চতুৱীসতিমো পৰিচ্ছেদো

২৪. পৰিগ্গহৱিসুদ্ধিকথা

৯৪০. সীলচিত্তৱিসুদ্ধীহি, যথাৱুত্তাহি মণ্ডিতো;

পযোগাসযসম্পন্নো, নিব্বানাভিৰতো ততো.

৯৪১. খন্ধাযতনধাতাদিপ্পভেদেহি যথাৰহং;

লক্খণপচ্চুপট্ঠান-পদট্ঠানৱিভাগতো.

৯৪২. পৰিগ্গহেত্ৱা সঙ্খাৰে, নামৰূপং যথাকথং;

ৱৱত্থপেন্তো তত্থেৱমনুপস্সতি পঞ্ঞৱা.

৯৪৩. নামৰূপমিদং সুদ্ধং, অত্তভাৱোতি ৱুচ্চতি;

নত্থেত্থ কোচি অত্তা ৱা, সত্তো জীৱো চ পুগ্গলো.

৯৪৪. যথাপি অঙ্গসম্ভাৰা, হোতি সদ্দো ৰথো ইতি;

এৱং খন্ধেসু সন্তেসু, হোতি সত্তোতি সম্মুতি.

৯৪৫. খন্ধাযতনধাতূনং, যথাযোগমনুক্কমো;

অব্বোচ্ছিন্নো পৱত্তন্তো, সংসাৰোতি পৱুচ্চতি.

৯৪৬. ইতি নানপ্পকাৰেন, তেভূমকপৰিগ্গহো;

ভূমিধম্মৱৱত্থানং, সুদ্ধসঙ্খাৰদস্সনং.

৯৪৭. অত্তদিট্ঠিপহানেন, দিট্ঠিসংক্লেসসোধনং;

দিট্ঠিৱিসুদ্ধি নামাতি, ঞাণমেতং পৱুচ্চতি.

৯৪৮. পৰিগ্গহিতসঙ্খাৰো, নামৰূপমপত্থিযা;

ততো পৰং যথাযোগং, পৰিগ্গণ্হতি পচ্চযে.

৯৪৯. দুক্খসমুদযো তত্থ, তণ্হা সংসাৰনাযিকা;

সমোধানেতি সঙ্খাৰে, তত্থ তত্থুপপত্তিযা.

৯৫০. তণ্হাসম্ভৱমেৱেতং, তস্মা দুক্খং পৱুচ্চতি;

তদপ্পৱত্তি নিব্বানং, মগ্গো তংপাপকোতি চ.

৯৫১. চতুসচ্চৱৱত্থান-মুখেনেৱম্পি পচ্চযে;

পৰিগ্গণ্হন্তি একচ্চে, সঙ্খাৰানমথাপৰে.

৯৫২. আলোকাকাসৱাযাপপথৱিঞ্চুপনিস্সযং;

ভৱঙ্গপৰিণামঞ্চ, লভিত্ৱাৱ যথাৰহং.

৯৫৩. ছ ৱত্থূনি চ নিস্সায, ছ দ্ৱাৰাৰম্মণানি চ;

পটিচ্চ মনসিকাৰং, পৱত্তন্তি অৰূপিনো.

৯৫৪. যথাসকসমুট্ঠানং, ৱিভাগেহি চ ৰূপিনো;

পৱত্তন্তি একচ্চেতি, পৰিগ্গণ্হন্তি পচ্চযে.

৯৫৫. অৱিজ্জাপচ্চযা হোন্তি, সঙ্খাৰা তু ততো তথা;

ৱিঞ্ঞাণং নামৰূপঞ্চ, সড়াযতননামকং.

৯৫৬. ফস্সো চ ৱেদনা তণ্হা, উপাদানং ভৱো ততো;

জাতি জৰা মৰণঞ্চ, পৱত্ততি যথাৰহং.

৯৫৭. ততো সোকো পৰিদেৱো, দুক্খঞ্চেৱ তথাপৰং;

দোমনস্সমুপাযাসো, সম্ভোতি চ যথাৰহং.

৯৫৮. এতস্স কেৱলস্সেৱং, দুক্খক্খন্ধস্স সম্ভৱো;

পটিচ্চসমুপ্পাদোৱ, নত্থঞ্ঞো কোচি কাৰকো.

৯৫৯. তত্থাৱিজ্জাদযো দ্ৱেপি, অদ্ধাতীতো অনাগতো;

জাতাদযোপৰে অট্ঠ, পচ্চুপ্পন্নোতি ৱণ্ণিতো.

৯৬০. পুঞ্ঞাপুঞ্ঞানেঞ্জৱসা, সঙ্খাৰা তিৱিধা তথা;

ভৱেকদেসো কম্মঞ্চ, কম্মৱট্টন্তি ৱুচ্চতি.

৯৬১. অৱিজ্জাতণ্হুপাদানা, ক্লেসৱট্টমথাপৰে;

ৱিপাকৱট্টং সত্তাপি, উপপত্তিভৱোপি চ.

৯৬২. অৱিজ্জাসঙ্খাৰানং তু, গহণে গহিতাৱ তে;

তণ্হুপাদানভৱাতি, অতীতে পঞ্চ হেতৱো.

৯৬৩. তণ্হুপাদানভৱানং, গহণে গহিতাৱ তে;

অৱিজ্জা সঙ্খাৰা চেতি, পচ্চুপ্পন্নেপি পঞ্চকে.

৯৬৪. ৱিঞ্ঞাণাদিসৰূপেন, দস্সিতং ফলপঞ্চকং;

তথা তদেৱ জাতাদি-নামেনানাগতন্তি চ.

৯৬৫. অতীতে হেতৱো পঞ্চ, ইদানি ফলপঞ্চকং;

ইদানি হেতৱো পঞ্চ, আযতিং ফলপঞ্চকং.

৯৬৬. হেতুফলং ফলহেতু, পুন হেতুফলানি চ;

তিসন্ধি চতুসঙ্খেপং, ৱীসতাকাৰমব্ৰৱুং.

৯৬৭. অত্থধম্মপটিৱেধ-দেসনানং যথাৰহং;

গম্ভীৰত্তা চতুন্নম্পি, চতুগম্ভীৰতা মতা.

৯৬৮. একত্তনানত্তনযা, অব্যাপাৰনযোপৰো;

তথেৱংধম্মতা চেতি, নযা ৱুত্তা চতুব্বিধা.

৯৬৯. জৰামৰণসোকাদি-পীড়িতানমভিণ্হসো;

আসৱানং সমুপ্পাদা, অৱিজ্জা চ পৱত্ততি.

৯৭০. অৱিজ্জাপচ্চযা হোন্তি, সঙ্খাৰাপি যথা পুৰে;

বদ্ধাৱিচ্ছেদমিচ্চেৱং, ভৱচক্কমনাদিকং.

৯৭১. তণ্হাৱিজ্জানাভিকং তং, জৰামৰণনেমিকং;

সেসাকাৰাদিঘটিকং, তিভৱাৰথযোজিতং.

৯৭২. তিঅদ্ধঞ্চ তিৱট্টঞ্চ, তিসন্ধিঘটিকং তথা;

চতুসঙ্খেপগম্ভীৰনযমণ্ডিতদেসনং.

৯৭৩. ৱীসতাকাৰৱিভাগং, দ্ৱাদসাকাৰসঙ্গহং;

ধম্মট্ঠিতীতি দীপেন্তি, ইদপ্পচ্চযতং বুধা.

৯৭৪. পটিচ্চসমুপ্পাদোযং, পচ্চযাকাৰনামতো;

সঙ্খেপতো চ ৱিত্থাৰা, ৱিৱিধাকাৰভেদতো.

৯৭৫. জনেতি পচ্চযুপ্পন্নে, অৱিজ্জাদিপৱত্তিযা;

অৱিজ্জাদিনিৰোধেন, নিৰোধেতি চ সব্বথা.

৯৭৬. পচ্চযপ্পচ্চযুপ্পন্ন-ৱসেনেৱ পৱত্ততি;

সংসাৰোযন্তি একচ্চে, পৰিগ্গণ্হন্তি পচ্চযে.

৯৭৭. সমন্তপট্ঠানমহাপকৰণৱিভাগতো;

একচ্চে পৰিগ্গণ্হন্তি, চতুৱীসতি পচ্চযে.

৯৭৮. ইতি নানপ্পকাৰেন, পচ্চযানং পৰিগ্গহো;

সপ্পচ্চযনামৰূপং, ৱৱত্থানন্তি ৱেদিতং.

৯৭৯. ইদপ্পচ্চযতাঞাণং, পচ্চযাকাৰদস্সনং;

ধম্মট্ঠিতি যথাভূতঞাণদস্সননামকং.

৯৮০. কালত্তযৱিভাগেসু, কঙ্খাসংক্লেসসোধনং;

কঙ্খাৱিতৰণা নাম, ৱিসুদ্ধীতি পৱুচ্চতীতি.

ইতি নিব্বানৱিভাগে পৰিগ্গহৱিসুদ্ধিকথা নিট্ঠিতা.

চতুৱীসতিমো পৰিচ্ছেদো.