৭. হালিদ্দিকানিসুত্তং

১৩০. একং সমযং আযস্মা মহাকচ্চানো অৱন্তীসু ৱিহৰতি কুৰৰঘৰে [কুলঘৰে (স্যা. ক.)] পপাতে [পৱত্তে (সী. পী.), সম্পৱত্তে (স্যা. কং. ক.) এত্থেৱ অট্ঠমপিট্ঠেপি] পব্বতে. অথ খো হালিদ্দিকানি [হালিদ্দকানি (সী. স্যা. কং.)] গহপতি যেনাযস্মা মহাকচ্চানো তেনুপসঙ্কমি…পে… একমন্তং নিসিন্নো খো হালিদ্দিকানি গহপতি আযস্মন্তং মহাকচ্চানং এতদৱোচ – ‘‘ৱুত্তমিদং, ভন্তে, ভগৱতা – ‘ধাতুনানত্তং পটিচ্চ উপ্পজ্জতি ফস্সনানত্তং; ফস্সনানত্তং পটিচ্চ উপ্পজ্জতি ৱেদনানানত্ত’ন্তি. কথং নু খো, ভন্তে, ধাতুনানত্তং পটিচ্চ উপ্পজ্জতি ফস্সনানত্তং; ফস্সনানত্তং পটিচ্চ উপ্পজ্জতি ৱেদনানানত্ত’’ন্তি? ‘‘ইধ, গহপতি, ভিক্খু চক্খুনা ৰূপং দিস্ৱা ‘মনাপং ইত্থেত’ন্তি পজানাতি চক্খুৱিঞ্ঞাণং সুখৱেদনিযঞ্চ [সুখৱেদনিযং, সুখৱেদনিযং (সী. পী.), সুখৱেদনিযঞ্চ, সুখৱেদনিযং (স্যা. কং. ক.) এৱং ‘‘দুক্খৱেদনিযঞ্চ অদুক্খমসুখৱেদনিযঞ্চা’’তি পদেসুপি. অট্ঠকথাটীকা ওলোকেতব্বা]. ফস্সং পটিচ্চ উপ্পজ্জতি সুখা ৱেদনা. চক্খুনা খো পনেৱ [পনেৱং (স্যা. কং. ক.)] ৰূপং দিস্ৱা ‘অমনাপং ইত্থেত’ন্তি পজানাতি চক্খুৱিঞ্ঞাণং দুক্খৱেদনিযঞ্চ. ফস্সং পটিচ্চ উপ্পজ্জতি দুক্খা ৱেদনা. চক্খুনা খো পনেৱ ৰূপং দিস্ৱা ‘উপেক্খাট্ঠানিযং [উপেক্খাৱেদনিযং (ক.)] ইত্থেত’ন্তি পজানাতি চক্খুৱিঞ্ঞাণং অদুক্খমসুখৱেদনিযঞ্চ. ফস্সং পটিচ্চ উপ্পজ্জতি অদুক্খমসুখা ৱেদনা.

‘‘পুন চপৰং, গহপতি, ভিক্খু সোতেন সদ্দং সুত্ৱা…পে… ঘানেন গন্ধং ঘাযিত্ৱা…পে… জিৱ্হায ৰসং সাযিত্ৱা…পে… কাযেন ফোট্ঠব্বং ফুসিত্ৱা…পে… মনসা ধম্মং ৱিঞ্ঞায ‘মনাপং ইত্থেত’ন্তি পজানাতি মনোৱিঞ্ঞাণং সুখৱেদনিযঞ্চ. ফস্সং পটিচ্চ উপ্পজ্জতি সুখা ৱেদনা. মনসা খো পনেৱ ধম্মং ৱিঞ্ঞায ‘অমনাপং ইত্থেত’ন্তি পজানাতি মনোৱিঞ্ঞাণং দুক্খৱেদনিযঞ্চ. ফস্সং পটিচ্চ উপ্পজ্জতি দুক্খা ৱেদনা. মনসা খো পনেৱ ধম্মং ৱিঞ্ঞায ‘উপেক্খাট্ঠানিযং ইত্থেত’ন্তি পজানাতি মনোৱিঞ্ঞাণং অদুক্খমসুখৱেদনিযঞ্চ. ফস্সং পটিচ্চ উপ্পজ্জতি অদুক্খমসুখা ৱেদনা. এৱং খো, গহপতি, ধাতুনানত্তং পটিচ্চ উপ্পজ্জতি ফস্সনানত্তং; ফস্সনানত্তং পটিচ্চ উপ্পজ্জতি ৱেদনানানত্ত’’ন্তি. সত্তমং.