২. অট্ঠসতসুত্তং

২৭০. ‘‘অট্ঠসতপৰিযাযং ৱো, ভিক্খৱে, ধম্মপৰিযাযং দেসেস্সামি. তং সুণাথ. কতমো চ, ভিক্খৱে, অট্ঠসতপৰিযাযো, ধম্মপৰিযাযো? দ্ৱেপি মযা, ভিক্খৱে, ৱেদনা ৱুত্তা পৰিযাযেন; তিস্সোপি মযা ৱেদনা ৱুত্তা পৰিযাযেন; পঞ্চপি মযা ৱেদনা ৱুত্তা পৰিযাযেন; ছপি মযা ৱেদনা ৱুত্তা পৰিযাযেন; অট্ঠাৰসাপি মযা ৱেদনা ৱুত্তা পৰিযাযেন; ছত্তিংসাপি মযা ৱেদনা ৱুত্তা পৰিযাযেন; অট্ঠসতম্পি মযা ৱেদনা ৱুত্তা পৰিযাযেন. ‘‘কতমা চ, ভিক্খৱে, দ্ৱে ৱেদনা? কাযিকা চ চেতসিকা চ – ইমা ৱুচ্চন্তি, ভিক্খৱে, দ্ৱে ৱেদনা. কতমা চ, ভিক্খৱে, তিস্সো ৱেদনা? সুখা ৱেদনা, দুক্খা ৱেদনা, অদুক্খমসুখা ৱেদনা – ইমা ৱুচ্চন্তি, ভিক্খৱে, তিস্সো ৱেদনা. কতমা চ, ভিক্খৱে, পঞ্চ ৱেদনা? সুখিন্দ্ৰিযং, দুক্খিন্দ্ৰিযং, সোমনস্সিন্দ্ৰিযং, দোমনস্সিন্দ্ৰিযং, উপেক্খিন্দ্ৰিযং – ইমা ৱুচ্চন্তি, ভিক্খৱে, পঞ্চ ৱেদনা. কতমা চ, ভিক্খৱে, ছ ৱেদনা? চক্খুসম্ফস্সজা ৱেদনা…পে… মনোসম্ফস্সজা ৱেদনা – ইমা ৱুচ্চন্তি, ভিক্খৱে, ছ ৱেদনা. কতমা চ, ভিক্খৱে, অট্ঠাৰস ৱেদনা? ছ সোমনস্সূপৱিচাৰা, ছ দোমনস্সূপৱিচাৰা, ছ উপেক্খূপৱিচাৰা – ইমা ৱুচ্চন্তি, ভিক্খৱে, অট্ঠাৰস ৱেদনা. কতমা চ, ভিক্খৱে, ছত্তিংস ৱেদনা? ছ গেহসিতানি [গেহস্সিতানি (অট্ঠ.)] সোমনস্সানি, ছ নেক্খম্মসিতানি [নেক্খম্মস্সিতানি (অট্ঠ.)] সোমনস্সানি, ছ গেহসিতানি দোমনস্সানি, ছ নেক্খম্মসিতানি দোমনস্সানি, ছ গেহসিতা উপেক্খা, ছ নেক্খম্মসিতা উপেক্খা – ইমা ৱুচ্চন্তি, ভিক্খৱে, ছত্তিংস ৱেদনা. কতমঞ্চ, ভিক্খৱে, অট্ঠসতং ৱেদনা? অতীতা ছত্তিংস ৱেদনা, অনাগতা ছত্তিংস ৱেদনা, পচ্চুপ্পন্না ছত্তিংস ৱেদনা – ইমা ৱুচ্চন্তি, ভিক্খৱে, অট্ঠসতং ৱেদনা. অযং, ভিক্খৱে, অট্ঠসতপৰিযাযো ধম্মপৰিযাযো’’তি. দুতিযং.