানে, সিযা সব্বত্থ সম্ভৱা;

ভৱঙ্গপাতো তং ছেত্ৱা, জাযতে পচ্চৱেক্খণা.

৯৩৮. ইতি ৱুত্তানুসাৰেন, অপ্পনানযসঙ্গহং;

যথাযোগং ৱিভাৱেয্য, তত্থ তত্থ ৱিচক্খণো.

৯৩৯. চিত্তৱিসুদ্ধি নামাযং, চিত্তসংক্লেসসোধনো;

উপচাৰপ্পনাভেদো, সমথো পুব্বভাগিযোতি.

ইতি নিব্বানৱিভাগে মূলৱিসুদ্ধিকথা নিট্ঠিতা.

তেৱীসতিমো পৰিচ্ছেদো.