৫. ততিযসাৰিপুত্তকোট্ঠিকসুত্তং

৪১৪. একং সমযং আযস্মা চ সাৰিপুত্তো, আযস্মা চ মহাকোট্ঠিকো বাৰাণসিযং ৱিহৰন্তি ইসিপতনে মিগদাযে…পে… (সাযেৱ পুচ্ছা) ‘‘কো নু খো, আৱুসো, হেতু কো পচ্চযো, যেনেতং অব্যাকতং ভগৱতা’’তি? ‘‘ৰূপে খো, আৱুসো, অৱিগতৰাগস্স অৱিগতচ্ছন্দস্স অৱিগতপেমস্স অৱিগতপিপাসস্স অৱিগতপৰিড়াহস্স অৱিগততণ্হস্স ‘হোতি তথাগতো পৰং মৰণা’তিপিস্স হোতি…পে… ‘নেৱ হোতি ন ন হোতি তথাগতো পৰং মৰণা’তিপিস্স হোতি. ৱেদনায…পে… সঞ্ঞায…পে… সঙ্খাৰেসু…পে… ৱিঞ্ঞাণে অৱিগতৰাগস্স অৱিগতচ্ছন্দস্স অৱিগতপেমস্স অৱিগতপিপাসস্স অৱিগতপৰিড়াহস্স অৱিগততণ্হস্স ‘হোতি তথাগতো পৰং মৰণা’তিপিস্স হোতি…পে… ‘নেৱ হোতি ন ন হোতি তথাগতো পৰং মৰণা’তিপিস্স হোতি. ৰূপে চ খো, আৱুসো, ৱিগতৰাগস্স…পে… ৱেদনায…পে… সঞ্ঞায…পে… সঙ্খাৰেসু…পে… ৱিঞ্ঞাণে ৱিগতৰাগস্স ৱিগতচ্ছন্দস্স ৱিগতপেমস্স ৱিগতপিপাসস্স ৱিগতপৰিড়াহস্স ৱিগততণ্হস্স ‘হোতি তথাগতো পৰং মৰণা’তিপিস্স ন হোতি…পে… ‘নেৱ হোতি ন ন হোতি তথাগতো পৰং মৰণা’তিপিস্স ন হোতি. অযং খো, আৱুসো, হেতু, অযং পচ্চযো, যেনেতং অব্যাকতং ভগৱতা’’তি. পঞ্চমং.