একৱীসতিমো পৰিচ্ছেদো

২১. উপ্পত্তিকথা

৭৯৭. অট্ঠৱীসতি ৰূপানি, কলাপা চেকৱীসতি;

ৱুত্তা চেত্তাৱতা তেসং, উপ্পাদো দানি নিয্যতে.

৭৯৮. অণ্ডজা জলাবুজা চ, সংসেদজোপপাতিকা;

ইচ্চুপ্পত্তিপভেদেন, চতস্সো যোনিযো মতা.

৭৯৯. ভুম্মৱজ্জেসু দেৱেসু,

পেতে নিজ্ঝামতণ্হিকে;

নিৰযেসু চ সম্ভোতি,

যোনেকাৱোপপাতিকা.

৮০০. ভুম্মদেৱে মনুস্সেসু,

তিৰচ্ছানাসুৰে তথা;

পেতেসু চাৱসেসেসু,

চতস্সোপি চ যোনিযো.

৮০১. তত্থণ্ডজা জলাবুজা, গব্ভসেয্যসমুগ্গমো;

সংসেদজোপপাতিকা, ওপপাতিকনামকা.

৮০২. তত্থ সম্পুণ্ণাযতনো, গব্ভসেয্যসমুগ্গমো;

অভাৱো দ্ৱে সভাৱা চ, ইত্থিপুম্ভাৱমিস্সিতা.

৮০৩. পৰিপুণ্ণাপৰিপুণ্ণো, ওপপাতিকনামকো;

অভাৱো দ্ৱে সভাৱা চ, চতুৰাপাযভূমিযং.

৮০৪. সম্পুণ্ণাযতনোৱেসো,

কামে সুগতিযং পন;

আদিকপ্পে অভাৱো চ,

দ্ৱে সভাৱা ততো পৰং.

৮০৫. অপৰিপুণ্ণাযতনো, অভাৱো চ মহগ্গতে;

ইচ্চেৱং দসধা হোন্তি, সব্বা সন্ধিসমুগ্গমা.

৮০৬. তত্থেৱ দসধা ভিন্নে, অত্তভাৱসমুগ্গমে;

সন্ধিযঞ্চ পৱত্তে চ, ৰূপুপ্পত্তিং ৱিভাৱযে.

৮০৭. তত্থাভাৱকসত্তানং, গব্ভসেয্যসমুগ্গমে;

কাযৱত্থুৱসা দ্ৱেৱ, দসকা হোন্তি কম্মজা.

৮০৮. ৰূপসন্ততিসীসানি, দ্ৱে চ ৰূপানি ৱীসতি;

অগহীতগ্গহণেন, তত্থেকাদস নিদ্দিসে.

৮০৯. ততো পৰং পৱত্তিম্হি, ৱড্ঢমানস্স জন্তুনো;

চক্খুদসকাদযো চ, চত্তাৰো হোন্তি সম্ভৱা.

৮১০. ইচ্চাভাৱকসত্তানং, ছড়েৱুত্তমকোটিযা;

হেট্ঠিমকোটিযা দ্ৱেৱ, গব্ভসেয্যসমুগ্গমে.

৮১১. চক্খুসোতঘানৱসা, তত্থ তিদ্ৱেকহীনকা;

একো তযো তযো চেৱ, সিযুংতিচতুপঞ্চকা.

৮১২. ওপপাতিকসঙ্খাতে, অভাৱকসমুগ্গমে;

জিৱ্হাকাযৱত্থুৱসা, তযো হেট্ঠিমকোটিযা.

৮১৩. উত্তমকোটিযা হোন্তি, ছড়েৱোভিন্নমন্তৰে;

চতুক্কপঞ্চকা তত্থ, দ্ৱেকহীনা তযো তযো.

৮১৪. ছক্কাদযো অভাৱানং,

ইচ্চেৱং পঞ্চসঙ্গহা;

একো তযো তযো চেকো,

একোতি চ যথাক্কমং.

৮১৫. সভাৱকানং দ্ৱিন্নম্পি, দুৱিধা সত্তকাদযো;

ভাৱাদিকা যথাৱুত্তা, নৱধা নৱধা সিযুং.

৮১৬. সত্তেৱুত্তমতো হেট্ঠা, তিচতুক্কা তদন্তৰে;

চতুক্কপঞ্চকচ্ছক্কা, পঞ্চছক্কাপি চ দ্ৱিধা.

৮১৭. তিণ্ণন্নম্পি ৱসেনেৱ, সত্তকচ্ছক্কপঞ্চকা;

চতুক্কতিকদুক্কা চ, ছ কোট্ঠাসা যথাৰহং.

৮১৮. দ্ৱে সত্ত চ নৱ পঞ্চ, তযো চেকো যথাক্কমং;

ৰূপসন্ততিসীসানং, ৰাসযো সত্তৱীসতি.

৮১৯. কম্মজাতা যথাযোগং, পৱত্তন্তি খণে খণে;

কামাৱচৰসত্তানং, পটিসন্ধিপৱত্তিযং.

৮২০. তত্থ সন্ততিসীসানি, ৰূপানি চ যথাৰহং;

পুব্বে ৱুত্তনযেনেৱ, সব্বত্থাপি ৱিনিদ্দিসে.

৮২১. সীতুণ্হোতুসমঞ্ঞাতা,

তেজোধাতু ঠিতিক্খণে;

ভূতা সন্ধিক্খণে ৰূপং,

জনেতি উতুজট্ঠকং.

৮২২. পটিসন্ধিমতিক্কম্ম, চিত্তং চিত্তজমট্ঠকং;

ভৱঙ্গাদিমুপাদায, জনেতুপ্পত্তিযং পন.

৮২৩. ভুত্তাহাৰো ঠিতিপ্পত্তো, মাতৰা চ সযম্পি চ;

সৰীৰানুগতো হুত্ৱা, জনেতাহাৰজট্ঠকং.

৮২৪. ইতি সুদ্ধট্ঠকানি চ, তেসমুট্ঠানিকাপৰে;

সদ্দৱিঞ্ঞত্তিলহুতা, সম্ভৱে সম্ভৱন্তি চ.

৮২৫. ইত্থং চতুসমুট্ঠানা, কলাপা কামভূমিযং;

যাৱজীৱং পৱত্তন্তি, দীপজালাৱ সন্ততি.

৮২৬. চক্খুসোতৱত্থুৱসা, দসকা চ তযো পৰং;

জীৱিতনৱকঞ্চেৱ, ৰূপাৱচৰভূমিযং.

৮২৭. হোন্তি সন্ধিপৱত্তীসু, চত্তাৰো কম্মজা সদা;

পুব্বে ৱুত্তনযেনেৱ, পৱত্তে উতুচিত্তজা.

৮২৮. জীৱিতনৱকঞ্চেকং, পটিসন্ধিপৱত্তিযং;

পৱত্তে উতুজঞ্চেতি, দ্ৱেধাসঞ্ঞীনমুদ্দিসে.

৮২৯. ইচ্চুপ্পত্তিকমং ঞত্ৱা, ৱিভাৱেয্য ততো পৰং;

কলাপানঞ্চ ৰূপানং, সম্ভৱাসম্ভৱম্পি চ.

৮৩০. ইন্দ্ৰিযবদ্ধসন্তানে, সব্বে সম্ভোন্তি সম্ভৱা;

কলাপা চেৱ ৰূপানি, তথা সন্ততিৰাসযো.

৮৩১. বহিদ্ধা মতকাযে চ, নোপলব্ভন্তি কম্মজা;

চিত্তোজজা কলাপা চ, উতুজা লহুতাদযো.

৮৩২. তথা সুদ্ধট্ঠকসদ্দ-নৱকঞ্চোতু সব্বথা;

কলাপা তত্থ লব্ভন্তি, দ্ৱে চ ৰূপানি উদ্দিসে.

৮৩৩. তেসমুট্ঠানিকা সব্বে, কলাপা নত্থি সন্ধিযং;

উপ্পাদকালে সব্বত্থ, জৰতানিচ্চতাপি চ.

৮৩৪. কলাপা কম্মজা সন্তি, জাতিৰূপঞ্চ সন্ধিযং;

ৰূপানি চ কলাপা চ, সব্বেপি চ পৱত্তিযং.

৮৩৫. সন্তি সব্বানি ৰূপানি, কামেসু চতুসম্ভৱা;

জীৱিতনৱকং হিত্ৱা, কলাপা হোন্তি ৱীসতি.

৮৩৬. দসকেস্ৱেৱ গহিতং, ৱিসুং কামে ন লব্ভতি;

জীৱিতনৱকং নাম, ৰূপলোকে ৱিসুং সিযা.

৮৩৭. আহাৰজকলাপা চ, ভাৱা দ্ৱে চাদিকপ্পিকে;

আদিকালে ন লব্ভন্তি, পচ্ছা লব্ভন্তি কেচিপি.

৮৩৮. ঘানজিৱ্হাকাযভাৱ-দসকা ৰূপভূমিযং;

আহাৰজকলাপা চ, ন লব্ভন্তেৱ সব্বথা.

৮৩৯. চক্খুসোতৱত্থুসদ্দা, কলাপা চিত্তজাপি চ;

অসঞ্ঞিভূমিযং পুব্বে, ৱুত্তাপি চ ন লব্ভৰে.

৮৪০. কলাপা সত্ত ৰূপানি, পঞ্চ ৰূপেস্ৱসঞ্ঞিসু;

নত্থেকাদস ৰূপানি, কলাপেকূনৱীসতি.

৮৪১. তস্মা তেৱীস ৰূপানি, কলাপা পন চুদ্দস;

তেসমুট্ঠানিকা সন্তি, ৰূপাৱচৰভূমিযং.

৮৪২. সত্তৰসেৱ ৰূপানি, কলাপা দ্ৱে দ্ৱিসম্ভৱা;

অসঞ্ঞীনং তু সম্ভোন্তি, নত্থাৰূপেসু কিঞ্চিপি.

৮৪৩. উপ্পত্তিক্কমমিচ্চেৱং, সম্ভৱাসম্ভৱম্পি চ;

কলাপানঞ্চ ৰূপানং, যথাযোগং ৱিভাৱযেতি.

ইতি ৰূপৱিভাগে উপ্পত্তিকথা নিট্ঠিতা.

একৱীসতিমো পৰিচ্ছেদো.