১৯. পভেদকথা

৭০৬. অট্ঠৱীসৱিধম্পেতং, ৰূপং দানি যথাৰহং;

ভূতৰূপাদিভেদেহি, ৱিভজেয্য ৱিচক্খণো.

৭০৭. পথৱাদিকমিদন্তি, ভূতৰূপং চতুব্বিধং;

উপাদাৰূপমঞ্ঞং তু, চতুৱীসতিৱিধং ভৱে.

৭০৮. পঞ্চৱিধম্পি চক্খাদিৰূপমজ্ঝত্তিকং মতং;

তেৱীসতিৱিধং সেসং, বাহিৰন্তি পৱুচ্চতি.

৭০৯. ৰূপসদ্দগন্ধৰসফোট্ঠব্বা সত্ত পঞ্চধা;

পঞ্চপ্পসাদৱিসযা, পঞ্চাৰম্মণনামকা.

৭১০. একৱীসতিৱিধং সেসং, ধম্মাৰম্মণসঙ্গহং;

মনোৱিঞ্ঞাণৱিঞ্ঞেয্যং, মনোদ্ৱাৰস্স গোচৰং.

৭১১. পসাদা ৱিসযা চেৱ, পঞ্চকা দ্ৱেপি সম্ভৱা;

দ্ৱাদসাপি সৰূপেন, দসাযতনধাতুযো.

৭১২. যদেদং পন সব্বম্পি, ৰূপং সপ্পটিঘং মতং;

তদেৱোড়াৰিকং নাম, সন্তিকেতি পৱুচ্চতি.

৭১৩. সেসমপ্পটিঘং নাম, ধম্মাযতনধাতু চ;

সুখুমঞ্চেৱ ৰূপঞ্চ, ৰূপং সোড়সধা ঠিতং.

৭১৪. ছব্বিধা ৱত্থুৰূপং তু, পসাদহদযম্পি চ;

অৱত্থুৰূপং সেসং তু, দ্ৱাৱীসতিৱিধং ভৱে.

৭১৫. পসাদা চেৱ ৱিঞ্ঞত্তি, দ্ৱাৰৰূপং তু সত্তধা;

সেসং অদ্ৱাৰৰূপং তু, একৱীসৱিধম্পি চ.

৭১৬. পসাদা ভাৱযুগড়ং, জীৱিতঞ্চেতি অট্ঠধা;

ইন্দ্ৰিযৰূপমঞ্ঞং তু, ৱীসধানিন্দ্ৰিযং সিযা.

৭১৭. ৱণ্ণো গন্ধো ৰসো ওজা, ভূতৰূপন্তি অট্ঠধা;

অৱিনিব্ভোগমিতৰং, ৱিনিব্ভোগং তু ৱীসধা.

৭১৮. অৱিনিব্ভোগৰূপানি, সদ্দৱত্থিন্দ্ৰিযানি চ;

নিপ্ফন্নং অট্ঠাৰসধা, ৰূপৰূপন্তি ৱেদিতং.

৭১৯. পৰিচ্ছেদো পনাকাসো, ৱিঞ্ঞত্তিলহুতাদযো;

ৱিকাৰা লক্খণা চেৱ, ৰূপস্সুপচযাদযো.

৭২০. দসধাপি অনিপ্ফন্নং, নত্থেতং পৰমত্থতো;

ৰূপস্সেতন্তি কত্ৱান, ৰূপমিচ্চেৱ ৱুচ্চতি.

৭২১. ৰূপাযতনমেৱেকং, সনিদস্সনমীৰিতং;

অনিদস্সনমঞ্ঞং তু, সত্তৱীসতিৱিধম্পি চ.

৭২২. কম্মজং পনুপাদিন্নং, অনুপাদিন্নকাপৰং;

তিৱিধং চিত্তজঞ্চেৱ, উতুজাহাৰজন্তি চ.

৭২৩. চক্খুসম্ফস্সৱত্থূতি, চক্খুধাতু পকিত্তিতা;

ন ৱত্থু তস্স সেসং তু, সত্তৱীসতিৱিধং ভৱে.

৭২৪. সোতসম্ফস্সৱত্থাদি-ৱসা চ দুৱিধা তথা;

তিৱিধা চ ৱিভাৱেয্য, যথাসম্ভৱতো কথং.

৭২৫. সনিদস্সনৰূপঞ্চ, ৱণ্ণো সপ্পটিঘম্পি চ;

অনিদস্সনমঞ্ঞং তু, থূলং সপ্পটিঘং ভৱে.

৭২৬. অনিদস্সনৰূপঞ্চ, সেসমপ্পটিঘম্পি চ;

সোড়সাতি চ সব্বম্পি, ৰূপং তিৱিধমুদ্দিসে.

৭২৭. অপত্তগাহকং নাম, চক্খুসোতদ্ৱযং পন;

সম্পত্তগাহকং নাম, ঘানাদিত্তযমীৰিতং.

৭২৮. অগাহকমতো সেসং, তেৱীসতিৱিধং ভৱে;

কিঞ্চি সাৰম্মণং নাম, ন গয্হতীতি সব্বথা.

৭২৯. উপাদা অজ্ঝত্তিকং ৰূপং, উপাদা বাহিৰং তথা;

নোপাদা বাহিৰঞ্চেতি, এৱম্পি তিৱিধং ভৱে.

৭৩০. অজ্ঝত্তিকমুপাদিন্নং, বাহিৰঞ্চ তথাপৰং;

অনুপাদিন্নকঞ্চেতি, এৱমাদিৱসাপি চ.

৭৩১. দিট্ঠং ৰূপং সুতং সদ্দো, গন্ধাদি তিৱিধং মুতং;

ৱিঞ্ঞাতমঞ্ঞৱিঞ্ঞেয্যং, মনসাতি চতুব্বিধং.

৭৩২. ৰূপৰূপং পৰিচ্ছেদো, ৱিকাৰো লক্খণং কমা;

অট্ঠাৰসেককং পঞ্চ, চতুক্কন্তি চ তং তথা.

৭৩৩. দ্ৱাৰঞ্চ হোতি ৱত্থু চ, ন ৱত্থু দ্ৱাৰমেৱ তু;

ন দ্ৱাৰং ৱত্থুমেৱাথ, নোভযন্তি চ নিদ্দিসে.

৭৩৪. উপাদা অনুপাদিন্নং, অনুপাদিন্নকং তথা;

নোপাদা দুৱিধঞ্চেতি, চতুদ্ধেৱম্পি দেসিতং.

৭৩৫. সপ্পটিগ্ঘমুপাদা চ, ৰূপমপ্পটিঘং তথা;

নোপাদা দুৱিধঞ্চেতি, চতুদ্ধা এৱমাদিতো.

৭৩৬. একাদসেকজৰূপং, হদযিন্দ্ৰিযনৱকং;

কম্মজং চিত্তজঞ্চেৱ, তথা ৱিঞ্ঞত্তিকং দ্ৱযং.

৭৩৭. সদ্দো চিত্তোতুজো তস্মা, ৰূপমেকং দ্ৱিজং মতং;

চিত্তোতাহাৰসম্ভূতং, লহুতাদিত্তযং তিজং.

৭৩৮. নৱাকাসাৱিনিব্ভোগা, কম্মাদিচতুসম্ভৱা;

অথ লক্খণৰূপন্তি, ৰূপমেৱং তু পঞ্চধা.

৭৩৯. নৱাকাসাৱিনিব্ভোগা, নৱ ৱত্থিন্দ্ৰিযানি চ;

অট্ঠাৰসৱিধং ৰূপং, কম্মজং হোতি পিণ্ডিতং.

৭৪০. সদ্দাকাসাৱিনিব্ভোগা, ৱিঞ্ঞত্তিলহুতাদযো;

পঞ্চদসৱিধং ৰূপং, চিত্তসম্ভৱমুদ্দিসে.

৭৪১. সদ্দাকাসাৱিনিব্ভোগা, লহুতাদিত্তযন্তি চ;

উতুসম্ভৱমীৰেন্তি, ৰূপং তেৰসধা ঠিতং.

৭৪২. পৰিচ্ছেদাৱিনিব্ভোগা, লহুতাদিত্তযম্পি চ;

এৱমাহাৰজং নাম, ৰূপং দ্ৱাদসধা ঠিতং.

৭৪৩. জাতি জৰা চ মৰণং, ন কুতোচিপি জাযতি;

এৱম্পি পঞ্চধা হোতি, ৰূপজাতিৱিভাগতো.

৭৪৪. পঞ্চৱীসতিৱিধং কম্মং, কামৰূপৱৱত্থিতং;

জনেতি কম্মজং ৰূপং, কামৰূপভৱদ্ৱযে.

৭৪৫. পঞ্চৱিঞ্ঞাণমাৰুপ্প-ৱিপাকা সব্বসন্ধিযো;

চুতি খীণাসৱস্সেতি, সোড়সেতে ৱিৱজ্জযে.

৭৪৬. পঞ্চসত্ততি সেসানি, চিত্তানিমানি সম্ভৱা;

জনেন্তি চিত্তজং ৰূপং, পঞ্চৱোকাৰভূমিযং.

৭৪৭. জনেভি উতুজং ৰূপং, তেজোধাতু ভৱদ্ৱযে;

কামভূমিযমোজা তু, জনেতাহাৰজং তথা.

৭৪৮. কম্মং জনেতি ৰূপানি, অত্তজানি খণে খণে;

চিত্তমুপ্পাদকালম্হি, উপ্পাদানন্তৰং পৰং.

৭৪৯. উতুসম্ভৱমীৰেন্তি, ৰূপং তেৰসধা ঠিতং;

পৰিচ্ছেদাৱিনিব্ভোগা, লহুতাদিত্তযম্পি চ.

৭৫০. সন্ধিযম্পি কম্মজং তু, পৱত্তেপি চ সম্ভৱা;

জনেতি ৰূপং সেসানি, পৱত্তে, ন তু সন্ধিযং.

৭৫১. ইন্দ্ৰিযবদ্ধসন্তানে, কম্মাদি তিৱিধম্পি চ;

জনেতি ৰূপং মতকে, বাহিৰে তু যথাৰহং.

৭৫২. ইতি কম্মাদযো ৰূপং, জনেন্তি চ যথাসকং;

সেসানম্পি চ ৰূপানং, পচ্চযা হোন্তি সম্ভৱা.

৭৫৩. ইতি ৰূপৱিভাগঞ্চ, জাতিভেদঞ্চ সম্ভৱা;

জনকাদিপ্পভেদঞ্চ, ৰূপানং তত্থ দীপযেতি.

ইতি ৰূপৱিভাগে পভেদকথা নিট্ঠিতা.

একূনৱীসতিমো পৰিচ্ছেদো.