৫. পঠমসমণব্ৰাহ্মণসুত্তং

১০৭৫. ‘‘যে হি কেচি, ভিক্খৱে, অতীতমদ্ধানং সমণা ৱা ব্ৰাহ্মণা ৱা যথাভূতং অভিসম্বোজ্ঝিংসু, সব্বে তে চত্তাৰি অৰিযসচ্চানি যথাভূতং অভিসম্বোজ্ঝিংসু. যে হি কেচি, ভিক্খৱে, অনাগতমদ্ধানং সমণা ৱা ব্ৰাহ্মণা ৱা যথাভূতং অভিসম্বোজ্ঝিস্সন্তি, সব্বে তে চত্তাৰি অৰিযসচ্চানি যথাভূতং অভিসম্বোজ্ঝিস্সন্তি. যে হি কেচি, ভিক্খৱে, এতৰহি সমণা ৱা ব্ৰাহ্মণা ৱা যথাভূতং অভিসম্বোজ্ঝন্তি, সব্বে তে চত্তাৰি অৰিযসচ্চানি যথাভূতং অভিসম্বোজ্ঝন্তি.

‘‘কতমানি চত্তাৰি? দুক্খং অৰিযসচ্চং…পে… দুক্খনিৰোধগামিনী পটিপদা অৰিযসচ্চং. যে হি কেচি, ভিক্খৱে, অতীতমদ্ধানং সমণা ৱা ব্ৰাহ্মণা ৱা যথাভূতং অভিসম্বোজ্ঝিংসু…পে… অভিসম্বোজ্ঝিস্সন্তি…পে… অভিসম্বোজ্ঝন্তি, সব্বে তে ইমানি চত্তাৰি অৰিযসচ্চানি যথাভূতং অভিসম্বোজ্ঝন্তি.

‘‘তস্মাতিহ, ভিক্খৱে, ‘ইদং দুক্খ’ন্তি যোগো কৰণীযো…পে… ‘অযং দুক্খনিৰোধগামিনী পটিপদা’তি যোগো কৰণীযো’’তি. পঞ্চমং.