ৱীসতিমো পৰিচ্ছেদো

২০. কলাপকথা

৭৫৪. ইতি ৱুত্তপ্পকাৰেন, সব্বং ৰূপম্পি পিণ্ডিতং;

সহৱুত্তিনিযামেন, একৱীসৱিধং কথং.

৭৫৫. কম্মং চিত্তোতুকাহাৰসমুট্ঠানা যথাক্কমং;

নৱ ছ চতুৰো দ্ৱে চ, কলাপা একৱীসতি.

৭৫৬. জীৱিতঞ্চাৱিনিব্ভোগ-ৰূপানি চ যথাক্কমং;

চক্খাদিকেহি যোজেত্ৱা, দসকা অট্ঠ দীপিতা.

৭৫৭. চক্খুসোতঘানজিৱ্হাদসকা চ চতুব্বিধা;

কাযিত্থিপুম্ভাৱৱত্থুদসকা চ তথাপৰে.

৭৫৮. জীৱিতেনাৱিনিব্ভোগৰূপানি নৱকন্তি চ;

নৱেতে কম্মজা নাম, কলাপা সমুদীৰিতা.

৭৫৯. অৱিনিব্ভোগৰূপানি, সুদ্ধট্ঠকমথাপৰং;

কাযৱিঞ্ঞত্তিনৱকং, কাযৱিঞ্ঞত্তিযা সহ.

৭৬০. ৱচীৱিঞ্ঞত্তিদসকং, সদ্দেন সহৱুত্তিতো;

লহুতাদেকাদসকং, তিণ্ণন্নং সহ সম্ভৱা.

৭৬১. কাযৱিঞ্ঞত্তিলহুতাদীহি দ্ৱাদসকং ভৱে;

ৱচীৱিঞ্ঞত্তিলহুতাদীহি তেৰসকং তথা.

৭৬২. ইতি চিত্তসমুট্ঠানা, কলাপা ছ পকাসিতা;

ৰূপাকাৰৱিকাৰম্পি, সঙ্গহেত্ৱা যথাৰহং.

৭৬৩. সুদ্ধট্ঠকং তু পঠমং, সদ্দেন নৱকং ভৱে;

লহুতাদেকাদসকং, লহুতাদীহি তীহিপি.

৭৬৪. সদ্দেন লহুতাদীহি, তথা দ্ৱাদসকন্তি চ;

কলাপা উতুসম্ভূতা, চতুধাৱ পকিত্তিতা.

৭৬৫. সুদ্ধট্ঠকঞ্চ পঠমং, আহাৰজমথাপৰং;

লহুতাদেকাদসকং, ইতি দ্ৱে ওজজা মতা.

৭৬৬. কলাপানং পৰিচ্ছেদলক্খণত্তা ৱিচক্খণা;

ন কলাপঙ্গমিচ্চাহু, আকাসং লক্খণানি চ.

৭৬৭. তত্থ চেকূননৱুতি, তেসট্ঠি চ যথাক্কমং;

তালীসেকূনৱীসা চ, কলাপঙ্গানি তানি চ.

৭৬৮. লক্খণাকাসৰূপানি, কলাপেসু তহিং তহিং;

পঞ্চ পঞ্চেতি ৰূপানি, তিসতং সোড়সাধিকং.

৭৬৯. অগহীতগ্গহণেন, অট্ঠৱীসৱিধানিপি;

ৰূপকোট্ঠাসনামেন, পঞ্চৱীসতি ভাৱযে.

৭৭০. ভূতত্তযং তু ফোট্ঠব্বং, কত্ৱাপচযসন্ততিং;

জাতিমেকঞ্চ কত্ৱা ৱা, ৱিনাথ হদযং তহিং.

৭৭১. ধম্মসঙ্গণিযং হেতং, ৰূপকণ্ডে সৰূপতো;

ৱত্থুৰূপং ন নিদ্দিট্ঠং, পট্ঠানে দেসিতং তু তং.

৭৭২. দ্ৱে সদ্দনৱকা চেৱ,

তযো সুদ্ধট্ঠকাপি চ;

দ্ৱে দ্ৱে চিত্তোতুসম্ভূতা,

একো আহাৰজোতি চ.

৭৭৩. তেসমুট্ঠানিকা পঞ্চ, কম্মজানি নৱেতি চ;

ৰূপৰূপৱসেনেতে, কলাপা চুদ্দসেৰিতা.

৭৭৪. দসকেস্ৱেৱ সঙ্গয্হ, জীৱিতনৱকং তহিং;

ভাৱদ্দসকমেকং ৱা, কত্ৱা ৱত্থুং ৱিনা তথা.

৭৭৫. সদ্দা চিত্তোতুজা দ্ৱেৱ, তেসমুট্ঠানিকা তযো;

সুদ্ধট্ঠকা চ সত্তেৱ, কম্মজা দসকানি চ.

৭৭৬. ছন্নৱূতিৱিধং তত্থ, ৰূপং ভাসন্তি পণ্ডিতা;

অগহীতগ্গহণেন, অট্ঠাৰসৱিধং ভৱে.

৭৭৭. তেসমেৱ কলাপানং, সত্তকচ্ছক্কপঞ্চকা;

চতুক্কা চ তিকদ্ৱিকা, এককা চ যথাৰহং.

৭৭৮. দ্ৱে সত্ত নৱ ছ তযো, তযোপি চ যথাক্কমং;

চত্তাৰোতি চতুত্তিংস, সহৱুত্তিকৰাসযো.

৭৭৯. চক্খুসোতঘানজিৱ্হা-কাযৱত্থুৱসা সিযুং;

ইত্থিপুম্ভাৱদসকসহিতা সত্তকা দ্ৱিধা.

৭৮০. চক্খুসোতঘানহীনা, পচ্চেকং দ্ৱে সভাৱকা;

অভাৱতো ভাৱহীনো, ইত্থং ছক্কাপি সত্তধা.

৭৮১. চক্খুসোতৱিহীনা চ,

চক্খুঘানৱিহীনকা;

সোতঘানৱিহীনা চ,

সভাৱা দ্ৱে তযো তযো.

৭৮২. চক্খাদেকেকতো হীনা,

তিৱিধাপি অভাৱতো;

ইচ্চেৱং পঞ্চকা নাম,

নৱকা ৰাসযো সিযুং.

৭৮৩. চক্খাদিত্তযহীনাৱ, একতো দ্ৱে সভাৱকা;

চক্খাদিত্তযতো দ্ৱীহি, তযো হীনা অভাৱকা.

৭৮৪. ৰূপলোকে চক্খুসোত-ৱত্থুজীৱিতনৱকা;

চত্তাৰোৱ কলাপাতি, চতুক্কা ছ যথাৰহং.

৭৮৫. জিৱ্হাকাযৱত্থুৱসা,

অভাৱো দ্ৱে সভাৱকা;

কাযভাৱৱত্থুৱসা,

ইতি হোন্তি তযো তিকা.

৭৮৬. কাযৱত্থুৱসেনেকো, দ্ৱে চ চিত্তোতুসম্ভৱা;

সদ্দনৱকট্ঠকাতি, দুকা চ তিৱিধা সিযুং.

৭৮৭. জীৱিতনৱকঞ্চেকং, তেসমুট্ঠানিকানি চ;

সুদ্ধট্ঠকানি তীণীতি, চত্তাৰো এককা সিযুং.

৭৮৮. চতুত্তিংস পনিচ্চেতে, সন্ধিযঞ্চ পৱত্তিযং;

ৰূপৰূপকলাপানং, ৰাসযো হোন্তি সম্ভৱা.

৭৮৯. সত্ততি সট্ঠিমিচ্চেৱমাদিনা চ যথাৰহং;

কলাপৰাসিৰূপানি, তত্থ তত্থ ৱিভাৱযে.

৭৯০. সোড়স পঞ্চদসেতিআদিভেদৱসাপি চ;

অগহীতগ্গহণেন, তত্থ তত্থ ৱিনিদ্দিসে.

৭৯১. চতুচত্তালীসসতং, কলাপা হোন্তি পিণ্ডিতা;

ছব্বীস তত্থ ৰূপানি, সহস্সঞ্চ চতুস্সতং.

৭৯২. ইচ্চাপাযচতুক্কে চ, কামে সুগতিসত্তকে;

ৰূপে চ পঞ্চদসকে, অসঞ্ঞাপাযভূমিযং.

৭৯৩. চতুকোট্ঠাসিকেস্ৱেৱ, সত্তৱীসৱিধেসুপি;

জাতিট্ঠানেসু সত্তানং, সন্ধিযঞ্চ পৱত্তিযং.

৭৯৪. ইন্দ্ৰিযবদ্ধসন্তানে, তথানিন্দ্ৰিযকম্হি চ;

বহিসঙ্খাৰসন্তানে, মতকাযে চ সম্ভৱা.

৭৯৫. লব্ভমানকলাপা চ, কলাপানঞ্চ ৰাসযো;

তত্থ ৱিত্থাৰসঙ্খেপা, ৰূপানং গণনাপি চ.

৭৯৬. এত্থ ৰূপা অৱুত্তা হি, যথাৱুত্তানুসাৰতো;

ৱিত্থাৰেত্ৱান ৱিঞ্ঞেয্যা, সব্বথাপি চ ৱিঞ্ঞুনাতি.

ইতি ৰূপৱিভাগে কলাপকথা নিট্ঠিতা.

ৱীসতিমো পৰিচ্ছেদো.