৯. অচেলকস্সপসুত্তং

৩৫১. তেন খো পন সমযেন অচেলো কস্সপো মচ্ছিকাসণ্ডং অনুপ্পত্তো হোতি চিত্তস্স গহপতিনো পুৰাণগিহিসহাযো. অস্সোসি খো চিত্তো গহপতি – ‘‘অচেলো কিৰ কস্সপো মচ্ছিকাসণ্ডং অনুপ্পত্তো অম্হাকং পুৰাণগিহিসহাযো’’তি. অথ খো চিত্তো গহপতি যেন অচেলো কস্সপো তেনুপসঙ্কমি; উপসঙ্কমিত্ৱা অচেলেন কস্সপেন সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো চিত্তো গহপতি অচেলং কস্সপং এতদৱোচ – ‘‘কীৱচিৰং পব্বজিতস্স, ভন্তে, কস্সপা’’তি? ‘‘তিংসমত্তানি খো মে, গহপতি, ৱস্সানি পব্বজিতস্সা’’তি. ‘‘ইমেহি পন তে, ভন্তে, তিংসমত্তেহি ৱস্সেহি অত্থি কোচি উত্তৰিমনুস্সধম্মা [উত্তৰিমনুস্সধম্মো (স্যা. কং.)] অলমৰিযঞাণদস্সনৱিসেসো অধিগতো ফাসুৱিহাৰো’’তি? ‘‘ইমেহি খো মে, গহপতি, তিংসমত্তেহি ৱস্সেহি পব্বজিতস্স নত্থি কোচি উত্তৰিমনুস্সধম্মা অলমৰিযঞাণদস্সনৱিসেসো অধিগতো ফাসুৱিহাৰো, অঞ্ঞত্ৰ নগ্গেয্যা চ মুণ্ডেয্যা চ পাৱড়নিপ্ফোটনায চা’’তি. এৱং ৱুত্তে, চিত্তো গহপতি অচেলং কস্সপং এতদৱোচ – ‘‘অচ্ছৰিযং ৱত, ভো, অব্ভুতং ৱত, ভো! ধম্মস্স স্ৱাক্খাততা [সব্বত্থপি এৱমেৱ দিস্সতি] যত্ৰ হি নাম তিংসমত্তেহি ৱস্সেহি ন কোচি উত্তৰিমনুস্সধম্মা অলমৰিযঞাণদস্সনৱিসেসো অধিগতো অভৱিস্স ফাসুৱিহাৰো, অঞ্ঞত্ৰ নগ্গেয্যা চ মুণ্ডেয্যা চ পাৱড়নিপ্ফোটনায চা’’তি!

‘‘তুয্হং পন, গহপতি, কীৱচিৰং উপাসকত্তং উপগতস্সা’’তি? ‘‘ময্হম্পি খো পন, ভন্তে, তিংসমত্তানি ৱস্সানি উপাসকত্তং উপগতস্সা’’তি. ‘‘ইমেহি পন তে, গহপতি, তিংসমত্তেহি ৱস্সেহি অত্থি কোচি উত্তৰিমনুস্সধম্মা অলমৰিযঞাণদস্সনৱিসেসো অধিগতো ফাসুৱিহাৰো’’তি? ‘‘গিহিনোপি সিযা, ভন্তে. অহঞ্হি, ভন্তে, যাৱদেৱ আকঙ্খামি, ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰামি. অহঞ্হি, ভন্তে, যাৱদেৱ আকঙ্খামি, ৱিতক্কৱিচাৰানং ৱূপসমা …পে… দুতিযং ঝানং উপসম্পজ্জ ৱিহৰামি. অহঞ্হি, ভন্তে, যাৱদেৱ আকঙ্খামি, পীতিযা চ ৱিৰাগা…পে… ততিযং ঝানং উপসম্পজ্জ ৱিহৰামি. অহঞ্হি, ভন্তে, যাৱদেৱ আকঙ্খামি, সুখস্স চ পহানা…পে… চতুত্থং ঝানং উপসম্পজ্জ ৱিহৰামি. সচে খো পনাহং, ভন্তে, ভগৱতো [ভগৱতা (স্যা. কং.)] পঠমতৰং কালং কৰেয্যং, অনচ্ছৰিযং খো পনেতং যং মং ভগৱা এৱং ব্যাকৰেয্য – ‘নত্থি তং সংযোজনং যেন সংযোজনেন সংযুত্তো চিত্তো গহপতি পুন ইমং লোকং আগচ্ছেয্যা’’’তি. এৱং ৱুত্তে, অচেলো কস্সপো চিত্তং গহপতিং এতদৱোচ – ‘‘অচ্ছৰিযং ৱত ভো, অব্ভুতং ৱত ভো! ধম্মস্স স্ৱাক্খাততা, যত্ৰ হি নাম গিহী ওদাতৱসনো [গিহী ওদাতৱসনা (সী. পী.)] এৱৰূপং উত্তৰিমনুস্সধম্মা অলমৰিযঞাণদস্সনৱিসেসং অধিগমিস্সতি [অধিগমিস্সন্তি (সী. পী.)] ফাসুৱিহাৰং. লভেয্যাহং, গহপতি, ইমস্মিং ধম্মৱিনযে পব্বজ্জং, লভেয্যং উপসম্পদ’’ন্তি.

অথ খো চিত্তো গহপতি অচেলং কস্সপং আদায যেন থেৰা ভিক্খূ তেনুপসঙ্কমি; উপসঙ্কমিত্ৱা থেৰে ভিক্খূ এতদৱোচ – ‘‘অযং, ভন্তে, অচেলো কস্সপো অম্হাকং পুৰাণগিহিসহাযো. ইমং থেৰা পব্বাজেন্তু উপসম্পাদেন্তু. অহমস্স উস্সুক্কং কৰিস্সামি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰান’’ন্তি. অলত্থ খো অচেলো কস্সপো ইমস্মিং ধম্মৱিনযে পব্বজ্জং, অলত্থ উপসম্পদং. অচিৰূপসম্পন্নো চ পনাযস্মা কস্সপো একো ৱূপকট্ঠো অপ্পমত্তো আতাপী পহিতত্তো ৱিহৰন্তো নচিৰস্সেৱ – যস্সত্থায কুলপুত্তা সম্মদেৱ অগাৰস্মা অনগাৰিযং পব্বজন্তি, তদনুত্তৰং ব্ৰহ্মচৰিযপৰিযোসানং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহাসি. ‘‘খীণা জাতি, ৱুসিতং ব্ৰহ্মচৰিযং, কতং কৰণীযং, নাপৰং ইত্থত্তাযা’’তি অব্ভঞ্ঞাসি. অঞ্ঞতৰো চ পনাযস্মা কস্সপো অৰহতং অহোসীতি. নৱমং.