৫. ঞাণসুত্তং

২৭৩. ‘‘‘ইমা ৱেদনা’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৱিজ্জা উদপাদি, আলোকো উদপাদি. ‘অযং ৱেদনাসমুদযো’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি. ‘অযং ৱেদনাসমুদযগামিনী পটিপদা’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি…পে… ‘অযং ৱেদনানিৰোধো’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি …পে… ‘অযং ৱেদনানিৰোধগামিনী পটিপদা’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি…পে… ‘অযং ৱেদনায অস্সাদো’তি মে, ভিক্খৱে, পুব্বে অননুস্সুতেসু ধম্মেসু…পে… ‘অযং ৱেদনায আদীনৱো’তি মে, ভিক্খৱে, পুব্বে অননুস্সুতেসু ধম্মেসু…পে… ‘ইদং খো নিস্সৰণ’ন্তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৱিজ্জা উদপাদি, আলোকো উদপাদী’’তি. পঞ্চমং.