১৩. ৰাসিযোগকথা

৪৪১. ইতি ৰাসিৱীথিং ঞত্ৱা, লব্ভমানৱসা বুধো;

তেসমেৱাথ যোগম্পি, চিত্তুপ্পাদেসু দীপযে.

৪৪২. কামাৱচৰকুসলস্স, পঠমদ্ৱযমানসে;

সব্বেপি ৰাসযো হোন্তি, যথাসম্ভৱতো কথং.

৪৪৩. ফস্সপঞ্চকৰাসী চ, ঝানপঞ্চকৰাসি চ;

ইন্দ্ৰিযট্ঠকৰাসী চ, মগ্গপঞ্চকৰাসি চ.

৪৪৪. বলসত্তকৰাসী চ, হেতুকম্মপথত্তিকা;

দসাৱসেসা ৰাসী চ, লোকপালদুকাদযো.

৪৪৫. যেৱাপনকনৱকং, নিযতুদ্ধচ্চৱজ্জিতা;

অপ্পমঞ্ঞাদ্ৱযঞ্চেৱ, তিস্সো ৱিৰতিযোতি চ.

৪৪৬. ইতি সত্তৰসেৱেতে, দেসিতা চ সৰূপতো;

যেৱাপনকৰাসী চ, লব্ভন্তিট্ঠাৰসাপি চ.

৪৪৭. ছপ্পঞ্ঞাস পদানেত্থ, দেসিতানি সৰূপতো;

ধম্মা পন সমতিংস, তত্থ হোন্তি সৰূপতো.

৪৪৮. তানি যেৱাপনকেহি, পঞ্চসট্ঠি পদানি চ;

ধম্মা চেকূনতালীস, ভৱন্তি পন সম্ভৱা.

৪৪৯. তত্থ দ্ৱাদস ধম্মা চ, দেসিতা সৱিভত্তিকা;

অৱসেসা তু সব্বেপি, অৱিভত্তিকনামকা.

৪৫০. একদ্ৱি চ তিচতুক্ক-ছসত্তট্ঠানিকা পন;

সত্তৱীস চ সত্তেকো, দ্ৱেকেকো চ যথাক্কমং.

৪৫১. নিযতা তু চতুত্তিংস, ধম্মাৱ সহৱুত্তিতো;

যথাসম্ভৱৱুত্তিতো, পঞ্চধা নিযতা কথা.

৪৫২. তত্থ চানিযতে সব্বে, গহেত্ৱা চ পহায চ;

পচ্চেকঞ্চ গহেত্ৱাপি, সত্তধা যোজনক্কমো.

৪৫৩. সকিমেকূনতালীস, চতুত্তিংস যথাক্কমং;

পঞ্চক্খত্তুঞ্চ যোজেয্য, পঞ্চতিংসাতি পণ্ডিতো.

৪৫৪. ৰাসযো চ পদানীধ, ধম্মন্তৰৱিভত্তিযো;

সৰূপযেৱাপনকে, নিযতানিযতে যথা.

৪৫৫. যোজনানযভেদঞ্চ, গণনাসঙ্গহট্ঠিতি;

লব্ভমানানুমানেন, সল্লক্খেন্তো তহিং তহিং.

৪৫৬. ঞাণং ঞাণৱিযুত্তম্হি, হিত্ৱা পীতিং উপেক্খিতে;

ৱেদনা পৰিৱত্তেন্তো, কামপুঞ্ঞে চ সেসকে.

৪৫৭. মহাক্ৰিযে চ যোজেয্য, পহায ৱিৰতিত্তযং;

অপ্পমঞ্ঞা চ হিত্ৱাথ, মহাপাকে চ যোজযে.

৪৫৮. তক্কাদিং কমতো হিত্ৱা, সব্বত্থ ৱিৰতিত্তযং;

পঞ্চমে অপ্পমঞ্ঞায, হিত্ৱা ৰূপে চ যোজযে.

৪৫৯. হিত্ৱাপ্পমঞ্ঞা যোজযে, যথাঝানমনুত্তৰে;

লোকুত্তৰিন্দ্ৰিযঞ্চেৱ, গহেত্ৱা ৱিৰতিত্তযং.

৪৬০. ঝানানি চতুতালীস, সুখযুত্তানি ৱত্তৰে;

উপেক্খিতানি তেৱীস, পঞ্চমজ্ঝানে চ সব্বথা.

৪৬১. অপ্পমঞ্ঞাৱিৰতিযো, কামপুঞ্ঞেসু লব্ভৰে;

অপ্পমঞ্ঞা ৰূপজ্ঝান-চতুক্কে চ মহাক্ৰিযে.

৪৬২. লোকুত্তৰেসু সব্বত্থ, সম্ভোতি ৱিৰতিত্তযং;

নত্থিদ্ৱযম্পি আৰুপ্পে, মহাপাকে চ পঞ্চমে.

৪৬৩. ৱিতক্কাদিত্তযং পঞ্ঞা, পঞ্চ চানিযতা চলা;

হানিবুদ্ধিৱসা সেসা, ন চলন্তি কুদাচনং.

৪৬৪. বাৱীসতিৱিধো চেত্থ, সঙ্গহো অনৱজ্জকে;

দ্ৱযদ্ৱযৱসা চেৱ, ঝানপঞ্চকতোপি চ.

৪৬৫. ইতি ঞত্ৱানৱজ্জেসু, ৰাসিসঙ্গহ সম্ভৱং;

সাৱজ্জেসুপি ৱিঞ্ঞেয্যা, ৱিঞ্ঞুনা ৰাসযো কথং.

৪৬৬. লোভমূলেসু পঠমে, ফস্সপঞ্চকৰাসি চ;

ঝানপঞ্চকৰাসী চ, তথেৱিন্দ্ৰিযপঞ্চকং.

৪৬৭. মগ্গবলচতুক্কঞ্চ, হেতুকম্মপথদুকা;

লোকনাসকৰাসী চ, সমথো সমথদ্দুকা.

৪৬৮. তত্ৰমজ্ঝত্ততং হিত্ৱা, যেৱাপনকনামকা;

চত্তাৰো চেতি লব্ভন্তি, তত্থেকাদস ৰাসযো.

৪৬৯. দ্ৱত্তিংসেৱ পদানেত্থ, দেসিতানি সৰূপতো;

তানি যেৱাপনকেহি, ছত্তিংসেৱ ভৱন্তি চ.

৪৭০. অসম্ভিন্নপদানেত্থ, সমৱীসতি সম্ভৱা;

সৱিভত্তিকনামা চ, নৱ ধম্মা পকাসিতা.

৪৭১. একদ্ৱযতিচতুক্ক-ছট্ঠাননিযতা পন;

একাদস ছড়েকা চ, কমেনেকো পুনেককো.

৪৭২. নত্থেৱানিযতা হেত্থ, যেৱাপনকনামকা;

যোজনানযভেদো চ, তস্মা তত্থ ন ৱিজ্জতি.

৪৭৩. মানো চ থিনমিদ্ধঞ্চ, ইস্সা মচ্ছৰিযং তথা;

কুক্কুচ্চমিতি সাৱজ্জে, ছড়েৱানিযতা মতা.

৪৭৪. মানো দিট্ঠিৱিযুত্তেসু, সসঙ্খাৰেসু পঞ্চসু;

থিনমিদ্ধং তযো সেসা, পটিঘদ্ৱযযোগিনো.

৪৭৫. ইচ্চেৱমট্ঠ সাৱজ্জা, অনৱজ্জট্ঠৱীসতি;

ছত্তিংস মানসা সব্বে, হোন্তানিযতযোগিনো.

৪৭৬. তেহি যুত্তা যথাযোগং, একদ্ৱিত্তযপঞ্চহি;

দ্ৱে দ্ৱাৱীসং তযো চেৱ, নৱ চাথ যথাক্কমং.

৪৭৭. ইতি ৱুত্তানুসাৰেন, লব্ভমানৱসা পন;

তদঞ্ঞেসুপি যোজেয্য, সাৱজ্জেসু যথাক্কমং.

৪৭৮. লোভমূলেসু লোভঞ্চ, দোসঞ্চ পটিঘদ্ৱযে;

মোহমূলে কঙ্খুদ্ধচ্চং, গহেত্ৱা হেতুৰাসিযং.

৪৭৯. দিট্ঠিং দিট্ঠিৱিযুত্তম্হি, হিত্ৱা পীতিমুপেক্খিতে;

ৱেদনং পৰিৱত্তেন্তো, দোসমূলে চ পণ্ডিতো.

৪৮০. তথা কম্মপথং দিট্ঠিং,

পীতিং ছন্দঞ্চ মোমুহে;

কঙ্খিতে অধিমোক্খঞ্চ,

হিত্ৱা যোজেয্য ৰাসযো.

৪৮১. চিত্তস্স ঠিতিং পত্তাসু, চিত্তস্সেকগ্গতা পন;

কঙ্খিতে পৰিহীনাৱ, ইন্দ্ৰিযাদীসু পঞ্চসু.

৪৮২. ইতি দ্ৱাদসধা ঞত্ৱা, সাৱজ্জেসুপি সঙ্গহং;

অহেতুকেপি ৱিঞ্ঞেয্যা, যথাসম্ভৱতো কথং.

৪৮৩. অট্ঠাৰসাহেতুকেসু, পঞ্চৱিঞ্ঞাণমানসে;

ফস্সপঞ্চকৰাসী চ, ঝানট্ঠানদুকং তথা.

৪৮৪. ইন্দ্ৰিযত্তিকৰাসী চ, যেৱাপনকনামকো;

একো মনসিকাৰোতি, চত্তাৰো ৰাসযো সিযুং.

৪৮৫. অসম্ভিন্না পনট্ঠেৱ, দ্ৱে তত্থ সৱিভত্তিকা;

একদ্ৱযতিকট্ঠানা, ছড়েকো চ পুনেককো.

৪৮৬. মনোধাতুত্তিকাহেতু-পটিসন্ধিযুগে পন;

ৱিতক্কো চ ৱিচাৰো চ, অধিকা ঝানৰাসিযং.

৪৮৭. সুখসন্তীৰণে পীতি, দুতিযাৱজ্জনে পন;

ৱীৰিযঞ্চ সমাধিঞ্চ, লব্ভতিন্দ্ৰিযৰাসিযং.

৪৮৮. অধিকা হসিতে হোন্তি, পীতি চ ৱীৰিযাদযো;

যেৱাপনাধিমোক্খো চ, পঞ্চৱিঞ্ঞাণৱজ্জিতে.

৪৮৯. ইচ্চানৱজ্জে বাৱীস,

সাৱজ্জে দ্ৱাদসাপৰে;

যোগা হেতুম্হি পঞ্চেতে,

তালীসেকূনকা কথাতি.

ইতি চেতসিকৱিভাগে ৰাসিযোগকথা নিট্ঠিতা.

তেৰসমো পৰিচ্ছেদো.