২২. পকিণ্ণককথা

৮৪৪. ইত্থং ৰূপানমুপ্পত্তিং, দীপেত্ৱা দানি ৱুচ্চতি;

পৱত্তিকোসল্লত্থায, তত্থেৱেতং পকিণ্ণকং.

৮৪৫. দুৱিধা সন্ধিযো তত্থ, মিস্সামিস্সৱিভাগতো;

তিৱিধাপি চেকচতু-পঞ্চৱোকাৰভেদতো.

৮৪৬. ৰূপমত্তা অসঞ্ঞীনং, নামাভাৱা অমিস্সিতা;

নামমত্তা অৰূপীনং, ৰূপাভাৱাতি চ দ্ৱিধা.

৮৪৭. কামাৱচৰিকা চেৱ, ৰূপাৱচৰিকাতি চ;

দুৱিধা মিস্সিতা চেতি, ভৱন্তি চ চতুব্বিধা.

৮৪৮. একচ্চতুৱোকাৰা চ, অমিস্সা পঞ্চ সন্ধিযো;

ছব্বীসতিৱিধা মিস্সা, পঞ্চৱোকাৰসন্ধিযো.

৮৪৯. ইত্থং ভূমিপ্পভেদেন, একতিংসৱিধাপি চ;

সন্ততিৰাসিভেদেন, সিযুং তিংসৱিধা কথং.

৮৫০. ৰূপসন্ততিসীসানং,

ৰাসযো সত্তৱীসতি;

ৱুত্তা কামে ৱসা তেসং,

সত্তকা কামসন্ধিযো.

৮৫১. ৱেদনাসঞ্ঞাসঙ্খাৰ-ৱিঞ্ঞাণক্খন্ধসঙ্গহা;

সব্বত্থাপি চতস্সোৱ, নামসন্ততিযো সিযুং.

৮৫২. ইচ্চুভিন্নং ৱসা হোন্তি, তত্থেকাদসকাদযো;

সন্ততিৰাসযো পুব্বে, ৱিভত্তা সত্তকাদযো.

৮৫৩. একাদসকদসক-নৱট্ঠসত্তকা সিযুং;

ছক্কেন সদ্ধিং ৱিঞ্ঞেয্যা, তস্মা তত্থ ছ সঙ্গহা.

৮৫৪. অট্ঠ সন্ততিযো হোন্তি, ৰূপলোকেন মিস্সিতা;

অট্ঠকো ৰাসি তত্থেকো, তস্মা সন্ততি ৱুচ্চতি.

৮৫৫. জীৱিতনৱকো ত্ৱেকো, অসঞ্ঞী পটিসন্ধিযং;

অৰূপীনং চতস্সোপি, নামসন্ততিযো সিযুং.

৮৫৬. ইচ্চেককচতুক্কানং, ৱসেন দ্ৱে অমিস্সিতা;

অট্ঠৱীসঞ্চ মিস্সাতি, তিংসেৱ হোন্তি সন্ধিযো.

৮৫৭. একুপ্পাদনিৰোধা চ, অমিস্সা তত্থ ৰাসযো;

মিস্সিতানং ৱিভাগোযং, যথাযোগং কথীযতি.

৮৫৮. উপ্পাদট্ঠিতিভঙ্গানং, ৱসা তীণি খণানিপি;

সমানানেৱ নামানং, একচিত্তক্খণং মতং.

৮৫৯. তুল্যমুপ্পাদভঙ্গানং, ৰূপানম্পি খণদ্ৱযং;

একূনপঞ্ঞাসমত্তং, ঠিতিক্খণমুদীৰিতং.

৮৬০. নামৰূপানমুপ্পাদো, ভঙ্গোপি হি সমো মতো;

দন্ধং হি ৱত্তিকং ৰূপং, নামং তু লহুৱত্তিকং.

৮৬১. তথা হি ৰূপে তিট্ঠন্তে, চিত্তুপ্পাদা তু সোড়স;

উপ্পজ্জিত্ৱা পৱত্তিত্ৱা, ভিজ্জন্তি চ লহুং লহুং.

৮৬২. তস্মা হি একপঞ্ঞাস-খণৰূপক্খণং তথা;

সত্তৰসচিত্তক্খণং, তিখণন্তি চ ৱুচ্চতি.

৮৬৩. চিত্তক্খণং হি তিণ্ণন্নং, তত্থ ৱিঞ্ঞত্তিকদ্ৱযং;

লক্খণত্তযৰূপং তু, সলক্খণৱৱত্থিতং.

৮৬৪. তস্মা হিত্ৱা দ্ৱযঞ্চেতং, বাৱীসতিৱিধম্পি চ;

ৰূপং নাম চতুক্কঞ্চ, সলক্খণনিযামিতং.

৮৬৫. একুপ্পাদনিৰোধা চ, তত্থ তুল্যক্খণা মতা;

অতুল্যক্খণধম্মানং, সিযা ভেদং যথাৰহং.

৮৬৬. পটিসন্ধিক্খণে জাতং, তস্মা ৰূপং ততো পৰং;

সত্তৰসমচিত্তস্স, ভঙ্গেন সহ ভিজ্জতি.

৮৬৭. তস্স ঠিতিক্খণে জাতং, ৰূপম্পি চ ততো পৰং;

অট্ঠাৰসমচিত্তস্স, উপ্পাদে পন ভিজ্জতি.

৮৬৮. তস্স ভঙ্গক্খণে জাতং, ৰূপম্পি চ ততো পৰং;

অট্ঠাৰসমচিত্তস্স, ঠিতিকালেসু ভিজ্জতি.

৮৬৯. তথা দুতিযচিত্তস্স, উপ্পাদম্হি সমুট্ঠিতং;

অট্ঠাৰসমচিত্তস্স, ভঙ্গেন সহ ভিজ্জতি.

৮৭০. ইতি ৱুত্তনিযামেন, সজাতিক্খণতো পৰং;

ঠত্ৱা একূনপঞ্ঞাস, খণানি পুন ভিজ্জতি.

৮৭১. তস্মা একূনপঞ্ঞাস, কলাপা সহ ৱত্তৰে;

একো জাযতি একো চ, ভিজ্জতীতি চ সব্বথা.

৮৭২. একসন্ততিসম্বন্ধা, কলাপা সহ কম্মজা;

যথানুপুব্বঘটিতা, একপঞ্ঞাস লব্ভৰে.

৮৭৩. সত্তৱীস পনিচ্চেৱং, কামে দ্ৱে ৰূপভূমিযং;

ৰূপসন্ততিসীসানং, ৰাসযো সত্তকাদযো.

৮৭৪. একূনতিংস সব্বেপি, কম্মজাতা যথাৰহং;

একপঞ্ঞাস ঘটিকা, পৱত্তন্তি খণে খণে.

৮৭৫. তত্থ সন্ধিক্খণে জাতং, সত্তৰসমচেতসো;

উপ্পাদে ভিজ্জতিচ্চেৱং, ৱুত্তো অট্ঠকথানযো.

৮৭৬. তং নযং পটিবাহিত্ৱা, চিত্তেন সহ ভিজ্জতি;

চিত্তেন সহ জাতন্তি, ৱুত্তমাচৰিযেন হি.

৮৭৭. আনাপানতক্কচাৰা, একুপ্পাদনিৰোধকা;

ৱুত্তা হি যমকে কাযৱচীসঙ্খাৰনামকা.

৮৭৮. চিত্তুপ্পাদক্খণে জাতা, উতু তস্স ঠিতিক্খণে;

ৰূপং জনেতি তত্থাপি, উতু ভঙ্গক্খণেপি চ.

৮৭৯. অনুপুব্বক্কমেনেৱং, জাতং ৰূপং তথাপৰং;

অট্ঠাৰসমউপ্পাদট্ঠিতিআদীসু ভিজ্জতি.

৮৮০. ইত্থং কলাপা ঘটিতা, উতুজাহাৰজাপি চ;

একসন্ততিসম্বন্ধা, একপঞ্ঞাস লব্ভৰে.

৮৮১. কলাপা চিত্তজা যস্মা, উপ্পাদক্খণসম্ভূতা;

ঘটিকা সহ লব্ভন্তি, তস্মা সত্তৰসেৱ তে.

৮৮২. সব্বেপি ৰূপজনকা, চিত্তুপ্পাদে যথাসকং;

জনেন্তি ঠিতিভঙ্গেসু, ন জনেন্তীতি কেচনা.

৮৮৩. কুসলাব্যাকতাদীনং, একুপ্পাদনিৰোধতা;

ধম্মানং যমকে ৱুত্তা, ইতি পাড়ি ৱদন্তি চ.

৮৮৪. কুসলাদিকসম্বন্ধা, তত্থ তত্থ হি দেসিতা;

ইতি ৱত্ৱা পুৰে ৱুত্তং, ইচ্ছন্তাচৰিযা নযং.

৮৮৫. ইচ্চেৱং চতুসম্ভূতা, ৰূপসন্ততিৰাসযো;

ৰূপানি চ কলাপা চ, একাবদ্ধা যথাৰহং.

৮৮৬. সুত্তপৱত্তমত্তানং, সম্বুদ্ধানম্পি পাণিনং;

যাৱ মৰণকালাপি, পৱত্তন্তি নিৰন্তৰং.

৮৮৭. আযুক্খযা চ মৰণং, তথা কম্মক্খযা সিযা;

উভিন্নং ৱা খযা চাথ, উপচ্ছেদককম্মুনা.

৮৮৮. চতুধাপি মৰন্তস্স, তস্সেৱং তু যথাৰহং;

সত্তৰসচিত্তক্খণমত্তসেসম্হি জীৱিতে.

৮৮৯. উপৰিচ্চুতিচিত্তস্স, সত্তৰসমচেতসো;

ঠিতিকালমুপাদায, ন তু জাযতি কম্মজং.

৮৯০. তস্সুপ্পাদক্খণে জাতং,

ৰূপঞ্চ চুতিযা সহ;

ভিজ্জতীতি মতো নাম,

ততো হোতি স পুগ্গলো.

৮৯১. চিত্তজাহাৰজঞ্চাপি, ন জাযতি ততো পৰং;

উতুসম্ভৱৰূপং তু, অৱসিস্সতি ৱা ন ৱা.

৮৯২. ততো ৱুত্তনযেনেৱ, মতসত্তো যথাৰহং;

মিস্সামিস্সাহি সন্ধীহি, পুনদেৱোপপজ্জতি.

৮৯৩. ততো ৱুত্তনযেনেৱ, একূনতিংস কম্মজা;

তেসমুট্ঠানিকা পঞ্চ, চতুত্তিংস সমিস্সিতা.

৮৯৪. কলাপা ৰাসযো হোন্তি, সত্তৱীসতিভূমিসু;

ইতি সব্বপকাৰেন, ৰূপধম্মা পকাসিতাতি.

ইতি ৰূপৱিভাগে পকিণ্ণককথা নিট্ঠিতা.

দ্ৱাৱীসতিমো পৰিচ্ছেদো.

নিট্ঠিতো চ সব্বথাপি ৰূপৱিভাগো.