৬. ঘোসিতসুত্তং

১২৯. একং সমযং আযস্মা আনন্দো কোসম্বিযং ৱিহৰতি ঘোসিতাৰামে. অথ খো ঘোসিতো গহপতি যেনাযস্মা আনন্দো তেনুপসঙ্কমি…পে… একমন্তং নিসিন্নো খো ঘোসিতো গহপতি আযস্মন্তং আনন্দং এতদৱোচ – ‘‘‘ধাতুনানত্তং, ধাতুনানত্ত’ন্তি, ভন্তে আনন্দ, ৱুচ্চতি. কিত্তাৱতা নু খো, ভন্তে, ধাতুনানত্তং ৱুত্তং ভগৱতা’’তি? ‘‘সংৱিজ্জতি খো, গহপতি, চক্খুধাতু, ৰূপা চ মনাপা, চক্খুৱিঞ্ঞাণঞ্চ সুখৱেদনিযং. ফস্সং পটিচ্চ উপ্পজ্জতি সুখা ৱেদনা. সংৱিজ্জতি খো, গহপতি, চক্খুধাতু, ৰূপা চ অমনাপা, চক্খুৱিঞ্ঞাণঞ্চ দুক্খৱেদনিযং. ফস্সং পটিচ্চ উপ্পজ্জতি দুক্খা ৱেদনা. সংৱিজ্জতি খো, গহপতি, চক্খুধাতু, ৰূপা চ মনাপা উপেক্খাৱেদনিযা, চক্খুৱিঞ্ঞাণঞ্চ অদুক্খমসুখৱেদনিযং. ফস্সং পটিচ্চ উপ্পজ্জতি অদুক্খমসুখা ৱেদনা…পে… সংৱিজ্জতি খো, গহপতি, জিৱ্হাধাতু, ৰসা চ মনাপা, জিৱ্হাৱিঞ্ঞাণঞ্চ সুখৱেদনিযং. ফস্সং পটিচ্চ উপ্পজ্জতি সুখা ৱেদনা. সংৱিজ্জতি খো, গহপতি, জিৱ্হাধাতু, ৰসা চ অমনাপা, জিৱ্হাৱিঞ্ঞাণঞ্চ দুক্খৱেদনিযং. ফস্সং পটিচ্চ উপ্পজ্জতি দুক্খা ৱেদনা. সংৱিজ্জতি খো, গহপতি, জিৱ্হাধাতু, ৰসা চ উপেক্খাৱেদনিযা, জিৱ্হাৱিঞ্ঞাণঞ্চ অদুক্খমসুখৱেদনিযং. ফস্সং পটিচ্চ উপ্পজ্জতি অদুক্খমসুখা ৱেদনা…পে… সংৱিজ্জতি খো, গহপতি, মনোধাতু, ধম্মা চ মনাপা, মনোৱিঞ্ঞাণঞ্চ সুখৱেদনিযং. ফস্সং পটিচ্চ উপ্পজ্জতি সুখা ৱেদনা. সংৱিজ্জতি খো, গহপতি, মনোধাতু, ধম্মা চ অমনাপা, মনোৱিঞ্ঞাণঞ্চ দুক্খৱেদনিযং. ফস্সং পটিচ্চ উপ্পজ্জতি দুক্খা ৱেদনা. সংৱিজ্জতি খো, গহপতি, মনোধাতু, ধম্মা চ উপেক্খাৱেদনিযা, মনোৱিঞ্ঞাণঞ্চ অদুক্খমসুখৱেদনিযং. ফস্সং পটিচ্চ উপ্পজ্জতি অদুক্খমসুখা ৱেদনা. এত্তাৱতা খো, গহপতি, ধাতুনানত্তং ৱুত্তং ভগৱতা’’তি. ছট্ঠং.