১৪. দুক্খপঞ্হাসুত্তং

৩২৭. ‘‘‘দুক্খং, দুক্খ’ন্তি, আৱুসো সাৰিপুত্ত, ৱুচ্চতি. কতমং নু খো, আৱুসো, দুক্খ’’ন্তি? ‘‘তিস্সো ইমা, আৱুসো, দুক্খতা. দুক্খদুক্খতা, সঙ্খাৰদুক্খতা, ৱিপৰিণামদুক্খতা – ইমা খো, আৱুসো, তিস্সো দুক্খতা’’তি. ‘‘অত্থি পনাৱুসো মগ্গো অত্থি পটিপদা, এতাসং দুক্খতানং পৰিঞ্ঞাযা’’তি? ‘‘অত্থি খো, আৱুসো, মগ্গো অত্থি পটিপদা, এতাসং দুক্খতানং পৰিঞ্ঞাযা’’তি. ‘‘কতমো পনাৱুসো, মগ্গো কতমা পটিপদা, এতাসং দুক্খতানং পৰিঞ্ঞাযা’’তি? ‘‘অযমেৱ খো, আৱুসো, অৰিযো অট্ঠঙ্গিকো মগ্গো, এতাসং দুক্খতানং পৰিঞ্ঞায, সেয্যথিদং – সম্মাদিট্ঠি সম্মাসঙ্কপ্পো সম্মাৱাচা সম্মাকম্মন্তো সম্মাআজীৱো সম্মাৱাযামো সম্মাসতি সম্মাসমাধি. অযং খো, আৱুসো, মগ্গো অযং পটিপদা, এতাসং দুক্খতানং পৰিঞ্ঞাযা’’তি. ‘‘ভদ্দকো, আৱুসো, মগ্গো ভদ্দিকা পটিপদা, এতাসং দুক্খতানং পৰিঞ্ঞায. অলঞ্চ পনাৱুসো সাৰিপুত্ত, অপ্পমাদাযা’’তি. চুদ্দসমং.