৮. নিগণ্ঠনাটপুত্তসুত্তং

৩৫০. তেন খো পন সমযেন নিগণ্ঠো নাটপুত্তো [নাতপুত্তো (সী.)] মচ্ছিকাসণ্ডং অনুপ্পত্তো হোতি মহতিযা নিগণ্ঠপৰিসায সদ্ধিং. অস্সোসি খো চিত্তো গহপতি – ‘‘নিগণ্ঠো কিৰ নাটপুত্তো মচ্ছিকাসণ্ডং অনুপ্পত্তো মহতিযা নিগণ্ঠপৰিসায সদ্ধি’’ন্তি. অথ খো চিত্তো গহপতি সম্বহুলেহি উপাসকেহি সদ্ধিং যেন নিগণ্ঠো নাটপুত্তো তেনুপসঙ্কমি; উপসঙ্কমিত্ৱা নিগণ্ঠেন নাটপুত্তেন সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নং খো চিত্তং গহপতিং নিগণ্ঠো নাটপুত্তো এতদৱোচ – ‘‘সদ্দহসি ত্ৱং, গহপতি, সমণস্স গোতমস্স – অত্থি অৱিতক্কো অৱিচাৰো সমাধি, অত্থি ৱিতক্কৱিচাৰানং নিৰোধো’’তি?

‘‘ন খ্ৱাহং এত্থ, ভন্তে, ভগৱতো সদ্ধায গচ্ছামি. অত্থি অৱিতক্কো অৱিচাৰো সমাধি, অত্থি ৱিতক্কৱিচাৰানং নিৰোধো’’তি. এৱং ৱুত্তে, নিগণ্ঠো নাটপুত্তো উল্লোকেত্ৱা [সকং পৰিসং অপলোকেত্ৱা (সী. স্যা. কং.), ওলোকেত্ৱা (সী. অট্ঠ. স্যা. অট্ঠ.)] এতদৱোচ – ‘‘ইদং ভৱন্তো পস্সন্তু, যাৱ উজুকো চাযং চিত্তো গহপতি, যাৱ অসঠো চাযং চিত্তো গহপতি, যাৱ অমাযাৱী চাযং চিত্তো গহপতি, ৱাতং ৱা সো জালেন বাধেতব্বং মঞ্ঞেয্য, যো ৱিতক্কৱিচাৰে নিৰোধেতব্বং মঞ্ঞেয্য, সকমুট্ঠিনা ৱা সো গঙ্গায সোতং আৱাৰেতব্বং মঞ্ঞেয্য, যো ৱিতক্কৱিচাৰে নিৰোধেতব্বং মঞ্ঞেয্যা’’তি.

‘‘তং কিং মঞ্ঞসি, ভন্তে, কতমং নু খো পণীততৰং – ঞাণং ৱা সদ্ধা ৱা’’তি? ‘‘সদ্ধায খো, গহপতি, ঞাণংযেৱ পণীততৰ’’ন্তি. ‘‘অহং খো, ভন্তে, যাৱদেৱ আকঙ্খামি, ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰামি. অহং খো, ভন্তে, যাৱদেৱ আকঙ্খামি, ৱিতক্কৱিচাৰানং ৱূপসমা…পে… দুতিযং ঝানং উপসম্পজ্জ ৱিহৰামি. অহং খো, ভন্তে, যাৱদেৱ আকঙ্খামি, পীতিযা চ ৱিৰাগা…পে… ততিযং ঝানং উপসম্পজ্জ ৱিহৰামি. অহং খো, ভন্তে, যাৱদেৱ আকঙ্খামি, সুখস্স চ পহানা…পে… চতুত্থং ঝানং উপসম্পজ্জ ৱিহৰামি. ন সো খ্ৱাহং, ভন্তে, এৱং জানন্তো এৱং পস্সন্তো কস্স অঞ্ঞস্স সমণস্স ৱা ব্ৰাহ্মণস্স ৱা সদ্ধায গমিস্সামি? অত্থি অৱিতক্কো অৱিচাৰো সমাধি, অত্থি ৱিতক্কৱিচাৰানং নিৰোধো’’তি.

এৱং ৱুত্তে, নিগণ্ঠো নাটপুত্তো সকং পৰিসং অপলোকেত্ৱা এতদৱোচ – ‘‘ইদং ভৱন্তো পস্সন্তু, যাৱ অনুজুকো চাযং চিত্তো গহপতি, যাৱ সঠো চাযং চিত্তো গহপতি, যাৱ মাযাৱী চাযং চিত্তো গহপতী’’তি.

‘‘ইদানেৱ খো তে [ইদানেৱ চ পন (স্যা. কং. ক.)] মযং, ভন্তে, ভাসিতং – ‘এৱং আজানাম ইদং ভৱন্তো পস্সন্তু, যাৱ উজুকো চাযং চিত্তো গহপতি, যাৱ অসঠো চাযং চিত্তো গহপতি, যাৱ অমাযাৱী চাযং চিত্তো গহপতী’তি. ইদানেৱ চ পন মযং, ভন্তে, ভাসিতং – ‘এৱং আজানাম ইদং ভৱন্তো পস্সন্তু, যাৱ অনুজুকো চাযং চিত্তো গহপতি, যাৱ সঠো চাযং চিত্তো গহপতি, যাৱ মাযাৱী চাযং চিত্তো গহপতী’তি. সচে তে, ভন্তে, পুৰিমং সচ্চং, পচ্ছিমং তে মিচ্ছা. সচে পন তে, ভন্তে, পুৰিমং মিচ্ছা, পচ্ছিমং তে সচ্চং. ইমে খো পন, ভন্তে, দস সহধম্মিকা পঞ্হা আগচ্ছন্তি. যদা নেসং অত্থং আজানেয্যাসি, অথ মং পটিহৰেয্যাসি সদ্ধিং নিগণ্ঠপৰিসায. একো পঞ্হো, একো উদ্দেসো, একং ৱেয্যাকৰণং. দ্ৱে পঞ্হা, দ্ৱে উদ্দেসা, দ্ৱে ৱেয্যাকৰণানি. তযো পঞ্হা, তযো উদ্দেসা, তীণি ৱেয্যাকৰণানি. চত্তাৰো পঞ্হা, চত্তাৰো উদ্দেসা, চত্তাৰি ৱেয্যাকৰণানি. পঞ্চ পঞ্হা, পঞ্চ উদ্দেসা, পঞ্চ ৱেয্যাকৰণানি. ছ পঞ্হা, ছ উদ্দেসা, ছ ৱেয্যাকৰণানি. সত্ত পঞ্হা, সত্ত উদ্দেসা, সত্ত ৱেয্যাকৰণানি. অট্ঠ পঞ্হা, অট্ঠ উদ্দেসা, অট্ঠ ৱেয্যাকৰণানি. নৱ পঞ্হা, নৱ উদ্দেসা, নৱ ৱেয্যাকৰণানি. দস পঞ্হা, দস উদ্দেসা, দস ৱেয্যাকৰণানী’’তি. অথ খো চিত্তো গহপতি নিগণ্ঠং নাটপুত্তং ইমে দস সহধম্মিকে পঞ্হে আপুচ্ছিত্ৱা উট্ঠাযাসনা পক্কামীতি. অট্ঠমং.