১০. ৱিভঙ্গসুত্তং

৪০৬. ‘‘সতিপট্ঠানঞ্চ ৱো, ভিক্খৱে, দেসেস্সামি সতিপট্ঠানভাৱনঞ্চ সতিপট্ঠানভাৱনাগামিনিঞ্চ পটিপদং. তং সুণাথ’’. ‘‘কতমঞ্চ, ভিক্খৱে, সতিপট্ঠানং? ইধ, ভিক্খৱে, ভিক্খু কাযে কাযানুপস্সী ৱিহৰতি আতাপী সম্পজানো সতিমা, ৱিনেয্য লোকে অভিজ্ঝাদোমনস্সং; ৱেদনাসু ৱেদনানুপস্সী ৱিহৰতি…পে… চিত্তে চিত্তানুপস্সী ৱিহৰতি…পে… ধম্মেসু ধম্মানুপস্সী ৱিহৰতি আতাপী সম্পজানো সতিমা, ৱিনেয্য লোকে অভিজ্ঝাদোমনস্সং. ইদং ৱুচ্চতি, ভিক্খৱে, সতিপট্ঠানং’’.

‘‘কতমা চ, ভিক্খৱে, সতিপট্ঠানভাৱনা? ইধ, ভিক্খৱে, ভিক্খু সমুদযধম্মানুপস্সী কাযস্মিং ৱিহৰতি, ৱযধম্মানুপস্সী কাযস্মিং ৱিহৰতি, সমুদযৱযধম্মানুপস্সী কাযস্মিং ৱিহৰতি, আতাপী সম্পজানো সতিমা, ৱিনেয্য লোকে অভিজ্ঝাদোমনস্সং. সমুদযধম্মানুপস্সী ৱেদনাসু ৱিহৰতি…পে… সমুদযধম্মানুপস্সী চিত্তে ৱিহৰতি… সমুদযধম্মানুপস্সী ধম্মেসু ৱিহৰতি, ৱযধম্মানুপস্সী ধম্মেসু ৱিহৰতি, সমুদযৱযধম্মানুপস্সী ধম্মেসু ৱিহৰতি, আতাপী সম্পজানো সতিমা, ৱিনেয্য লোকে অভিজ্ঝাদোমনস্সং. অযং ৱুচ্চতি, ভিক্খৱে, সতিপট্ঠানভাৱনা.

‘‘কতমা চ, ভিক্খৱে, সতিপট্ঠানভাৱনাগামিনী পটিপদা? অযমেৱ অৰিযো অট্ঠঙ্গিকো মগ্গো, সেয্যথিদং – সম্মাদিট্ঠি, সম্মাসঙ্কপ্পো, সম্মাৱাচা, সম্মাকম্মন্তো, সম্মাআজীৱো, সম্মাৱাযামো, সম্মাসতি, সম্মাসমাধি. অযং ৱুচ্চতি, ভিক্খৱে, সতিপট্ঠানভাৱনাগামিনী পটিপদা’’তি. দসমং.

অননুস্সুতৱগ্গো চতুত্থো.

তস্সুদ্দানং –

অননুস্সুতং ৱিৰাগো, ৱিৰদ্ধো ভাৱনা সতি;

অঞ্ঞা ছন্দং পৰিঞ্ঞায, ভাৱনা ৱিভঙ্গেন চাতি.