নৱমো পৰিচ্ছেদো

৯. চেতসিকসঙ্গহকথা

৩১৫. সত্ত সাধাৰণা চেৱ, ছ ধম্মা চ পকিণ্ণকা;

সদ্ধাদি পঞ্চৱীসেতি, অট্ঠতিংস সমিস্সিতা.

৩১৬. কামাৱচৰপুঞ্ঞেসু, লব্ভন্তি পঠমদ্ৱযে;

সত্ততিংসেৱ দুতিযে, পঞ্ঞামত্তৱিৱজ্জিতা.

৩১৭. ততিযে চ যথাৱুত্তা, পীতিমত্তৱিৱজ্জিতা;

ছত্তিংসেৱ চতুত্থম্হি, পঞ্ঞাপীতিদ্ৱযং ৱিনা.

৩১৮. মহাক্ৰিযাসু যুজ্জন্তি, হিত্ৱা ৱিৰতিযো তথা;

পঞ্চতিংস চতুত্তিংসদ্ৱযং তেত্তিংসকং কমা.

৩১৯. ঠপেত্ৱা অপ্পমঞ্ঞা চ, মহাপাকেসু যোজিতা;

তেত্তিংসা চেৱ দ্ৱত্তিংসদ্ৱযেকত্তিংসকং কমা.

৩২০. অপ্পমঞ্ঞা গহেত্ৱান, হিত্ৱা ৱিৰতিযো তথা;

পঞ্চতিংসেৱ পঠমে, ৰূপাৱচৰমানসে.

৩২১. ৱিতক্কং দুতিযে হিত্ৱা, ৱিচাৰঞ্চ ততো পৰং;

চতুত্থে পন পীতিঞ্চ, অপ্পমঞ্ঞঞ্চ পঞ্চমে.

৩২২. যথাৱুত্তপকাৰাৱ, চতুত্তিংস যথাক্কমং;

তেত্তিংস চেৱ দ্ৱত্তিংস, সমতিংসঞ্চ লব্ভৰে.

৩২৩. পঞ্চমেন সমানা চ, ঠপেত্ৱাৰুপ্পমানসা;

ভূমাৰম্মণভেদঞ্চ, অঙ্গানঞ্চ পণীততং.

৩২৪. অপ্পমঞ্ঞা ঠপেত্ৱান, গহেত্ৱা ৱিৰতিত্তযং;

ছত্তিংসানুত্তৰে হোন্তি, পঠমজ্ঝানমানসে.

৩২৫. ৱিতক্কং দুতিযে হিত্ৱা, ৱিচাৰঞ্চ ততো পৰং;

পীতিং হিত্ৱা চতুত্থে চ, পঞ্চমেপি চ সব্বথা.

৩২৬. যথাৱুত্তপ্পকাৰাৱ, পঞ্চতিংস যথাক্কমং;

চতুত্তিংসঞ্চ তেত্তিংস, তথা তেত্তিংস চাপৰে.

৩২৭. এৱং বাৱীসধা ভেদো, অনৱজ্জেসু সঙ্গহো;

একূনসট্ঠিচিত্তেসু, অট্ঠতিংসানমীৰিতো.

৩২৮. ৱিৰতী অপ্পমঞ্ঞা চ, গহেত্ৱা পন সব্বসো;

একমেকং গহেত্ৱা চ, পচ্চক্খায চ সব্বথা.

৩২৯. কামেসু সত্তধা পুঞ্ঞে, চতুধা চ ক্ৰিযে তথা;

ৰূপজ্ঝানচতুক্কে চ, কত্তব্বোযম্পি সঙ্গহো.

৩৩০. ইমিনা পনুপাযেন, সমসত্ততি ভেদতো;

অনৱজ্জেসু ৱিঞ্ঞেয্যো, চিত্তুপ্পাদেসু সঙ্গহো.

৩৩১. ইতি সব্বপ্পকাৰেন, অনৱজ্জৱিনিচ্ছযং;

ঞত্ৱা যোজেয্য মেধাৱী, সাৱজ্জেসু চ সঙ্গহং.

৩৩২. সত্ত সাধাৰণা চেৱ, ছ ধম্মা চ পকিণ্ণকা;

চত্তাৰো পাপসামঞ্ঞা, ধম্মা সত্তৰসেৱিমে.

৩৩৩. একূনৱীসাসঙ্খাৰে, পঠমে লোভদিট্ঠিযা;

দুতিযে লোভমানেন, যথাৱুত্তা চ তত্তকা.

৩৩৪. অট্ঠাৰস ৱিনা পীতিং, ততিযে লোভদিট্ঠিযা;

চতুত্থেপি ৱিনা পীতিং, লোভমানেন তত্তকা.

৩৩৫. পটিঘে চ ৱিনা পীতিং, অসঙ্খাৰে তথেৱ তে;

লব্ভন্তি দোসকুক্কুচ্চ-মচ্ছৰিযাহি ৱীসতি.

৩৩৬. অসঙ্খাৰেসু ৱুত্তা চ, সসঙ্খাৰেসু পঞ্চধা;

থিনমিদ্ধেনেকৱীস, ৱীস দ্ৱেৱীসতিক্কমা.

৩৩৭. ছন্দং পীতিঞ্চ উদ্ধচ্চে, হিত্ৱা পঞ্চদসেৱ তে;

হিত্ৱা ৱিমোক্খং কঙ্খঞ্চ, গহেত্ৱা কঙ্খিতে তথা.

৩৩৮. সত্তৱীসতিধম্মানং, ইতি দ্ৱাদস সঙ্গহা;

দ্ৱাদসাপুঞ্ঞচিত্তেসু, ৱিঞ্ঞাতব্বা ৱিভাৱিনা.

৩৩৯. হিত্ৱা ছানিযতে ধম্মে, গহেত্ৱা চ যথাৰহং;

চতুত্তিংসাপি ৱিঞ্ঞেয্যা, সঙ্গহা তত্থ ৱিঞ্ঞুনা.

৩৪০. দ্ৱাদসাকুসলেস্ৱেৱ, ঞত্ৱা সঙ্গহমুত্তৰং;

ঞেয্যাহেতুকচিত্তেসু, সঙ্গহং কমতো কথং?

৩৪১. সত্ত সাধাৰণা ছন্দৱজ্জিতা চ পকিণ্ণকা;

হসিতুপ্পাদচিত্তম্হি, দ্ৱাদসেৱ পকাসিতা.

৩৪২. ৱোট্ঠব্বে চ ৱিনা পীতিং, ৱীৰিযং সুখতীৰণে;

একাদস যথাৱুত্তা, ধম্মা দ্ৱীসুপি দেসিতা.

৩৪৩. মনোধাতুত্তিকে চেৱ, উপেক্খাতীৰণদ্ৱযে;

দস হোন্তি যথাৱুত্তা, হিত্ৱা ৱীৰিযপীতিযো.

৩৪৪. সত্ত সাধাৰণা এৱ, পঞ্চৱিঞ্ঞাণসম্ভৱা;

ইচ্চাহেতুকচিত্তেসু, পঞ্চধা সঙ্গহো ঠিতো.

৩৪৫. ইতি চেতসিকে ধম্মে, চিত্তেসু গণিতে পুন;

চিত্তেন সহ সঙ্গয্হ, গণেয্যাপি চ পণ্ডিতো.

৩৪৬. অট্ঠতিংসাতি যে ৱুত্তা, চিত্তেন সহ তে পুন;

একূনচত্তালীসেতি, সব্বত্থেকাধিকং নযে.

৩৪৭. বাৱীসেৱং দস দ্ৱে চ, পঞ্চ চেতি যথাৰহং;

সঙ্গহা সম্পযুত্তানং, তালীসেকূনকা কথা.

৩৪৮. ৱিতক্কো চ ৱিচাৰো চ, পীতি পঞ্ঞা তথা পন;

অপ্পমঞ্ঞা ৱিৰতীতি, নৱ ধম্মা যথাৰহং.

৩৪৯. গহেতব্বাপনেতব্বা, ভৱন্তি অনৱজ্জকে;

পৰিৱত্তেতি সব্বত্থ, ৱেদনা তু যথাৰহং.

৩৫০. ছন্দাধিমোক্খৱীৰিযা, সদ্ধাদেকূনৱীসতি;

ফস্সাদযো ছড়েৱাতি, ন চলন্তট্ঠৱীসতি.

৩৫১. তেৰসেৱ তু সাৱজ্জে, ছড়েৱাহেতুমানসে;

ন চলন্তি দস অঞ্ঞে, চুদ্দসা ছ চ সম্ভৱাতি.

ইতি চেতসিকৱিভাগে চেতসিকসঙ্গহকথা নিট্ঠিতা.

নৱমো পৰিচ্ছেদো.