৭. পঠমসম্বহুলসুত্তং

২৬৫. অথ খো সম্বহুলা ভিক্খূ যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. একমন্তং নিসিন্না খো তে ভিক্খূ ভগৱন্তং এতদৱোচুং – ‘‘কতমা নু খো, ভন্তে, ৱেদনা, কতমো ৱেদনাসমুদযো, কতমো ৱেদনানিৰোধো, কতমা ৱেদনানিৰোধগামিনী পটিপদা? কো ৱেদনায অস্সাদো, কো আদীনৱো, কিং নিস্সৰণ’’ন্তি? ‘‘তিস্সো ইমা, ভিক্খৱে, ৱেদনা – সুখা ৱেদনা, দুক্খা ৱেদনা, অদুক্খমসুখা ৱেদনা – ইমা ৱুচ্চন্তি, ভিক্খৱে, ৱেদনা. ফস্সসমুদযা ৱেদনাসমুদযো; ফস্সনিৰোধা ৱেদনানিৰোধো. অযমেৱ অৰিযো অট্ঠঙ্গিকো মগ্গো ৱেদনানিৰোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি. যং ৱেদনং পটিচ্চ উপ্পজ্জতি সুখং সোমনস্সং, অযং ৱেদনায অস্সাদো. যা ৱেদনা অনিচ্চা দুক্খা ৱিপৰিণামধম্মা, অযং ৱেদনায আদীনৱো. যো ৱেদনায ছন্দৰাগৱিনযো ছন্দৰাগপ্পহানং, ইদং ৱেদনায নিস্সৰণং.

‘‘অথ খো পন, ভিক্খৱে, মযা অনুপুব্বসঙ্খাৰানং নিৰোধো অক্খাতো. পঠমং ঝানং সমাপন্নস্স ৱাচা নিৰুদ্ধা হোতি…পে… খীণাসৱস্স ভিক্খুনো ৰাগো নিৰুদ্ধো হোতি, দোসো নিৰুদ্ধো হোতি, মোহো নিৰুদ্ধো হোতি. অথ খো পন, ভিক্খৱে, মযা অনুপুব্বসঙ্খাৰানং ৱূপসমো অক্খাতো. পঠমং ঝানং সমাপন্নস্স ৱাচা ৱূপসন্তা হোতি…পে… খীণাসৱস্স ভিক্খুনো ৰাগো ৱূপসন্তো হোতি, দোসো ৱূপসন্তো হোতি, মোহো ৱূপসন্তো হোতি. ছযিমা, ভিক্খৱে, পস্সদ্ধিযো. পঠমং ঝানং সমাপন্নস্স ৱাচা পটিপ্পস্সদ্ধা হোতি. দুতিযং ঝানং সমাপন্নস্স ৱিতক্কৱিচাৰা পটিপ্পস্সদ্ধা হোন্তি. ততিযং ঝানং সমাপন্নস্স পীতি পটিপ্পস্সদ্ধা হোতি. চতুত্থং ঝানং সমাপন্নস্স অস্সাসপস্সাসা পটিপ্পস্সদ্ধা হোন্তি. সঞ্ঞাৱেদযিতনিৰোধং সমাপন্নস্স সঞ্ঞা চ ৱেদনা চ পটিপ্পস্সদ্ধা হোন্তি. খীণাসৱস্স ভিক্খুনো ৰাগো পটিপ্পস্সদ্ধো হোতি, দোসো পটিপ্পস্সদ্ধো হোতি, মোহো পটিপ্পস্সদ্ধো হোতী’’তি. সত্তমং.