২. পঠমইসিদত্তসুত্তং

৩৪৪. একং সমযং সম্বহুলা থেৰা ভিক্খূ মচ্ছিকাসণ্ডে ৱিহৰন্তি অম্বাটকৱনে. অথ খো চিত্তো গহপতি যেন থেৰা ভিক্খূ তেনুপসঙ্কমি; উপসঙ্কমিত্ৱা থেৰে ভিক্খূ অভিৱাদেত্ৱা একমন্তং নিসীদি. একমন্তং নিসিন্নো খো চিত্তো গহপতি থেৰে ভিক্খূ এতদৱোচ – ‘‘অধিৱাসেন্তু মে, ভন্তে, থেৰা স্ৱাতনায ভত্ত’’ন্তি. অধিৱাসেসুং খো থেৰা ভিক্খূ তুণ্হীভাৱেন. অথ খো চিত্তো গহপতি থেৰানং ভিক্খূনং অধিৱাসনং ৱিদিত্ৱা উট্ঠাযাসনা থেৰে ভিক্খূ অভিৱাদেত্ৱা পদক্খিণং কত্ৱা পক্কামি. অথ খো থেৰা ভিক্খূ তস্সা ৰত্তিযা অচ্চযেন পুব্বণ্হসমযং নিৱাসেত্ৱা পত্তচীৱৰমাদায যেন চিত্তস্স গহপতিস্স নিৱেসনং তেনুপসঙ্কমিংসু; উপসঙ্কমিত্ৱা পঞ্ঞত্তে আসনে নিসীদিংসু.

অথ খো চিত্তো গহপতি যেন থেৰা ভিক্খূ তেনুপসঙ্কমি; উপসঙ্কমিত্ৱা থেৰে ভিক্খূ অভিৱাদেত্ৱা একমন্তং নিসীদি. একমন্তং নিসিন্নো খো চিত্তো গহপতি আযস্মন্তং থেৰং এতদৱোচ – ‘‘‘ধাতুনানত্তং, ধাতুনানত্ত’ন্তি, ভন্তে থেৰ, ৱুচ্চতি. কিত্তাৱতা নু খো, ভন্তে, ধাতুনানত্তং ৱুত্তং ভগৱতা’’তি? এৱং ৱুত্তে আযস্মা থেৰো তুণ্হী অহোসি. দুতিযম্পি খো চিত্তো গহপতি আযস্মন্তং থেৰং এতদৱোচ – ‘‘‘ধাতুনানত্তং, ধাতুনানত্ত’ন্তি, ভন্তে থেৰ, ৱুচ্চতি. কিত্তাৱতা নু খো, ভন্তে, ধাতুনানত্তং ৱুত্তং ভগৱতা’’তি? দুতিযম্পি খো আযস্মা থেৰো তুণ্হী অহোসি. ততিযম্পি খো চিত্তো গহপতি আযস্মন্তং থেৰং এতদৱোচ – ‘‘‘ধাতুনানত্তং, ধাতুনানত্ত’ন্তি, ভন্তে থেৰ, ৱুচ্চতি. কিত্তাৱতা নু খো, ভন্তে, ধাতুনানত্তং ৱুত্তং ভগৱতা’’তি? ততিযম্পি খো আযস্মা থেৰো তুণ্হী অহোসি.

তেন খো পন সমযেন আযস্মা ইসিদত্তো তস্মিং ভিক্খুসঙ্ঘে সব্বনৱকো হোতি. অথ খো আযস্মা ইসিদত্তো আযস্মন্তং থেৰং এতদৱোচ – ‘‘ব্যাকৰোমহং, ভন্তে থেৰ, চিত্তস্স গহপতিনো এতং পঞ্হ’’ন্তি? ‘‘ব্যাকৰোহি ত্ৱং, আৱুসো ইসিদত্ত, চিত্তস্স গহপতিনো এতং পঞ্হ’’ন্তি. ‘‘এৱঞ্হি ত্ৱং, গহপতি, পুচ্ছসি – ‘ধাতুনানত্তং, ধাতুনানত্তন্তি, ভন্তে থেৰ, ৱুচ্চতি. কিত্তাৱতা নু খো, ভন্তে, ধাতুনানত্তং, ৱুত্তং ভগৱতা’’’তি? ‘‘এৱং, ভন্তে’’. ‘‘ইদং খো, গহপতি, ধাতুনানত্তং ৱুত্তং ভগৱতা – চক্খুধাতু, ৰূপধাতু, চক্খুৱিঞ্ঞাণধাতু…পে… মনোধাতু, ধম্মধাতু, মনোৱিঞ্ঞাণধাতু. এত্তাৱতা খো, গহপতি, ধাতুনানত্তং ৱুত্তং ভগৱতা’’তি.

অথ খো চিত্তো গহপতি আযস্মতো ইসিদত্তস্স ভাসিতং অভিনন্দিত্ৱা অনুমোদিত্ৱা থেৰে ভিক্খূ পণীতেন খাদনীযেন ভোজনীযেন সহত্থা সন্তপ্পেসি সম্পৱাৰেসি. অথ খো থেৰা ভিক্খূ ভুত্তাৱিনো ওনীতপত্তপাণিনো উট্ঠাযাসনা পক্কমিংসু. অথ খো আযস্মা থেৰো আযস্মন্তং ইসিদত্তং এতদৱোচ – ‘‘সাধু খো তং, আৱুসো ইসিদত্ত, এসো পঞ্হো পটিভাসি, নেসো পঞ্হো মং পটিভাসি. তেনহাৱুসো ইসিদত্ত, যদা অঞ্ঞথাপি [যদা অঞ্ঞদাপি (সী. পী.) অঞ্ঞদাপি (?)] এৱৰূপো পঞ্হো আগচ্ছেয্য, তঞ্ঞেৱেত্থ পটিভাসেয্যা’’তি. দুতিযং.