৮. চেতসিকসম্পযোগকথা

২৮৬. ইতি চিত্তৱিধিং ঞত্ৱা, দ্ৱেপঞ্ঞাস ৱিভাৱিনা;

ঞেয্যা চেতসি সম্ভূতা, ধম্মা চেতসিকা কথং.

২৮৭. ফস্সো চ ৱেদনা সঞ্ঞা, চেতনেকগ্গতা তথা;

জীৱিতং মনসিকাৰো, সত্ত সাধাৰণা ইমে.

২৮৮. ৱিতক্কো চ ৱিচাৰো চ, পীতি চ ৱীৰিযং তথা;

ছন্দো চ অধিমোক্খো চ, ছ পকিণ্ণকনামকা.

২৮৯. পুঞ্ঞাপুঞ্ঞেসু পাকেসু, ক্ৰিযাসু চ যথাৰহং;

মানসেসু পৱত্তন্তি, ৱিপ্পকিণ্ণা পকিণ্ণকা.

২৯০. সদ্ধা সতিন্দ্ৰিযঞ্চেৱ, হিৰোত্তপ্পবলদ্ৱযং;

অলোভো চ অদোসো চ, পঞ্ঞা মজ্ঝত্ততাপি চ.

২৯১. অট্ঠেতে উত্তমা নাম, ধম্মা উত্তমসাধনা;

নিৱজ্জাতি পৱুচ্চন্তি, যুগড়া ছ ততোপৰে.

২৯২. পস্সদ্ধি কাযচিত্তানং, লহুতা মুদুতা তথা;

কম্মঞ্ঞতা চ পাগুঞ্ঞ-তা চ উজুকতাতি চ.

২৯৩. অপ্পমঞ্ঞাদ্ৱযং নাম, কৰুণামুদিতা সিযুং;

সম্মাৱাচা চ কম্মন্তা-জীৱা চ ৱিৰতিত্তযং.

২৯৪. পঞ্চৱীস পনিচ্চেতে, অনৱজ্জা যথাৰহং;

পাপাহেতুকমুত্তেসু, অনৱজ্জেসু জাযৰে.

২৯৫. লোভো দোসো চ মোহো চ,

মানো দিট্ঠি চ সংসযো;

থিনমিদ্ধঞ্চ উদ্ধচ্চং,

কুক্কুচ্চঞ্চ তথা দস.

২৯৬. অহিৰীকমনোত্তপ্পং, ইস্সা মচ্ছৰিযন্তি চ;

হোন্তি চুদ্দস সাৱজ্জা, সাৱজ্জেস্ৱেৱ সম্ভৱা.

২৯৭. দ্ৱেপঞ্ঞাস চতুদ্ধেৱং, ধম্মা চেতসিকা ঠিতা;

তেসং দানি পৱক্খামি, সম্পযোগঞ্চ সঙ্গহং.

২৯৮. সত্ত সাধাৰণা সব্ব-চিত্তসাধাৰণা ততো;

চিত্তেন সদ্ধি অট্ঠন্নং, ৱিপ্পযোগো ন কত্থচি.

২৯৯. ৱিতক্কো পঞ্চৱিঞ্ঞাণং, দুতিযাদিৱিৱজ্জিতে;

ৱিচাৰোপি চ তত্থেৱ, ততিযাদিৱিৱজ্জিতে.

৩০০. সোমনস্সযুতে পীতি-চতুত্থজ্ঝানৱজ্জিতে;

ৱীৰিযং পঠমাৱজ্জ-ৱিপাকাহেতুৱজ্জিতে.

৩০১. ছন্দো সম্ভোতি সব্বত্থ, মোমূহাহেতুৱজ্জিতে;

অধিমোক্খো ৱিচিকিচ্ছা-পঞ্চৱিঞ্ঞাণৱজ্জিতে.

৩০২. ছসট্ঠি পঞ্চপঞ্ঞাস, সত্ততি চেৱ সোড়স;

ৱীসতেকাদসেৱাথ, পকিণ্ণকৱিৱজ্জিতা.

৩০৩. মানসা পঞ্চপঞ্ঞাস, সৱিতক্কা ছসট্ঠি চ;

সৱিচাৰেকপঞ্ঞাস, সপ্পীতিকমনা তথা.

৩০৪. তেসত্ততি সৱীৰিযা, সছন্দেকূনসত্ততি;

সাধিমোক্খা পৱুচ্চন্তি, অট্ঠসত্ততি মানসা.

৩০৫. পঞ্ঞাপ্পমঞ্ঞাৱিৰতী, হিত্ৱা একূনসট্ঠিসু;

পাপাহেতুকমুত্তেসু, সদ্ধাদেকূনৱীসতি.

৩০৬. দ্ৱিহেতুকাহেতুপাপৱজ্জিতেসু সমাসতো;

পঞ্ঞা তু জাযতে সত্তচত্তালীসেসু সব্বথা.

৩০৭. মহাক্ৰিযাকামপুঞ্ঞ-ৰূপজ্ঝানেসু জাযৰে;

অপ্পমঞ্ঞাট্ঠৱীসেসু, হিত্ৱা ঝানং তু পঞ্চমং.

৩০৮. লোকুত্তৰেসু সব্বত্থ, সহেৱ ৱিৰতিত্তযং;

কামপুঞ্ঞেসু সম্ভোতি, যথাসম্ভৱতো ৱিসুং.

৩০৯. ৱিৰতীঅপ্পমঞ্ঞাসু, পঞ্চস্ৱপি যথাৰহং;

কদাচিদেৱ সম্ভোতি, একেকোৱ ন চেকতো.

৩১০. অহিৰীকমনোত্তপ্পং, মোহউদ্ধচ্চমেৱ চ;

পাপসাধাৰণা নাম, চত্তাৰো পাপসম্ভৱা.

৩১১. লোভো চ লোভমূলেসু, দিট্ঠিযুত্তেসু দিট্ঠি চ;

মানো দিট্ঠিৱিযুত্তেসু, দিট্ঠিমানা ন চেকতো.

৩১২. দোসমূলেসু দোসো চ, ইস্সা মচ্ছৰিযং তথা;

কুক্কুচ্চমিতি চত্তাৰো, ৱিচিকিচ্ছা তু কঙ্খিতে.

৩১৩. সহেৱ থিনমিদ্ধং তু, সসঙ্খাৰেসু পঞ্চসু;

ইতি চুদ্দস সাৱজ্জা, সাৱজ্জেস্ৱেৱ নিচ্ছিতা.

৩১৪. মানো চ থিনমিদ্ধঞ্চ, সহ ৱাথ ৱিসুং ন ৱা;

ইস্সামচ্ছেৰকুক্কুচ্চা, অঞ্ঞমঞ্ঞং ৱিসুং ন ৱাতি.

ইতি চেতসিকৱিভাগে চেতসিকসম্পযোগকথা নিট্ঠিতা.

অট্ঠমো পৰিচ্ছেদো.