১৫. সক্কাযপঞ্হাসুত্তং

৩২৮. ‘‘‘সক্কাযো, সক্কাযো’তি, আৱুসো সাৰিপুত্ত, ৱুচ্চতি. কতমো নু খো, আৱুসো, সক্কাযো’’তি? ‘‘পঞ্চিমে, আৱুসো, উপাদানক্খন্ধা সক্কাযো ৱুত্তো ভগৱতা, সেয্যথিদং – ৰূপুপাদানক্খন্ধো, ৱেদনুপাদানক্খন্ধো, সঞ্ঞুপাদানক্খন্ধো, সঙ্খাৰুপাদানক্খন্ধো, ৱিঞ্ঞাণুপাদানক্খন্ধো. ইমে খো, আৱুসো, পঞ্চুপাদানক্খন্ধা সক্কাযো ৱুত্তো ভগৱতা’’তি. ‘‘অত্থি পনাৱুসো, মগ্গো অত্থি পটিপদা, এতস্স সক্কাযস্স পৰিঞ্ঞাযা’’তি? ‘‘অত্থি খো, আৱুসো, মগ্গো অত্থি পটিপদা, এতস্স সক্কাযস্স পৰিঞ্ঞাযা’’তি. ‘‘কতমো পনাৱুসো, মগ্গো কতমা পটিপদা, এতস্স সক্কাযস্স পৰিঞ্ঞাযা’’তি? ‘‘অযমেৱ খো, আৱুসো, অৰিযো অট্ঠঙ্গিকো মগ্গো, এতস্স সক্কাযস্স পৰিঞ্ঞায, সেয্যথিদং – সম্মাদিট্ঠি সম্মাসঙ্কপ্পো সম্মাৱাচা সম্মাকম্মন্তো সম্মাআজীৱো সম্মাৱাযামো সম্মাসতি সম্মাসমাধি. অযং খো, আৱুসো, মগ্গো অযং পটিপদা, এতস্স সক্কাযস্স পৰিঞ্ঞাযা’’তি. ‘‘ভদ্দকো, আৱুসো, মগ্গো ভদ্দিকা পটিপদা, এতস্স সক্কাযস্স পৰিঞ্ঞায. অলঞ্চ পনাৱুসো সাৰিপুত্ত, অপ্পমাদাযা’’তি. পন্নৰসমং.