চুদ্দসমো পৰিচ্ছেদো

১৪. ৰাসিসম্ভৱকথা

৪৯০. নৱেৱ যেৱাপনকা, অট্ঠাৰস চ ৰাসযো;

নৱভিংসতিসম্ভিন্না, দস দ্ৱে সৱিভত্তিকা.

৪৯১. একদ্ৱযতিচতুছসত্তট্ঠানানৱজ্জকে;

সত্তৱীসতি সত্তেকো, দ্ৱযমেকো পুনেককো.

৪৯২. দসেৱ যেৱাপনকা, একাদস চ ৰাসযো;

অট্ঠৱীসতিসম্ভিন্না, দসেৱ সৱিভত্তিকা.

৪৯৩. একদ্ৱযতিচতুক্কছট্ঠাননিযতা পন;

অট্ঠাৰস চ সত্তেকো, একো চেকোৱ পাপকে.

৪৯৪. দ্ৱে যেৱাপনকা হোন্তি, ৰাসযো চ চতুব্বিধা;

তেৰসেত্থ অসম্ভিন্না, তযোৱ সৱিভত্তিকা.

৪৯৫. একদ্ৱযতিকট্ঠানা, দস দ্ৱেকো অহেতুকে;

ইচ্চানৱজ্জা সাৱজ্জা-হেতুকে যোগনিচ্ছযো.

৪৯৬. সত্তাপি নত্থি সাৱজ্জে, নিৰৱজ্জে পকাসকো;

অহেতুকে চ মগ্গাদিৰাসযো নত্থি চুদ্দস.

৪৯৭. অনৱজ্জা তু সাৱজ্জে, সাৱজ্জকানৱজ্জকে;

চিত্তুপ্পাদম্হি নত্থেৱ, নত্থোভযমহেতুকে.

৪৯৮. সাৱজ্জা পন সাৱজ্জে, অনৱজ্জানৱজ্জকে;

গহেতব্বা তু সব্বত্থ, সাধাৰণা পকিণ্ণকা.

৪৯৯. ঝানপঞ্চকচিত্তেসু, সত্তসট্ঠিসু নিদ্দিসে;

ঝানঙ্গযোগভেদেন, ৰাসিভেদং তহিং তহিং.

৫০০. চতুছক্কানৱজ্জেসু, ঞাণপীতিকতং তথা;

চতুৱীস পৰিত্তেসু, চতুধা ভেদমুদ্দিসে.

৫০১. সৰাগৱীতৰাগানং, অপ্পমঞ্ঞাপৱত্তিযং;

কৰুণামুদিতা হোন্তি, কামপুঞ্ঞমহাক্ৰিযে.

৫০২. উপচাৰপ্পনাপত্তা, সুখিতা সত্তগোচৰা;

তস্মা ন পঞ্চমাৰুপ্পে, মহাপাকে অনুত্তৰে.

৫০৩. সোতাপতিতুপেক্খাসু, পৰিকম্মাদিসম্ভৱে;

ঝানানং তুল্যপাকত্তা, তপ্পাকেসু চ লব্ভৰে.

৫০৪. ৱিৰতী চ সৰাগানং, ৱীতিক্কমনসম্ভৱা;

সম্পত্তে চ সমাদানে, কামপুঞ্ঞেসু লব্ভৰে.

৫০৫. তংতংদ্ৱাৰিকদুস্সিল্য-চেতনুচ্ছেদকিচ্চতো;

মগ্গে চ তুল্যপাকত্তা, ফলে চ নিযতা সিযুং.

৫০৬. পৱত্তাকাৰৱিসযভিন্না পঞ্চাপি সম্ভৱা;

লোকিযে লব্ভমানাপি, ৱিসুং চেৱ সিযুং ন ৱা.

৫০৭. পাপা লব্ভন্তি পাপেসু, সত্ত ছক্কেককা কমা;

সৰূপযেৱোভযকা, নিযতট্ঠ ছড়েতৰে.

৫০৮. সাধাৰণা চ সব্বত্থ, যথাৱুত্তা পকিণ্ণকা;

তত্থ চেকগ্গতা নত্থি, ইন্দ্ৰিযাদীসু কঙ্খিতে.

৫০৯. ছন্দাধিমোক্খা যেৱাপি, ৱীসেকাদসৱজ্জিতে;

উদ্ধচ্চমেকাদসসু, মজ্ঝত্তমনৱজ্জকে.

৫১০. সব্বত্থ মনসিকাৰো, তিদ্ৱেকদ্ৱিতিকাপৰে;

অট্ঠট্ঠৱীসচতূসু, পঞ্চদ্ৱীসু যথাক্কমং.

৫১১. সমুদাযৱসেনেত্থ, উদ্ধচ্চৱিৰতিত্তযং;

সৱিভত্তিকমঞ্ঞত্থ, অৱিভত্তিকমেৱ তং.

৫১২. চিত্তুপ্পাদেসু তেনেতং, ৱিভত্তিঅৱিভত্তিকং;

ইতি সাধু সল্লক্খেয্য, সম্ভৱাসম্ভৱং বুধোতি.

ইতি চেতসিকৱিভাগে ৰাসিসম্ভৱকথা নিট্ঠিতা.

চুদ্দসমো পৰিচ্ছেদো.