১০. গিলানদস্সনসুত্তং

৩৫২. তেন খো পন সমযেন চিত্তো গহপতি আবাধিকো হোতি দুক্খিতো বাড়্হগিলানো. অথ খো সম্বহুলা আৰামদেৱতা ৱনদেৱতা ৰুক্খদেৱতা ওসধিতিণৱনপ্পতীসু অধিৱত্থা দেৱতা সঙ্গম্ম সমাগম্ম চিত্তং গহপতিং এতদৱোচুং – ‘‘পণিধেহি, গহপতি, অনাগতমদ্ধানং ৰাজা অস্সং চক্কৱত্তী’’তি.

এৱং ৱুত্তে, চিত্তো গহপতি তা আৰামদেৱতা ৱনদেৱতা ৰুক্খদেৱতা ওসধিতিণৱনপ্পতীসু অধিৱত্থা দেৱতা এতদৱোচ – ‘‘তম্পি অনিচ্চং, তম্পি অদ্ধুৱং, তম্পি পহায গমনীয’’ন্তি. এৱং ৱুত্তে, চিত্তস্স গহপতিনো মিত্তামচ্চা ঞাতিসালোহিতা চিত্তং গহপতিং এতদৱোচুং – ‘‘সতিং, অয্যপুত্ত, উপট্ঠপেহি, মা ৱিপ্পলপী’’তি. ‘‘কিং তাহং ৱদামি যং মং তুম্হে এৱং ৱদেথ – ‘সতিং, অয্যপুত্ত, উপট্ঠপেহি, মা ৱিপ্পলপী’’’তি? ‘‘এৱং খো ত্ৱং, অয্যপুত্ত, ৱদেসি – ‘তম্পি অনিচ্চং, তম্পি অদ্ধুৱং, তম্পি পহায গমনীয’’’ন্তি. ‘‘তথা হি পন মং আৰামদেৱতা ৱনদেৱতা ৰুক্খদেৱতা ওসধিতিণৱনপ্পতীসু অধিৱত্থা দেৱতা এৱমাহংসু – ‘পণিধেহি, গহপতি, অনাগতমদ্ধানং ৰাজা অস্সং চক্কৱত্তী’তি. তাহং এৱং ৱদামি – ‘তম্পি অনিচ্চং…পে… তম্পি পহায গমনীয’’’ন্তি. ‘‘কিং পন তা, অয্যপুত্ত, আৰামদেৱতা ৱনদেৱতা ৰুক্খদেৱতা ওসধিতিণৱনপ্পতীসু অধিৱত্থা দেৱতা অত্থৱসং সম্পস্সমানা এৱমাহংসু – ‘পণিধেহি, গহপতি, অনাগতমদ্ধানং ৰাজা অস্সং চক্কৱত্তী’’’তি? ‘‘তাসং খো আৰামদেৱতানং ৱনদেৱতানং ৰুক্খদেৱতানং ওসধিতিণৱনপ্পতীসু অধিৱত্থানং দেৱতানং এৱং হোতি – ‘অযং খো চিত্তো গহপতি, সীলৱা [সীলৱন্তো (ক.)] কল্যাণধম্মো. সচে পণিদহিস্সতি – অনাগতমদ্ধানং ৰাজা অস্সং চক্কৱত্তী’তি, ‘তস্স খো অযং ইজ্ঝিস্সতি, সীলৱতো চেতোপণিধি ৱিসুদ্ধত্তা ধম্মিকো ধম্মিকং ফলং অনুপস্সতী’তি. ইমং খো তা আৰামদেৱতা ৱনদেৱতা ৰুক্খদেৱতা ওসধিতিণৱনপ্পতীসু অধিৱত্থা দেৱতা অত্থৱসং সম্পস্সমানা এৱমাহংসু – ‘পণিধেহি, গহপতি, অনাগতমদ্ধানং ৰাজা অস্সং চক্কৱত্তী’তি. তাহং এৱং ৱদামি – ‘তম্পি অনিচ্চং, তম্পি অদ্ধুৱং, তম্পি পহায গমনীয’’’ন্তি.

‘‘তেন হি, অয্যপুত্ত, অম্হেপি ওৱদাহী’’তি. ‘‘তস্মা হি ৱো এৱং সিক্খিতব্বং – বুদ্ধে অৱেচ্চপ্পসাদেন সমন্নাগতা ভৱিস্সাম – ‘ইতিপি সো ভগৱা অৰহং সম্মাসম্বুদ্ধো ৱিজ্জাচৰণসম্পন্নো সুগতো লোকৱিদূ অনুত্তৰো পুৰিসদম্মসাৰথি সত্থা দেৱমনুস্সানং বুদ্ধো ভগৱা’তি. ধম্মে অৱেচ্চপ্পসাদেন সমন্নাগতা ভৱিস্সাম – ‘স্ৱাক্খাতো ভগৱতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৱেদিতব্বো ৱিঞ্ঞূহী’তি. সঙ্ঘে অৱেচ্চপ্পসাদেন সমন্নাগতা ভৱিস্সাম – ‘সুপ্পটিপন্নো ভগৱতো সাৱকসঙ্ঘো, উজুপ্পটিপন্নো ভগৱতো সাৱকসঙ্ঘো, ঞাযপ্পটিপন্নো ভগৱতো সাৱকসঙ্ঘো, সামীচিপ্পটিপন্নো ভগৱতো সাৱকসঙ্ঘো, যদিদং চত্তাৰি পুৰিসযুগানি অট্ঠ পুৰিসপুগ্গলা এস ভগৱতো সাৱকসঙ্ঘো আহুনেয্যো পাহুনেয্যো দক্খিণেয্যো অঞ্জলিকৰণীযো অনুত্তৰং পুঞ্ঞক্খেত্তং লোকস্সা’তি. যং খো পন কিঞ্চি কুলে দেয্যধম্মং সব্বং তং অপ্পটিৱিভত্তং ভৱিস্সতি সীলৱন্তেহি কল্যাণধম্মেহীতি এৱঞ্হি ৱো সিক্খিতব্ব’’ন্তি. অথ খো চিত্তো গহপতি মিত্তামচ্চে ঞাতিসালোহিতে বুদ্ধে চ ধম্মে চ সঙ্ঘে চ চাগে চ সমাদপেত্ৱা কালমকাসীতি. দসমং.

চিত্তসংযুত্তং সমত্তং.