৪. দুতিযকুলপুত্তসুত্তং

১০৭৪. ‘‘যে হি কেচি, ভিক্খৱে, অতীতমদ্ধানং কুলপুত্তা সম্মা অগাৰস্মা অনগাৰিযং পব্বজিতা যথাভূতং অভিসমেসুং, সব্বে তে চত্তাৰি অৰিযসচ্চানি যথাভূতং অভিসমেসুং. যে হি কেচি, ভিক্খৱে, অনাগতমদ্ধানং কুলপুত্তা সম্মা অগাৰস্মা অনগাৰিযং পব্বজিতা যথাভূতং অভিসমেস্সন্তি, সব্বে তে চত্তাৰি অৰিযসচ্চানি যথাভূতং অভিসমেস্সন্তি. যে হি কেচি, ভিক্খৱে, এতৰহি কুলপুত্তা সম্মা অগাৰস্মা অনগাৰিযং পব্বজিতা যথাভূতং অভিসমেন্তি, সব্বে তে চত্তাৰি অৰিযসচ্চানি যথাভূতং অভিসমেন্তি.

‘‘কতমানি চত্তাৰি? দুক্খং অৰিযসচ্চং, দুক্খসমুদযং অৰিযসচ্চং, দুক্খনিৰোধং অৰিযসচ্চং, দুক্খনিৰোধগামিনী পটিপদা অৰিযসচ্চং. যে হি কেচি, ভিক্খৱে, অতীতমদ্ধানং কুলপুত্তা সম্মা অগাৰস্মা অনগাৰিযং পব্বজিতা যথাভূতং অভিসমেসুং …পে… অভিসমেস্সন্তি…পে… অভিসমেন্তি, সব্বে তে ইমানি চত্তাৰি অৰিযসচ্চানি যথাভূতং অভিসমেন্তি.

‘‘তস্মাতিহ, ভিক্খৱে, ‘ইদং দুক্খ’ন্তি যোগো কৰণীযো…পে… ‘অযং দুক্খনিৰোধগামিনী পটিপদা’তি যোগো কৰণীযো’’তি. চতুত্থং.