১০. পভেদকথা

৩৫২. একুপ্পাদা নিৰোধা চ, একালম্বণৱত্থুকা;

সহগতা সহজাতা, সংসট্ঠা সহৱুত্তিনো.

৩৫৩. তেপঞ্ঞাস পনিচ্চেতে, সম্পযুত্তা যথাৰহং;

চিত্তচেতসিকা ধম্মা, অট্ঠাৰসৱিধাপি চ.

৩৫৪. একধা ছব্বিধা চেৱ, চতুধা সত্তধা ঠিতা;

চিত্তুপ্পাদপভেদেন, ভিন্দিতব্বা ৱিভাৱিনা.

৩৫৫. অট্ঠ ধম্মাৱিনিব্ভোগা, ভিন্নাসীতি নৱুত্তৰা;

সত্তসতং দস দ্ৱে চ, সব্বে হোন্তি সমিস্সিতা.

৩৫৬. সন্তীৰণমনোধাতু, সিতৱোট্ঠব্বনা তথা;

অপুঞ্ঞা কামপুঞ্ঞা চ, মহাপাকা মহাক্ৰিযা.

৩৫৭. পঠমজ্ঝানধম্মা চ, লোকুত্তৰমহগ্গতা;

পঞ্চপঞ্ঞাস সব্বেপি, ৱিতক্কা হোন্তি ভেদিতা.

৩৫৮. ৱিচাৰাপি চ তেযেৱ, দুতিযজ্ঝাননামকা;

একাদসাপৰে চেতি, ছসট্ঠি পৰিদীপিতা.

৩৫৯. অপুঞ্ঞা কামপুঞ্ঞা চ, মহাপাকা মহাক্ৰিযা;

চতুক্কা চেৱ চত্তাৰো, সিতঞ্চ সুখতীৰণং.

৩৬০. পঠমাদিতিকজ্ঝানা, লোকুত্তৰমহগ্গতা;

ইচ্চেৱমেকপঞ্ঞাস, পীতিযো হোন্তি সব্বথা.

৩৬১. সিতৱোট্ঠব্বনা দ্ৱে চ, সাৱজ্জা চানৱজ্জকা;

ভিন্নমেৱং তু ৱীৰিযং, তেসত্ততিৱিধং ভৱে.

৩৬২. সাৱজ্জা চানৱজ্জা চ, মোমূহদ্ৱযৱজ্জিতা;

ছন্দা ভৱন্তি সব্বেপি, সট্ঠিভেদা নৱুত্তৰা.

৩৬৩. সন্তীৰণমনোধাতু, সিতৱোট্ঠব্বনা তথা;

সাৱজ্জা চানৱজ্জা চ, ৱিচিকিচ্ছাৱিৱজ্জিতা.

৩৬৪. অধিমোক্খা পনিচ্চেৱং, অট্ঠসত্ততি ভেদিতা;

তিসতং নৱুতি দ্ৱে চ, ভিন্না হোন্তি পকিণ্ণকা.

৩৬৫. একূনসট্ঠি ৱা হোন্তি, সদ্ধাদেকূনৱীসতি;

সহস্সঞ্চ সতঞ্চেকং, একৱীসঞ্চ সব্বথা.

৩৬৬. ঞাণেন সম্পযুত্তা চ, কামে দ্ৱাদসধাপৰে;

পঞ্চতিংসাতি পঞ্ঞাপি, সত্ততালীসধা কথা.

৩৬৭. ৰূপজ্ঝানচতুক্কা চ, কামপুঞ্ঞা মহাক্ৰিযা;

অট্ঠৱীসপ্পমঞ্ঞেৱং, ছপ্পঞ্ঞাস ভৱন্তি চ.

৩৬৮. অনুত্তৰা কামপুঞ্ঞা, তিস্সো ৱিৰতিযো পন;

হোন্তি সোড়সধা ভিন্না, অট্ঠতালীস পিণ্ডিতা.

৩৬৯. পঞ্চৱীসানৱজ্জেৱং, সম্পযুত্তা চতুব্বিধা;

সহস্সদ্ৱিসতঞ্চেৱ, দ্ৱি চ সত্ততি ভেদতো.

৩৭০. চত্তাৰো পাপসামঞ্ঞা, ভিন্না দ্ৱাদসধা পন;

অট্ঠতালীসধা হোন্তি, তে সব্বে পৰিপিণ্ডিতা.

৩৭১. লোভো পনট্ঠধা ভিন্নো, থিনমিদ্ধঞ্চ পঞ্চধা;

চতুধা দিট্ঠিমানো চ, চতুধা দিট্ঠিযো ৱিসুং.

৩৭২. দ্ৱিধা দোসাদিচত্তাৰো, ৱিচিকিচ্ছেকধাতি চ;

সাৱজ্জা সত্তধা ৱুত্তা, ভিন্নাসীতি তিকুত্তৰা.

৩৭৩. ইচ্চট্ঠাৰসধা ৱুত্তা, তেপঞ্ঞাসাপি ভেদতো;

দ্ৱিসহস্সঞ্চ তু সতং, ভৱন্তেকূনসট্ঠি চ.

৩৭৪. ৱিতক্কৱিচাৰপীতিসুখোপেক্খাসু পঞ্চসু;

ভিন্দিত্ৱা ঝানভেদেন, গহেতব্বা অনুত্তৰা.

৩৭৫. অঞ্ঞত্ৰ পন সব্বত্থ, নত্থি ভেদপ্পযোজনং;

অট্ঠেৱ কস্মা গয্হন্তি, অভেদেনাতি লক্খযে.

৩৭৬. পঠমাদিচতুজ্ঝানা, লোকুত্তৰমহগ্গতা;

ইচ্চেকমেকদসধা, চতুতালীস পিণ্ডিতা.

৩৭৭. তেৱীস পঞ্চমা চেতি, সত্তসট্ঠি সমিস্সিতা;

অপ্পনা তত্থ সব্বাপি, অট্ঠপঞ্ঞাস দীপিতা.

৩৭৮. পঞ্চতিংসেৱ সঙ্খেপা, লোকুত্তৰমহগ্গতা;

অপ্পনা তত্থ সব্বাপি, ছব্বীসতি পকাসিতা.

৩৭৯. ইদ্ধিৱিধং দিব্বসোতং, চেতোপৰিযনামকা;

পুব্বেনিৱাসানুস্সতি, দিব্বচক্খূতি পঞ্চধা.

৩৮০. অভিঞ্ঞাঞাণমীৰেন্তি, ৰূপাৱচৰপঞ্চমা;

কুসলঞ্চ ক্ৰিযা চেতি, ভেদিতং দুৱিধম্পি চ.

৩৮১. তং দ্ৱযম্পি সম্মিস্সেত্ৱা, পঞ্চাভিঞ্ঞা চ লোকিযা;

আসৱক্খযঞাণঞ্চ, ছড়ভিঞ্ঞা পৱুচ্চৰে.

৩৮২. লোকিযা চ দসাভিঞ্ঞা, ভিন্দিত্ৱা কুসলক্ৰিযা;

সত্তসত্ততি ঝানানি, অট্ঠসট্ঠি পনপ্পনা.

৩৮৩. সত্তসত্ততি চিত্তানি, চতুপঞ্ঞাস সব্বথা;

পচিতানি চ চিত্তানি, একতিংসসতং সিযুন্তি.

ইতি চেতসিকৱিভাগে পভেদকথা নিট্ঠিতা.

দসমো পৰিচ্ছেদো.