একাদসমো পৰিচ্ছেদো

১১. ৰাসিসৰূপকথা

৩৮৪. সব্বং সভাৱসামঞ্ঞ-ৱিসেসেন যথাৰহং;

গতৰাসিৱসেনাথ, অট্ঠাৰসৱিধং কথং.

৩৮৫. ফস্সপঞ্চকৰাসী চ, ঝানিন্দ্ৰিযমথাপৰে;

মগ্গবলহেতুকম্ম-পথলোকিযৰাসযো.

৩৮৬. নিৰৱজ্জা ছ পস্সদ্ধি-আদিকা চ সতীমতা;

যুগনন্ধা চ সমথা, তথা যেৱাপনাতি চ.

৩৮৭. ফস্সো চ ৱেদনা সঞ্ঞা, চেতনা চিত্তমেৱ চ;

ফস্সপঞ্চকৰাসীতি, পঞ্চ ধম্মা পকাসিতা.

৩৮৮. ৱিতক্কো চ ৱিচাৰো চ, পীতি চেকগ্গতা তথা;

সুখং দুক্খমুপেক্খাতি, সত্ত ঝানঙ্গনামকা.

৩৮৯. সদ্ধিন্দ্ৰিযঞ্চ ৱীৰিযং, সতি চেৱ সমাধি চ;

পঞ্ঞা চতুব্বিধা ৱুত্তা, মনো পঞ্চাপি ৱেদনা.

৩৯০. জীৱিতিন্দ্ৰিযমেকন্তি, চক্খাদীনি চ সত্তধা;

বাৱীসতিন্দ্ৰিযা নাম, ধম্মা সোড়স দেসিতা.

৩৯১. আদিমগ্গে অনঞ্ঞাত-ঞ্ঞস্সামীতিন্দ্ৰিযং ভৱে;

মজ্ঝে অঞ্ঞিন্দ্ৰিযং অন্তে, অঞ্ঞাতাৱিন্দ্ৰিযন্তি চ.

৩৯২. পঞ্ঞানুত্তৰচিত্তেসু, হোন্তি তীণিন্দ্ৰিযানিপি;

তিহেতুকেসু সেসেসু, একং পঞ্ঞিন্দ্ৰিযং মতং.

৩৯৩. সুখং দুক্খিন্দ্ৰিযঞ্চেৱ, সোমনস্সিন্দ্ৰিযং তথা;

দোমনস্সমুপেক্খাতি, পঞ্চধা ৱেদনা কথা.

৩৯৪. ৰূপাৰূপৱসা দ্ৱেধা, জীৱিতিন্দ্ৰিযমেককং;

চক্খুসোতঘানজিৱ্হাকাযিত্থিপুৰিসিন্দ্ৰিযা.

৩৯৫. তত্থ জীৱিতৰূপঞ্চ, অট্ঠেত্থ ন তু গয্হৰে;

তস্মা নামিন্দ্ৰিযানেৱ, দসপঞ্চ ৱিনিদ্দিসে.

৩৯৬. সম্মাদিট্ঠি চ সঙ্কপ্পো, ৱাযামো ৱিৰতিত্তযং;

সম্মাসতি সমাধি চ, মিচ্ছাদিট্ঠি চ ধম্মতো.

৩৯৭. মগ্গঙ্গানি নৱেতানি, দ্ৱাদসাপি যতো দ্ৱিধা;

সম্মামিচ্ছাতি সঙ্কপ্পো, ৱাযামো চ সমাধি চ.

৩৯৮. লোকপালদুকঞ্চেৱ, হিৰোত্তপ্পমথাপৰং;

অহিৰীকমনোত্তপ্পং, দুকং লোকৱিনাসকং.

৩৯৯. পঞ্চ সদ্ধাদযো চেতি, বলধম্মা নৱেৰিতা;

কণ্হসুক্কৱসেনাপি, পটিপক্খে অকম্পিযা.

৪০০. ছ হেতূ হেতুৰাসিম্হি,

লোভালোভাদিকা তিকা;

মোমূহে কঙ্খিতুদ্ধচ্চা,

তত্থ ৱুত্তাতি অট্ঠধা.

৪০১. মিচ্ছাদিট্ঠি অভিজ্ঝা চ, ব্যাপাদো ৱিৰতিত্তযং;

সম্মাদিট্ঠিনভিজ্ঝা চ, অব্যাপাদো চ চেতনা.

৪০২. দস কম্মপথানেত্থ, ৱুত্তা ৱিৰতিচেতনা;

লোকপালৱিনাসাতি, ৱুত্তা লোকদুকা দ্ৱিধা.

৪০৩. পস্সদ্ধিআদিযুগড়া, নিৰৱজ্জা ছ ৰাসযো;

সতি চ সম্পজঞ্ঞঞ্চ, উপকাৰদুকং ভৱে.

৪০৪. যুগনন্ধদুকং নাম, সমথো চ ৱিপস্সনা;

পগ্গহো চ অৱিক্খেপো, সমথদ্দুকমীৰিতং.

৪০৫. যে সৰূপেন নিদ্দিট্ঠা, চিত্তুপ্পাদেসু তাদিনা;

তে ঠপেত্ৱাৱসেসা তু, যেৱাপনকনামকা.

৪০৬. ছন্দো চ অধিমোক্খো চ, তত্ৰমজ্ঝত্ততা তথা;

উদ্ধচ্চং মনসিকাৰো, পঞ্চাপণ্ণকনামকা.

৪০৭. মানো চ থিনমিদ্ধঞ্চ, ইস্সা মচ্ছৰিযং তথা;

কুক্কুচ্চমপ্পমঞ্ঞা চ, তিস্সো ৱিৰতিযোপি চ.

৪০৮. এতে অনিযতা নাম, একাদস যথাৰহং;

ততো চ সেসা সব্বেপি, নিযতাতি পকিত্তিতা.

৪০৯. কেচি ৰাসিং ন ভজন্তি, কেচি চানিযতা যতো;

তস্মা যেৱাপনাতেৱ, ধম্মা সোড়স দেসিতা.

৪১০. সত্ততিংসাৱসেসা তু, তত্থ তত্থ যথাৰহং;

সৰূপেনেৱ নিদ্দিট্ঠা, চিত্তুপ্পাদেসু সব্বথা.

৪১১. দেসিতানুত্তৰুদ্ধচ্চে, নামতো ৱিৰতুদ্ধৱা;

তথানুত্তৰচিত্তেসু, নিযতং ৱিৰতিত্তযং.

৪১২. চিত্তং ৱিতক্কো সদ্ধা চ,

হিৰোত্তপ্পবলদ্ৱযং;

অলোভো চ অদোসো চ,

লোভো দোসো চ দিট্ঠি চ.

৪১৩. অহিৰীকমনোত্তপ্পং,

উদ্ধচ্চং ৱিৰতিত্তযং;

সোড়সেতে যথাযোগং,

দ্ৱীসু ঠানেসু দেসিতা.

৪১৪. ৱেদনা তীসু ৱীৰিযং, সতি চ চতুৰাসিকা;

সমাধি ছসু পঞ্ঞা চ, সত্তট্ঠানেসু দীপিতা.

৪১৫. একৱীস পনিচ্চেতে, সৱিভত্তিকনামকা;

সেসা দ্ৱত্তিংসতি ধম্মা, সব্বেপি অৱিভত্তিকাতি.

ইতি চেতসিকৱিভাগে ৰাসিসৰূপকথা নিট্ঠিতা.

একাদসমো পৰিচ্ছেদো.