৩. পঠমকুলপুত্তসুত্তং

১০৭৩. ‘‘যে হি কেচি, ভিক্খৱে, অতীতমদ্ধানং কুলপুত্তা সম্মা অগাৰস্মা অনগাৰিযং পব্বজিংসু, সব্বে তে চতুন্নং অৰিযসচ্চানং যথাভূতং অভিসমযায. যে হি কেচি, ভিক্খৱে, অনাগতমদ্ধানং কুলপুত্তা সম্মা অগাৰস্মা অনগাৰিযং পব্বজিস্সন্তি, সব্বে তে চতুন্নং অৰিযসচ্চানং যথাভূতং অভিসমযায. যে হি কেচি, ভিক্খৱে, এতৰহি কুলপুত্তা সম্মা অগাৰস্মা অনগাৰিযং পব্বজন্তি, সব্বে তে চতুন্নং অৰিযসচ্চানং যথাভূতং অভিসমযায.

‘‘কতমেসং চতুন্নং? দুক্খস্স অৰিযসচ্চস্স দুক্খসমুদযস্স অৰিযসচ্চস্স দুক্খনিৰোধস্স অৰিযসচ্চস্স দুক্খনিৰোধগামিনিযা পটিপদায অৰিযসচ্চস্স. যে হি কেচি, ভিক্খৱে, অতীতমদ্ধানং কুলপুত্তা সম্মা অগাৰস্মা অনগাৰিযং পব্বজিংসু…পে… পব্বজিস্সন্তি…পে… পব্বজন্তি, সব্বে তে ইমেসংযেৱ চতুন্নং অৰিযসচ্চানং যথাভূতং অভিসমযায.

‘‘তস্মাতিহ, ভিক্খৱে, ‘ইদং দুক্খ’ন্তি যোগো কৰণীযো, ‘অযং দুক্খসমুদযো’তি যোগো কৰণীযো, ‘অযং দুক্খনিৰোধো’তি যোগো কৰণীযো, ‘অযং দুক্খনিৰোধগামিনী পটিপদা’তি যোগো কৰণীযো’’তি. ততিযং.